بۇل سۋرەت وسىدان 10 جىل بۇرىن قىتاي استاناسى بەيجىڭدە وتكەن XXIX جازعى وليمپيا ويىندارىنىڭ فينالىندا تۇسىرىلگەن. قازاق سپورتى ءۇشىن بۇل تاريحي ماڭىزى بار اسا قۇندى سۋرەت.
قازىر كەز كەلگەن قازاقستاندىق سۋرەتتەگى ەكى سپورتشىمەن ماقتانا الادى. سەبەبى بەينەدەگى ەكى قازاقتىڭ ءبىرى (باقىت سارسەكباەۆ) – وليمپيادا چەمپيونى اتانسا, ەكىنشى قازاق (قانات يسلام) قىتاي قۇراماسى ساپىندا سىنعا ءتۇسىپ, قولا جۇلدە الدى. ءسويتىپ ەكى بىردەي وعلانىمىز وليمپيادادا مەدال الىپ, تۇعىردىڭ ەڭ بيىك ساتىسىندا وتكەنگە ونەگە, جاستارعا ۇلگى بولاتىنداي تاريحي سۋرەتكە تۇسكەن ەدى.
ءبىر قىزىعى وليمپ شىڭىن باعىندىرعان باقىت سارسەكباەۆ پەن قانات يسلام وزگە ەلدە تۋىپ, تاريحي وتانىنا ورالعان سپورتشىلار. باقىت سارسەكباەۆ 1981 جىلى وزبەكستاننىڭ تاشكەنت وبلىسى, تاباقساي اۋىلىندا تۋعان. 2004 جىلى افينادا وتكەن جازعى وليمپيا ويىندارىندا وزبەكستان قۇراماسىمەن بارا الماي, سول جىلى قازاقستانعا ورالعان.
ال قىتايدىڭ 10 دۇركىن چەمپيونى بولعان قانات يسلام قىتايدىڭ ىلە قازاق اۆتونوميالىق وبلىسى, التاي ايماعىندا تۋعان. بەيجىڭ وليمپياداسىنان كەيىن 2010 جىلى ازاماتتىعىن اۋىستىرىپ, اتامەكەنى قازاقستانعا قونىس اۋداردى. ول قازاقستانعا لوندون وليمپياداسىنا تاريحي وتانىنىڭ اتىنان قاتىسۋدى ماقسات تۇتىپ كەلگەن بولاتىن. بىراق قىتاي تاراپى قانات يسلامعا قارسىلىق تانىتىپ, قازاقستان اتىنان سايىسقا تۇسۋگە رۇقسات بەرمەدى. ءسويتىپ ول 2012 جىلدان بۇگىنگە دەيىن كاسىپقوي بوكستا باق سىناپ كەلەدى.
تاريحي سۋرەتتى تاسپاعا تۇسىرگەن قازاقستاندىق ءفوتوتىلشى ستانيسلاۆ فيليپپوۆ سول ۋاقىتتا وليمپ تۇعىرىندا تۇرعان ەكى قازاقتى سۋرەتكە ءتۇسىرىپ تۇرعانىن بىلمەگەنىن ايتادى. «قاتەلەسپەسەم, وليمپيا ويىندارىنىڭ سوڭعى كۇندەرى بولاتىن. باسشىلار بۇگىن باقىت سارسەكباەۆ فينالدا جۇدىرىقتاسادى. بۇيىرسا, قۇراما قورجىنىنا التىن جۇلدە ءتۇسىپ قالۋى مۇمكىن, سەن سول ءساتتى سۋرەتكە ءتۇسىرۋىڭ كەرەك دەدى. كۇتكەنىمىزدەي باقىت فينالدىق ايقاستا جەڭىمپاز اتانىپ, ەل مەرەيىن ۇستەم ەتتى. ارەناعا جينالعان قازاقستاندىقتاردىڭ قۋانىشىن سوزبەن ايتىپ جەتكىزۋ مۇمكىن ەمەس. ول ءوز الدىنا بولەك ەستەلىك. ءسويتىپ كەزەك جەڭىمپاز بەن جۇلدەگەرلەردى ماراپاتتاۋ ساتىنە كەلدى. بار ويىم – جاقسى كادر جيناۋ بولاتىن. رەسمي ماراپاتتاۋ ءساتى اياقتالعان سوڭ باقىت جانىنا قاناتتى شاقىرىپ, سۋرەتكە تۇسۋگە ىڭعايلاندى. قازاقستاندىق سپورتشىنىڭ ءاربىر قيمىلىن نازاردان تىس قالدىرماۋ ءۇشىن ونىڭ ءاربىر ارەكەتىن سۋرەتكە تۇسىرۋمەن بولدىم. قاپەلىمدە ەش وي جوق, باقىت جاقىن دوسىمەن سۋرەتكە تۇسكىسى كەلگەن ەكەن عوي دەدىم دە ەكەۋىن سۋرەتكە ءتۇسىرىپ الدىم. جارىس اياقتالىپ, سۋرەتتەردى وڭدەپ جاتقاندا اقپاراتتىق سايتتاردان «قىتايداعى قازاق بوكسشىسى وليمپيادانىڭ قولا جۇلدەسىن الدى» دەگەن سىڭايداعى اقپاراتتى كوزىم شالىپ قالدى. سوندا عانا باقىتپەن بىرگە سۋرەتكە تۇسكەن قانات يسلامنىڭ قازاق ەكەنىن ءبىلدىم. ءوزىمنىڭ تاريحي سۋرەت تۇسىرگەنىمدى دە سول كەزدە اڭعاردىم دەسەم بولادى. دەگەنمەن, فوتوتىلشىلەردىڭ كەز كەلگەن كادرى قۇندى عوي», دەيدى ستانيسلاۆ فيليپپوۆ.
قازىرگى تاڭدا باقىت پەن قانات ەلىمىزدىڭ ماقتانىشتارى. قوس قازاق وعلانىنىڭ وليمپ تورىندەگى جەڭىسى مەن جەتىستىگى سوڭدارىنان ەرگەن بوكسشىلارعا ۇلگى. باقىت پەن قاناتتىڭ بۇل جەتىستىگىن كورىپ, ەستىپ وسكەن ساڭلاقتار ءدۇبىرلى دودالاردا قازاقستاننىڭ نامىسىن قولدان بەرمەيتىنى انىق.
ءالي بيتورە, «ەگەمەن قازاقستان»