ومىردە بۇل كويلەكتەردى كيىپ جۇرەتىن الىپ ارۋلاردىڭ تابىلۋى نەعايبىل. دەگەنمەن الداعى كۇندەرى الماتىدا باستالاتىن ۇلتتىق ءسان اپتالىعىنىڭ ايتۋلى وقيعالار لەگى باستالدى. ءسان سورەسىنە ءبىرىنشى بولىپ فرانتسۋز ستيليست-سۋرەتشىسى لامين م مەن قازاق ديزاينەرلەرى بىرلەسىپ تىككەن 4 مەترلىك كويلەكتەر شىقتى.
ءا.قاستەەۆ اتىنداعى مەملەكەتتىك ونەر مۋزەيىندە باستالعان « ۇلى جىبەك جولى» كورمەسىنە فرانتسۋز ءتىلدى ەلدەردىڭ (فرانتسيا, بەلگيا, شۆەيتساريا جانە ماروككو) توتەنشە جانە وكىلەتتى ەلشىلەرى ورتاقتاسىپ, فرانكوفونيا مەرەكەسى مەن فرانكوفون كوكتەمى-2018 وقيعاسىنا ورايلاستىرىلعان شارا ءباسپاسوز ماجىلىسىنە ۇلاستى. « ۇلى جىبەك جولى» كويلەكتەر كورمەسىنىڭ اشىلۋى تەك ارنايى شاقىرىلعاندارعا ارنالدى.
جوعارىدا اتاپ وتكەندەي, ەرەكشە كويلەكتەردى تىگۋگە فرانتسۋز ءستيليسى لامين م مۇرىندىق بولىپ, تاماشا يدەيانى ەرلان جولداسبەكوۆ (برەند YERLAN ZHOLDASBEK), گاۋھار احمەتوۆا (برەند KIORI), ەلميرا ماەمەروۆا (برەند MIREL MARAT), جارقىن بايماحانوۆ (برەند JARKYN BAIMAKHANOV), الەكسەي چجەن مەن لاريا جاقامباەۆا (برەند ONE-TO-ONE), تامارا لامانۋكاەۆا (برەند TAMARA LAMANUKAEVA) سىندى وتانداستارىمىز جۇزەگە اسىردى. جانە بۇل ديزاينەرلەر Kazakhstan Fashion Week ۇلتتىق ءسان اپتالىعىنىڭ تۇراقتى قاتىسۋشىلارى.
ال ىسمەرلىك ونەرىنىڭ تۋىندىلارىنا توقتالساق, ونىڭ ارقايسىسى وزىندىك تاقىرىپتارعا يە. كورمەگە قويىلعان كويلەكتەر «كەشىر, ارال», «تاڭبالى تاس» (اۆتورى ەرلان جولداسبەكوۆ), «توميريس پاتشايىم» (كاميللا كيم), «حالىقتار دوستىعى» (گاۋھار احمەتوۆا), «بابالار مۇراسى» (ەلميرا ماەمەروۆا), «La soif noire» (جارقىن بايماحانوۆ), «جيھان كەزۋ ۋاقىتى» (الەكسەي چجەن مەن لاريا جاقامباەۆا), «اماگا پاتشايىم» (تامارا لامانۋكاەۆا) دەپ اتالادى.
Kazakhstan Fashion Week PR-ديرەكتورى بوتاگوز الدوڭعاروۆانىڭ ايتۋىنشا, وسى جوباعا تارتىلعان ديزاينەرلەر ونى تاماشا يدەيا دەپ تاۋىپ قانا قويماي, ءوز قابىلەتتەرىن تانىتۋدىڭ ەرەكشە مۇمكىندىگى دەپ قابىلداعان. وسىلايشا قازاقستاندىقتار پرەت-ا-پورتە ۇلگىلەرىن تۋدىرا وتىرىپ, ءسان الەمىنە ءوز قولتاڭبالارىن قوستى.
ءاربىر كويلەكتىڭ تاقىرىبى عانا ەمەس, تىگىلۋ تاريحى دا بار. ماتالار فرانتسيادان اكەلىنىپ, ونىڭ ويۋ-سۋرەتتەرى بىرنەشە اي بويى سالىنعان. ماسەلەن, كاميللا كيمنىڭ ۇلگىسى بىرنەشە جۇزدەگەن ماتا تىلىكتەرىنەن تۇرادى. جانە مۇنىڭ ءبارى جىمىن بىلدىرمەي قايتا قۇرالعان. قىسقاسى, ءاربىر كويلەكتى تۋدىرۋدىڭ ءوز كۇردەلىلىگى مەن ءپالسافاسى بار دەسەك بولادى.
بۇرناعى جىلى دا الماتىداعى فرانتسيا ەلشىلىگى مەن فرانتسۋز اليانسى وسى جوبانى جالعاستىرۋ ءۇشىن لامين م-دى قازاقستانعا شىعارماشىلىق ساپارمەن شاقىرعان-دى. « ۇلى جىبەك جولى» تاقىرىبىنا بىرىككەن «الىپ» كويلەكتەردىڭ بىرلەسكەن جاڭا كوللەكتسياسى – وسى ارت-رەزيدەنتسيانىڭ ناتيجەسى.
كورمە 10-13 ءساۋىر ارالىعىنداعى قازاقستان ۇلتتىق ءسان اپتالىعى باستالعانشا جالعاسادى.
ايناش ەسالي,
«ەگەمەن قازاقستان»
الماتى