كوكشەتاۋدىڭ ش.قۇسايىنوۆ اتىنداعى قازاق دراما تەاترىندا مەكتەپ وقۋشىلارى اراسىندا «قاسيەتتى دومبىرا» ءداستۇرلى وبلىستىق بايقاۋى ءوتتى.
اتالعان شارا وبلىستىق ءبىلىم باسقارماسى, ونەرپاز جانە دارىندى بالالارمەن جۇمىس جۇرگىزۋ جونىندەگى وبلىستىق وقۋ-ادىستەمەلىك ورتالىعى, «اقمولا وبلىسى «جاس ۇلان» بىرىڭعاي بالالار مەن جاسوسپىرىمدەر ۇيىمى» قوعامدىق بىرلەستىگىنىڭ ۇيىمداستىرۋىمەن جۇزەگە اسىرىلىپ وتىر.
ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ۇلتتىق سالت-داستۇرلەرىمىزدى, ءتىلىمىز بەن مۋزىكامىزدى, ادەبيەتىمىزدى, جورالعىلارىمىزدى, ەڭ باستىسى ۇلتتىق رۋحىمىزدى اسقاقتاتۋ كەرەكتىگى اتاپ كورسەتىلگەن. بايقاۋدىڭ ماقساتى دا قازاقتىڭ ونەرىن وسكەلەڭ ۇرپاققا جەتكىزۋ, ونى ونەر- سۇيەر جۇرتشىلىققا كەڭىنەن ناسيحاتتاۋ. اتالعان بايقاۋعا اقكول, بۇلاندى, ءبىرجان سال, ەسىل, جارقايىڭ, زەرەندى, تسەلينوگراد, شورتاندى اۋداندارىنان جانە ستەپنوگور مەن كوكشەتاۋ قالالارىنان قىرىققا جۋىق دومبىراشى قاتىستى. وعان «نۇر وتان» پارتياسى اقمولا وبلىستىق فيليالى توراعاسىنىڭ ورىنباسارى ازامات ءبىرجانوۆ, ۇكىلى ىبىراي اتىنداعى وبلىستىق فيلارمونيا ءارتىسى, دومبىراشى قۇرمەت سەيىتوۆ جانە ءبىرجان سال اتىنداعى مۋزىكالىق كوللەدج ديرەكتورى سايان مۇحامەديار قازىلىق جاسادى.
قازىلار القاسى جەڭىمپازداردى «ۇزدىك كۇيشى», «ۇزدىك ءداستۇرلى ءانشى» جانە «ۇزدىك تەرمەشى» اتالىمدارى بويىنشا انىقتادى. سونىڭ ناتيجەسىندە «ۇزدىك كۇيشى» اتالىمىنىڭ جەڭىمپازى بولىپ ەسىل اۋدانىنان ارسەن امانجولوۆ تانىلدى. ارسەننىڭ جەتەكشىسى ناعيما حاسەنوۆا ەكەندىگىن ايتا كەتكەن ورىندى. ال «ۇزدىك ءداستۇرلى ءانشى» اتالىمى بويىنشا ءبىرجان سال اۋدانىنان ءاناس يمانعازى العا وزدى. ونىڭ جەتەكشىسى جەڭىس الجانوۆ. سونىمەن قاتار «ۇزدىك تەرمەشى» اتالىمىندا اقكول اۋدانىنان الىشەر نازيەۆ ۇزدىك دەپ تانىلدى, جەتەكشىسى اقگۇل بوجەنقىزى. قاتىسۋشىلاردىڭ بارلىعىنا اقمولا وبلىسى ءبىلىم باسقارماسىنىڭ جانە اقمولا وبلىسى «جاس ۇلان» بىرىڭعاي بالالار مەن جاسوسپىرىمدەر ۇيىمى» قوعامدىق بىرلەستىگىنىڭ ديپلومدارى مەن ەستەلىك سىيلىقتارى تاپسىرىلدى.
اسقار تۇراپباي ۇلى, «ەگەمەن قازاقستان»
اقمولا وبلىسى