بالالاردى قولداۋ مەن قورعاۋدى جەتىلدىرۋ – مىندەت

3 قىلمىستا بالا­لار ولتىرىلگەن, 24 جاعدايدا اۋىر جانە ورتا دارەجەدەگى دەنە جارا­قا­تىن العان, 12 رەت زورلاۋعا تاپ بولعان. توناۋ, ۇرىپ-سوعۋ جانە ت.ب. زورلىق-زومبىلىقتىڭ سال­دا­رىنان 14 بالا وزىنە-ءوزى قول جۇمساۋعا بارعان. جالپى ايت­قاندا, 2015-2017 جىلدارى ەلىمىز­دەگى بارلىق قىلمىستىڭ 8439-ى جاسوسپىرىمدەرگە قارسى جاسالعان.

ون شاقتى جىلدان كەيىن قازىر­گى جاس­وس­پىرىمدەر بەل­دى ازامات­تار بولادى. ادامي كاپيتال دەگەنىمىز وسى. بىراق ولاردىڭ دۇرىس ازاماتتار بولىپ وسۋىنە ءبىز لايىقتى جاعداي جاساپ وتىرمىز با؟ ەگەر جاساعان بولساق, ولارعا قارسى قىل­مىستاردىڭ سانى نەگە ارتىپ وتىر؟

مىنە, وسى سۇراقتاردى ءبىز ۇنەمى وزىمىزگە قويىپ, وعان جاۋاپ ىزدەۋىمىز كەرەك. الدىمەن بالا­لار مەن جاسوسپىرىمدەردى ەسىرت­كىدەن, باليعاتقا تولماي جىنىس­تىق قاتى­ناسقا تۇسۋدەن ساقتاۋىمىز كەرەك. بۇلار ادام­گەر­شىلىك ماسەلەلەرى عانا ەمەس, ولاردىڭ دەنساۋ­لىقتارىن ساق­تاۋدىڭ امالى. سوندىقتان بۇلار­دى مەملەكەتتىك قاۋىپسىزدىك ماسە­لەلەرى دەپ قاراستىرعان ءجون.

بۇگىنگى تاڭدا ەلىمىزدە 5 ميل­ليوننان استام بالا مەن ءجاس­وسپىرىم بار. الەمدىك زەرت­تەۋلەر ور­تالىقتارىنىڭ دەرەك­تەرىنە قا­را­عاندا ءبىزدىڭ بالالار وزدەرىنىڭ ءبىلىمى مەن بىلىگى بو­يىنشا 100 ەلدىڭ اراسىندا 12-ءشى ورىن الادى ەكەن. ولاردىڭ ءبارى دە دەن­ساۋلىقتارى جاقسى, باقىتتى بولىپ ءوسۋدى قالايدى. ال بۇل ىسكە مەملەكەت تاراپىنان قامقورلىق بولماسا, قول جەتكىزۋ قيىن.

بالالاردىڭ قاۋىپسىزدىگىن قام­تاماسىز ەتۋ جانە قورعاۋ باعى­تىندا سوڭعى جىلدارى ءبىرشاما زاڭدار جەتىلدىرىلدى. ماسەلەن, قىلمىستىق كودەكسكە 2015 جىلدان باستاپ ەنگىزىلگەن وزگەرىستەر مەن تولىقتى­رۋ­لاردا جاسوسپىرىمدەردى زورلاعانى مەن قورلاعانى ءۇشىن قىلمىسكەردى ءومىر بويى تۇرمەگە قاماۋ جازاسى ەنگىزىلدى. سونداي-اق ونداي قىلمىسكەرلەرگە شارتتى جازا بەرۋ, كەشىرىممەن كەلىسىمگە كەلۋ, ت.ب. قولدانىل­مايتىن بولدى.

الايدا قىلمىس سانىنىڭ ءوسۋى وكىلەتتى ورگاندار جۇمىسىنىڭ جەتكىلىكسىزدىگىن كورسەتىپ وتىر. سونىمەن بىرگە قازىر بالانىڭ اتا-انانىڭ الدىنداعى, قوعام الدىن­داعى مىندەتى ۇمىتىلىپ, تەك قۇقى تۋرالى اڭگى­مەلەر عانا ءجيى ايتىلاتىن بولدى. مۇنىڭ دا وزىندىك جەتىسپەيتىن جاقتارى بار.

وسى ماسەلەلەردىڭ ءبارىن ءماجى­لىستىڭ جالپى وتىرىسىندا ايتا وتىرىپ, ءبىز ۇكىمەت باسشىسى باقىت­جان ساعىنتاەۆتىڭ اتىنا دەپۋتاتتىق ساۋال جولدادىق. وندا بالالار مەن جاسوسپىرىمدەرگە قاتىستى قىلمىستاردىڭ ءورشۋىن توقتاتۋ ءۇشىن بارلىق مەملەكەتتىك ورگانداردىڭ, جەرگىلىكتى باسقارۋ ورگاندارىنىڭ جانە قوعامدىق ينستيتۋتتاردىڭ ءىس-ارەكەتتەرىن ۇيلەستىرەتىن زاڭنامالىق نورمالاردى جەتىلدىرۋدى قاراستىرعان زاڭ جوباسىن ازىرلەۋ كەرەكتىگىن ۇسىندىق.

ساۋلە ايتپاەۆا,

ءماجىلىس دەپۋتاتى