بۇگىن ۇكىمەتتىڭ سەلەكتورلىق رەجىمدەگى وتىرىسىندا پرەمەر-مينيستر باقىتجان ساعىنتاەۆ ەلىمىزدىڭ ىشكى ىستەر مينيسترلىگىنە بارلىق ساۋدا ورتالىقتارىندا ءورت قاۋىپسىزدىگىن تەكسەرۋدى تاپسىردى, دەپ حابارلايدى قازاقپارات.
«نازار اۋداراتىن تاعى ءبىر ماسەلە, رەسەيدىڭ كەمەروۆو قالاسىندا ورىن العان قايعىلى جاعداي بارلىقتارىڭىزعا ءمالىم. ساۋدا ورتالىعىندا ءورت بولىپ, كوپ ادام قازا تاپتى, 60-تان اسا. ونىڭ 35-ءى بالالار. ەلباسى رەسمي تۇردە رەسەي پرەزيدەنتىنە كوڭىل ايتتى. ءبىز دە بۇل توتەنشە وقيعادان ساباق الۋىمىز قاجەت», - دەپ اتاپ ءوتتى ۇكىمەت باسشىسى.
ونىڭ دەرەگىنشە, قازىردىڭ وزىندە بۇل ماسەلە الەۋمەتتىك جەلىلەردە قىزۋ تالقىلانىپ جاتىر. بلوگەرلەر ءوز باستامالارىمەن ساۋدا ورتالىقتارىنا بارىپ, ەۆاكۋاتسياعا ارنالعان ەسىكتەردىڭ جابىق-اشىقتىعىن تەكسەرۋدە.
«سول سەبەپتەن ىشكى ىستەر مينيسترلىگى مەن ورتكە قارسى قىزمەتتەر اكىمدىكتەرمەن بىرلەسىپ, ساۋدا ورتالىقتارىندا تەكسەرۋ وتكىزىپ, ءتيىستى شارالار قولدانۋى قاجەت. اسقار ۇزاقباي ۇلى, (قر پرەمەر-ءمينيسترىنىڭ ءبىرىنشى ورىنباسارى مامين) ءسىزدىڭ باقىلاۋىڭىزدا», - دەدى باقىتجان ساعىنتاەۆ.