«بۇركىتشى» ەمەس «قۇسبەگى» دەيتىن بولدى...

ۇلتتىق سپورت تۇرلەرى قاۋىم­داستىعىنىڭ ۇيىمداستىرۋىمەن, ءۇرجار اۋدانى اكىمدىگىنىڭ قول­داۋىمەن وتكەن بيىلعى جىلدىڭ ەلشىلىك باس جارىسىندا 39 بۇركىتشى باق سىنادى.

ارادا اپتا وتكەندە قۇس­بە­گى­لەرىمىز جەتىسۋدا باس قوستى. ال­ماتى قالاسىنىڭ يپ­پو­درو­مىندا «رۋxاني جاڭ­عى­رۋ» باع­دارلاماسى اياسىن­دا «قى­ران-2018» اتتى قۇسبە­گى­لەردىڭ رەس­­پۋبليكالىق تۋر­نير­ىندە قازاق­­ستاننىڭ 10 ايماعىنان كەلگەن 60-قا جۋىق بۇركىتشى ءۇش كۇن بويى ءوزارا «كىم مىقتىنى» انىقتادى.

«قانسونار-2018» ءتۋرنيرى باتىس قازاقستان وبلىسىندا تۇڭ­عىش رەت ۇيىمداستىرىلدى. بۇل وڭىردە العاش وتكىزىلگەن جا­رىسقا قازاقستاننىڭ ءار وڭىرى­نەن – اتىراۋ, ماڭعىستاۋ, اقمو­لا, الماتى, جامبىل, كوكشە­تاۋ, قاراعاندى وبلىستارى­نان, استانا مەن الماتى قالا­سى­­نان وتىزدان استام قۇسبەگى قا­تىس­تى. ءبىر قىزىعى, ىرگەدە ءوتىپ جات­قان دۋماننان قالعىسى كەلمەي, رەسەيدىڭ كورشىلەس سا­مارا, تولياتتي, ۋليانوۆ قالا­لا­رى­نان قارشىعا مەن يتەلگى باپ­تاپ جۇرگەن قۇسبەگىلەر دە جولعا شىققان ەكەن. قىزىل كىتاپقا ەنگەن قۇستارىن شەكارادان وتكىزبەي, تەك وزدەرى كەلۋگە ءماجبۇر بولعان. شەتەلدىك قو­ناقتار ورالداعى قۇسبەگىلەر سايى­سىنىڭ ۇيىمداستىرىلۋىنا, ەل-جۇرتتىڭ ىقىلاسىنا ەرەكشە قىزىعۋشىلىق تانىتتى.

ەلىمىزدىڭ باتىس وڭىر­ىن­دە بۇركىتشىلەرىمىزدىڭ رەسپۋب­لي­كالىق سايىستارىن ۇيىمداستىرۋ وت­كەن جىلى باستاۋ العان-دى. ءدال وسىنداي جارىستار بىلتىر ماڭعىستاۋ مەن اتىراۋ وب­لىسىندا ءوتتى. بيىلعى شارا با­تىس قازاقستان وبلىسى باسشى­لى­عىنىڭ قولداۋىمەن ءوتتى. مۇ­نى قۇسبەگىلىك ءداستۇردىڭ ەلىمىز­دىڭ باتىس وڭىرىندە قايتا جاندا­نۋى دەپ ايتۋعا بولادى. قازىر­گى كەز­دە رەسپۋبليكامىزدا جەت­پىس­تەن استام قۇسبەگى بار. اتا-با­با­­مىز­دان مۇرا بولعان ءداستۇرلى ونەر جىل وتكەن سايىن جاندانا تۇسۋدە.

قاتارىنان ءۇش ءىرى باسەكەنى وتكىزگەن قۇسبەگىلەرىمىز وتكەن سەن­بىدە بۋراباي كەنتىندە رەسپۋب­لي­كالىق سەمينار-كەڭەس ۇيىم­داستىردى. ەلىمىزدەگى بۇركىتشىلىك ونەردى دامىتۋعا كۇش سالىپ جۇر­گەن بىرنەشە وبلىستاعى ما­مان­دار مەن حالىقارالىق قۇسبە­گىلەر وكىلدەرى قاتىسقان بۇل سەمينار-كەڭەستە بۇركىتشىلەر جارىسىنىڭ بۇرىنعى بەكىتىلگەن ەرە­جەسىنە تولىقتىرۋلار مەن وزگەرىستەر ەنگىزىلدى.

مادەنيەت جانە سپورت مي­نيس­ترلىگى سپورت جانە دەنە­شى­نىق­­تىرۋ ىستەرى كوميتەتى مەن ۇلت­تىق سپورت تۇرلەرى قاۋىم­داس­تىعىنىڭ ۇيىمداستىرۋىمەن وتكەن اتالمىش جيىننىڭ وزە­گى بۇركىتشىلەر جارىسىن وتكى­زۋ ەرەجەسىنە تولىقتىرۋلار مەن وزگەرىستەر ەنگىزۋ بولعان. نەگى­زىندە, بۇركىتشىلەر جارىسىن وتكى­زۋ ەرەجەسىنە تولىقتىرۋلار ەنگى­زۋ كوپتەن كوتەرىلىپ كەلەدى. وسى ماسەلە تۋرالى وتكەن جىلى الماتى قالاسىندا دا ۇل­كەن جيىن وتكەن. بيىل بۋراباي­دا ۇيىم­داستىرىلعان اتالمىش سەمي­نار-كەڭەستە سول بۇرىن ايتى­لىپ كەلگەن كوپ ماسەلەنىڭ شەشىمى تالقىعا ءتۇسىپ, ءتۇيىنى قو­يىلعانداي بولدى. جيىنعا الەم­دىك قۇسبەگىلەر قاۋىم­داس­تىعىنىڭ ازيا ەلدەرى بويىنشا جەتەكشىسى باقىت قارناق­باەۆ, ۆەنگريا قۇسبەگىلەر فەدە­را­­تسياسىنىڭ وكىلى شاندور دوروگي, الماتى قالاسىنداعى «قى­ران» فەدەراتسياسىنىڭ اتقا­رۋشى ديرەكتورى باعدات مۇپ­تەكەقىزى, اقمولا وبلىسى اكىمىنىڭ كەڭەسشىسى شىناربەك باتىرحانوۆ جانە وننان استام وبلىستان كەلگەن وسى سالا جاتتىقتىرۋشىلارى قاتىستى. كوپتەگەن جىل وسى قۇسبەگىلىك سالاسىندا تەر توگىپ كەلە جات­قان ارداگەر بۇركىتشىلەردىڭ, تاجى­ري­بەلى مامانداردىڭ تاراپىنان ۇسىنىلعان وي-پىكىرلەر ەسكە­رىلە كەلە, بۇركىتشىلەر ەرەجە­سىنە مىناداي وزگەرىستەر ەنگىزۋ ۇيعارىلدى.

جارىس ۇستىندە قۇسبەگىلەر بۇرىن بۇركىتتى قولعا شاقىرۋدى تەك جاياۋ ورىنداپ كەلگەن. بۇدان بىلاي بۇركىتتى قولعا شاقىرۋ تەك ات ۇستىندە اتقارىلادى.

بۇركىتتى قولعا شاقىرۋ بۇ­عان دەيىن 200 مەتر بولسا, بۇل قا­شىق­تىق ەندى 500 مەترگە ۇزارتىلدى.

بۇركىتتى ءتىرى اڭعا سالۋ بو­يىنشا دا وزگەرىس بار. بۇدان بى­لاي­عى جارىستا بۇركىتتى تەك قويان مەن تۇلكىگە سالادى. بۇركىت­تى قاس­قىرعا سالۋ تۋرالى ءبولىم الى­نىپ تاستالدى.

دۇنيەجۇزىلىك قۇسبەگىلەر وكىل­دەرى ۇسىنىسىمەن بۇدان بى­لايعى ۋاقىتتا جارىس «بۇر­كىت­شىلەر جارىسى» ەمەس «قۇسبەگىلەر جارىسى» بولىپ اتالاتىن بولدى.

تولەگەن جاكىتاي,

ۇلتتىق سپورت تۇرلەرى قاۋىمداستىعىنىڭ ءباسپاسوز قىزمەتكەرى