ەلباسى ۇندەۋى كوكتەمنىڭ سامال جەلىندەي جاستاردىڭ جۇرەگىن ەرەكشە قۋانىشقا بولەگەنى انىق. قازىر ءبىلىم, ماماندىق الۋعا قۇشتار, بىراق گرانتقا ىلىنە الماي, اقىلى بولىمدەردە وقۋعا قارجىسى بولماي ۋاقىتىن جوعالتاتىن جاستار از ەمەس.
ەندى ەلباسى قولداۋىنىڭ ارقاسىندا جاستارىمىزعا ءوزىمىزدىڭ ەلدە اقىسىز ءبىلىم الۋعا زور مۇمكىندىك تۋدى. ءار وقۋ جىلىندا بولىنەتىن 54 مىڭ گرانتقا قوسىمشا 20 مىڭ گرانت ءبولىنۋى كوپتەگەن جاستاردىڭ ءۇمىتىن جاعىپ, جوعارى بىلىمگە دەگەن قولجەتىمدىلىكتى ارتتىرىپ وتىر.
قازىرگى تاڭدا ايماقتىق ۋنيۆەرسيتەتتەردىڭ بارلىعى كوپ سالالى جوعارى وقۋ ورىندارى. ياعني تەك ءبىر باعىتتا ەمەس, ەكونوميكالىق, پەداگوگيكالىق, گۋمانيتارلىق, تەحنيكالىق, اگرارلىق, قۇقىق, جاراتىلىستانۋ, تاعى باسقا سالالارعا ماماندار دايارلايدى. ەلباسىنىڭ قوسىمشا ءبولىپ وتىرعان ءبىلىم گرانتىن ايماقتىق جوعارى وقۋ ورىندارىنا تاپسىرعان تالاپكەرلەر دە يەلەنە الادى. ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى دە وڭىردە ورنالاسقان بىردەن-ءبىر كوپ سالالى ءبىلىم ورداسى بولعاندىقتان الماتى وبلىسىنىڭ, جالپى رەسپۋبليكامىزدىڭ جاس تۇرعىندارى ءبىزدىڭ ۋنيۆەرسيتەتكە تالاپكەر بولۋ ارقىلى باقتارىن سىناۋعا مۇمكىندىكتەرى زور. تاعى ءبىر ايتا كەتەتىن جاعىمدى جاڭالىق, جىل سايىن الماتى وبلىسىنىڭ اكىمدىگى الەۋمەتتىك كومەك كورسەتۋ جولىمەن جۇزدەگەن جاستارعا جەرگىلىكتى بيۋدجەت ەسەبىنەن ءبىلىم بەرۋ گرانتىن تاعايىندايدى. ماسەلەن, بىلتىرعى وقۋ جىلىندا 83 جاس ءتۇرلى ماماندىقتار بويىنشا اكىم گرانتىمەن ءبىلىم الىپ جاتىر. بۇل ءۇردىس بيىل دا جالعاسىن تابادى دەگەن سەنىم جوعارى. سەبەبى ەلباسىنىڭ بەس الەۋمەتتىك باستاماسى جارىق كورگەن كۇننەن وبلىس اكىمى اماندىق باتالوۆ ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنە ۇلكەن قولداۋ كورسەتىپ, الداعى 2018-2019 وقۋ جىلىندا 100 گرانت بولەتىنىن جەتكىزدى. ەلباسى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا دا ەلدى تسيفرلاندىرۋ ۇدەرىسىنە بايلانىستى تەحنيكالىق ماماندار دايىنداۋ كەرەكتىگىن ايتقان بولاتىن. وسى جولعى ۇندەۋىندە بولگەن 20 مىڭ ءبىلىم گرانتىنىڭ 11 مىڭى تەحنيكالىق ماماندار دايىنداۋعا جۇمسالاتىنىن ەسكە سالدى. بۇل وتە دۇرىس شەشىم. ەلدىڭ ەكونوميكاسىن دامىتۋ ءۇشىن ءوندىرىس قاشاندا تۋ ۇستاۋشى بولىپ قالا بەرمەك. قازىر بۇل سالانى جاڭا تەحنولوگيالارمەن دامىتۋ ءۇشىن تسيفرلاندىرۋ جۇمىستارى باستالدى. وعان ينجەنەرلەرمەن, تەحنولوگتەرمەن قاتار ءىت-ماماندار وتە قاجەت. وسى ماقساتتا ءبىز الداعى وقۋ جىلىندا تەحنيكالىق, اگرارلىق سالا بويىنشا جاڭا ماماندىقتار اشۋدى كوزدەپ وتىرمىز. جاڭا ماماندىقتار ەسەبىنەن ەلباسى بولگەن قوسىمشا گرانت جەتىسۋلىق جاستارعا دا بۇيىرادى دەپ ويلايمىن. ۋنيۆەرسيتەتتەگى قۇرىلىمدىق بولىمدەر جۇمىسىن, وقۋ پروتسەسىنىڭ كەيبىر تۇستارىن تسيفرلاندىرۋ ماقساتىندا جوسپارلاۋ جانە تسيفرلاندىرۋ دەپارتامەنتىن قۇرىپ, ناقتى جۇمىستاردى قولعا الدىق.
ەلباسى ۇندەۋىندە ايتىلعان ستۋدەنتتەردىڭ جاتاقحاناداعى جاعدايىن جاقسارتۋ ماسەلەسى وتە ورىندى. ارينە بۇعان دەيىن دە ستۋدەنتتەردى جاتاقحانامەن قامتاماسىز ەتۋ ماسەلەسى كۇن تارتىبىنەن تۇسكەن ەمەس. دەسەك تە پرەزيدەنتتىڭ «2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن», دەۋى ءتۇيىندى ماسەلەنى تارقاتقانداي بولدى. مۇنىڭ ءبىلىم وردالارىنىڭ جاعدايىن جاقسارتۋعا, ستۋدەنتتەردىڭ كۇنكورىسىنە, ساباققا الاڭسىز قاراۋىنا ىقپالى زور بولارى ءسوزسىز. ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە 524 ورىندىق ەكى جاتاقحانا بار. وندا اتا-اناسى جوق ستۋدەنتتەر تەگىن تۇرادى. وبلىس ورتالىعىنان شالعايدا ورنالاسقان ەلدى مەكەننەن كەلگەن ستۋدەنتتەر, الەۋمەتتىك جاعىنان از قورعالعان, كوپ بالالى وتباسىنان شىققان, جاتاقحانادا تۇرۋعا نيەت بىلدىرگەن ستۋدەنتتەردىڭ بارلىعى جاتاقحانامەن قامتاماسىز ەتىلگەن. بارلىق بولمەلەر تۇرمىستىق تەحنيكامەن, جۇمساق جيھازدارمەن جابدىقتالعان. دەگەنمەن دە ەلباسى ۇندەۋىنەن كەيىن ستۋدەنتتەرگە جاڭا جاتاقحانا سالۋ ماسەلەسى كوتەرىلىپ, وبلىستىق اكىمدىكپەن كەلىسىم جۇرگىزىلدى. الداعى ۋاقىتتا 500 ورىندىق جاڭا جاتاقحانا سالۋ جوسپارلانىپ وتىر. قازىرگى تاڭدا جەر ءبولىنىپ, قۇجاتتار دايىندالىپ جاتىر.
الەۋمەتتىك جاعدايدىڭ جاقسارۋى – قۋاتتى ەلگە اينالۋ جولىنداعى قارەكەت.
قۋات بايمىرزاەۆ,
ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ
رەكتورى, گەوگرافيا عىلىمدارىنىڭ دوكتورى, پروفەسسور