قالانى دا, دالانى دا باسىپ كەتكەن قوقىس ۇيىندىلەرى – قوعامدىق پروبلەما. ودان قۇتىلۋدىڭ ءتيىمدى جولدارى تالايدان بەرى قاراستىرىلىپ كەلەدى. قاراعاندىلىق «گوركومترانس» جشس قازىرگى ۋاقىتتا قوقىس وڭدەۋ زاۋىتىن سالۋدا. قاتتى تۇرمىستىق قالدىقتاردى شىعارۋمەن شۇعىلداناتىن كاسىپورىن كوپ ۇزاماي وڭىردەگى عانا ەمەس, رەسپۋبليكاداعى العاشقى قوقىس وڭدەۋ ۇيىمىنا اينالاتىن سىڭايلى.
وبلىستا وسى باعىتتا بىرنەشە جىل بۇرىن قولعا الىنعان جوبالار ءساتسىز بولىپ, اقىرى قوقىس وڭدەۋ تاقىرىبى مۇلدە قوزعاۋسىز قالعان ەدى. Kapital.kz ىسكەرلىك اقپارات ورتالىعىنىڭ مالىمەتتەرىنە سۇيەنسەك, ەلىمىزدە بۇگىنگە دەيىن قوقىس وڭدەيتىن كاسىپورىن جوق. قالدىقتاردى سۇرىپتاپ, وڭدەيتىن, جوياتىن شاعىن كومپانيالار عانا بار. ايتالىق, 2012 جىلى اشىلعان استانالىق قوقىس وڭدەۋ كەشەنى ەكى جىلداي عانا جۇمىس ىستەدى. ودان كەيىن قاراجاتتان قيىندىق كورىپ, جۇمىسكەرلەرىنە ەڭبەكاقى تولەي الماي, اقىرى جابىلىپ تىندى.
وسىنداي تاعى ءبىر كەشەن الماتى قالاسىندا سالىنىپ جاتىر. بىلۋىمىزشە, بيىل ىسكە قوسىلماق. قوقىس قالدىقتارىن شىعارىپ, زالالسىزداندىراتىن شاعىن قىزمەت كورسەتۋشى كومپانيالار ءار وڭىردە بار. قاراعاندى وبلىسىندا قاتتى تۇرمىس قالدىقتارىن جيناۋ, سۇرىپتاۋ جانە وڭدەۋمەن اينالىساتىن التى كاسىپورىن بار. الايدا, سوڭعى بەس جىلدا قوقىس قالدىقتارىن وڭدەۋمەن ءبىر عانا كومپانيا – جىلىنا 100 مىڭ توننادان ارتىق قوقىستى سۇرىپتايتىن «گوركومترانس» جشس شۇعىلدانادى. سونىمەن قاتار كاسىپورىن قاراعاندى, ساران, شاحتينسك, تەمىرتاۋ قالالارىنان, اباي اۋدانىنان جەتكىزىلەتىن قوقىس قالدىقتارىن جيناۋعا ارنالعان پوليگونى بار قوقىس وڭدەۋ كەشەنىنىڭ قۇرىلىسىنا كۇش سالۋدا. بۇل جوبانى جۇزەگە اسىرۋعا «گوركومترانس» جشس 800 ميلليون تەڭگە ءبولدى.
– قازىر كومپانيا قوقىستاردى سۇرىپتاۋ جۇمىستارىن جۇرگىزۋدە. جەلىنىڭ قۋاتىن جىلىنا 100 مىڭ توننادان 200 مىڭ تونناعا دەيىن جەتكىزۋ بويىنشا شارالار اتقارىپ جاتىرمىز, – دەيدى «گوركومترانس» جشس-ءنىڭ باس ديرەكتورى مارات بيماعامبەتوۆ. – الايدا, مۇنىڭ ءوزى جەتكىلىكسىز. قوقىس وڭدەۋ زاۋىتىنىڭ قۋاتى جىلىنا 300 مىڭ توننا بولۋى ءتيىس. قۇرىلىستى ءبىز شارتتى تۇردە ءۇش كەزەڭگە بولدىك. ونىڭ العاشقىسىن, ياعني قوقىستاردى سۇرىپتاۋدى باستادىق. بۇل جەلى ارقىلى قالدىقتاردىڭ 80 پايىزى – پلاستيك, كارتون, شىنى, اليۋميني وتەدى. ايتا كەتۋ كەرەك, پلاستيك سالىنىپ جاتقان زاۋىتتا وڭدەلەدى. قالعان شيكىزاتتار ءبىزدىڭ ماتەريالدارمەن جۇمىس ىستەيتىن كومپانيالارعا جىبەرىلەدى. ەكىنشى كەزەڭ – جەلىنى جەتىلدىرۋ جۇمىستارى. بۇل كەزەڭدە ءبىز جابدىقتار ساتىپ الامىز. ماسەلەن, زاۋىتقا پاكەت جىرتقىشتار مەن قالدىقتاردى سۇزەتىن سەپاراتورلار قاجەت. بۇل جابدىقتار تمد اۋماعىندا جوق. ونى ەۋروپادان جەتكىزەمىز. ال ءۇشىنشى كەزەڭدە قاتتى تۇرمىس قالدىقتارىن وڭدەيتىن بيوگاز كەشەنىن جاساۋ قاجەت. جالپى, زاۋىت 2019 جىلى ىسكە قوسىلۋى ءتيىس.
مارات بيماعامبەتوۆتىڭ ايتۋىنشا, اۋقىمدى كەشەن قۇرىلىسى وبلىس اكىمدىگى مەن فين كومپانياسىنىڭ كومەگىمەن جۇرگىزىلۋدە. جوباعا قاتىسۋشىلار بىلتىر مەموراندۋمعا قول قويعان بولاتىن. وبلىس اكىمدىگى «گوركومترانس» جشس-ءنىڭ قۋاتىنا سەرىكتەس قالالاردان قوقىس تاسيتىن قىزمەت كورسەتۋشىلەر تارتۋدى ءوز مىندەتىنە الدى. ال فيندەر قۇرىلىسقا كومەكتەسەدى. قوقىس وڭدەۋدىڭ قىر-سىرىن ءالى كۇنگە جەتىك مەڭگەرە قويماعاندىقتان, ەۋروپا ەلدەرىنىڭ تاجىريبەسىنە سۇيەنۋگە تۋرا كەلەدى. تۇرمىستىق قالدىقتار بىزدە وسى ۋاقىتقا دەيىن وڭدەلمەي كەلدى. ءىرىپ-ءشىرىپ جاتقان قوقىس ۇيىندىلەرى اۋا مەن سۋدى, توپىراق قاباتتارىن اياۋسىز لاستاپ جاتىر. ال ەۋروپادا ءبارى تازا. قوقىس قالدىقتارى تۇرىنە قاراي بولەك جينالادى. ياعني, پلاستيكتى ءبىر, شىنىنى ەكىنشى كونتەينەرگە تاستايدى. ءبىز الدىمەن سونداي تارتىپكە ۇيرەنۋىمىز كەرەك.
نەگىزى, قاراعاندىدا قاتتى تۇرمىس قالدىقتارىن بولەك تاستاۋ ءۇشىن جۇزدەگەن كونتەينەرلەر قويىلعان. الايدا, حالىقتىڭ باسىم بولىگى سوعان ءمان بەرمەستەن, قوقىس تولى قالتاسىن ورتاق ۇيىندىگە لاقتىرىپ جىبەرەدى. دەگەنمەن, كاسىپكەرلەر حالىقتىڭ قوقىستى بولەك جيناۋ مادەنيەتىنە ۇيرەنەرىنە سەنىمدى. ونى ارينە, ۋاقىت كورسەتەدى. ءتىپتى بولماسا, كەلەشەكتە تابيعاتتىڭ ءوزى تارتىپكە ماجبۇرلەرى ءسوزسىز.
قايرات ءابىلدا,
«ەگەمەن قازاقستان»
قاراعاندى