بۇل تۋرالى بۇگىن شقو اكىمى دانيال احمەتوۆ جۋرناليستەرگە وتكىزگەن بريفينگىندە بەلگىلى بولدى.
ايتا كەتۋ كەرەك, الداعى ءۇش كۇندە اياگوز قالاسىندا قارعىن سۋدان زارداپ شەككەن 19 وتباسى باسپانالى بولماق. بۇعان قوسا, ايماق باسشىسىنىڭ ايتۋىنشا, 109 ءۇيدى جوندەۋ ءۇشىن قارجى ءبولىنىپ, جوبالىق-سمەتالىق قۇجاتتامالارى ازىرلەنگەن.
بۇل ارالىقتا گلۋبوكوە اۋدانىندا تابيعي سيپاتتاعى توتەنشە جاعداي ساقتالۋدا. كۇن رايىنىڭ كۇرت جىلىنۋى مەن ەرىگەن قار سۋىنىڭ سالدارىنان 175 ۇيگە سۋ كىردى. جەرگىلىكتى اتقارۋشى ورگاندار, كوممۋنالدىق قىزمەت تۇرلەرىنىڭ قىزمەتكەرلەرى جانە قۇتقارۋشىلار پروگرەسس, گلۋبوكوە, پرەدگورنوە جانە بەلوۋسوۆكا اۋىلدارىنداعى سۋدى تارتۋ, اعىسىن بۇرۋ تۋراسىندا جۇمىستار جۇرگىزۋدە. بۇگىنگى جاعداي بويىنشا ايماقتا 236 ۇيدەن ءالى سۋ قايتقان جوق.
– بۇل بىرىنشىدەن, گلۋبوكوە اۋدانىنداعى 175 ءۇي, شەمونايحاداعى 42 ءۇي. تاڭەرتەڭ وسكەمەن بويىنشا 15 ۇيدە ءالى سۋ تۇرعان. بىراق, ماعان ءمالىم ەتكەندەي, ءدال قازىرگى ۋاقىتتا ول ۇيلەر سۋدان تولىق تازالاندى. مەن جانە عانا گلۋبوكوە اۋدانىنداعى پروگرەسس اۋىلى تۇرعىندارىمەن كەزدەستىم. سۋ كىرۋ سەبەبى – قاراپايىم. 30 جىلدان استام ۋاقىت, ارينە, ول جەرلەردە مۇنداي كولەمدە سۋ بولعان جوق. قاتىپ قالعان جەردىڭ توڭى وتە تەرەڭ. ءالى جىبىمەدى, سوندىقتان سۋ جەردىڭ ۇستىمەن كەتتى. بارلىق ۇيلەر ويىستا ورنالاسقان, بۇعان تاۋ ەتەگىنەن كەلگەن سۋ قوسىلدى. ونىڭ ۇستىنە ارىقتار دا تازالانباعان, – دەدى دانيال احمەتوۆ.
كەشە تابيعي سيپاتتاعى توتەنشە جاعداي, تاعى شەمونايحا اۋدانىندا دا جاريالاندى. 58 ءۇيدىڭ تۇرعىندارى جەرگىلىكتى مەكتەپكە ەۆاكۋاتسيالانىپ, ءۇش ۋاقىت تاماقپەن جانە بارلىق قاجەتتىلىكپەن قامتاماسىز ەتىلدى. قازىرگى ۋاقىتقا مۇزدىڭ كەپتەلىسى قالادان 42 شاقىرىم قاشىقتىققا دەيىن الشاقتادى. بۇگىن ۋبا وزەنىندە سوڭعى مۇزدى جارۋ جۇمىستارى جۇرگىزىلدى. ايماق باسشىسى, «شەمونايحا قالاسىنا ەشقانداي قاۋىپ جوق» دەپ, سەندىردى.
– كەشە گلۋبوكوە اۋدانىنان كەيىن شەمونايحاعا باردىم. ول جاقتا تاڭعى ساعات 6.30-دان 9.30-عا دەيىنگى ارالىقتا سۋ باسا باستادى. بارلىق ەرىگەن, جاۋىن-شاشىن سۋى ۋبا وزەنىنىڭ ۇستىمەن كەتتى. وزەننىڭ دەڭگەيى مولشەرىنەن 1,5-2 مەترگە دەيىن كوتەرىلىپ كەتتى. بىرقاتار ۇيلەردى سۋ الىپ قالدى. وسى اپتادا مۇزدى جارۋ جۇمىستارى دەر كەزىندە جۇرگىزىلگەندىكتەن, سەڭ ءجۇردى. ءبىر ساعاتتىڭ ىشىندە نەگىزگى سۋ كەتتى. ايتا كەتۋ كەرەك, سۋ العان ۇيلەردىڭ بارلىعى وزەننىڭ اڭعارىندا ورنالاسقان, - دەپ, اتاپ ءوتتى شقو اكىمى.
وسكەمەن مەن سەمەي قالالارى, جارما, ۇلان, كۇرشىم, زىريان, كاتون-قاراعاي اۋداندارىنداعى سۋ تاسۋ جاعدايىن ۋشىقتىرماۋ جانە الدىن الۋ ماقساتىندا بارلىق قىزمەت تۇرلەرى جوعارى دايىندىق رەجيمىنە كوشىرىلگەن.