الماتىدا ۇلىستىڭ ۇلى كۇنى – ناۋرىز مەرەكەسى كەڭ كولەمدە تويلاندى. بۇل مەيرام الاتاۋ بوكتەرىندە ورنالاسقان اسەم شاھارعا قاراستى بارلىق 8 اۋداندا ايرىقشا اتالىپ ءوتىلدى. سالتاناتتى شاراعا قالا اكىمى باۋىرجان بايبەك قاتىسىپ, الماتىنىڭ تۇرعىندارى مەن قوناقتارعا قۇتتىقتاۋ ءسوزىن ارنادى.
– بۇگىن ءبىزدىڭ حالقىمىزدىڭ ناۋرىز مەيرامىمەن قاۋىشقانىنا 30 جىل تولىپ وتىر. كەڭەس داۋىرىندە تىيىم سالىنعان ۇلتتىق مەرەكەمىز الماتىدا 1988 جىلدىڭ كوكتەمىندە ءبىر توپ ۇلت زيالىلارىنىڭ باستاماسىمەن, سول كەزدەگى قازاق كسر مينيسترلەر كەڭەسىنىڭ توراعاسى نۇرسۇلتان ءابىش ۇلى نازارباەۆتىڭ قولداۋىمەن قايتا جاڭعىردى. سول كەزدەرى مەملەكەت باسشىسى «ناۋرىز – عاسىرلار قويناۋىنان باستاۋ العان ەرەكشە ۇلىق مەرەكەمىز, جاقسىلىقتىڭ جارشىسى, جاراتىلىستىڭ شىنايى جىل باسى» دەپ اتاپ وتكەن بولاتىن, - دەدى باۋىرجان بايبەك.
اسىرەسە, «استانا» الاڭىندا وتكەن كونتسەرتتىك باعدارلاما كوپشىلىكتىڭ كوڭىلىنەن شىقتى. جەزتاڭداي ءانشى روزا رىمباەۆا, داڭقتى «دوس-مۇقاسان» توبى جانە قازاق ەستراداسىنىڭ باسقا دا جۇلدىزدارى ورىنداعان اسەم اندەردى حالىق ەرەكشە ىقىلاسپەن تىڭدادى. سونىمەن قاتار باسقا دا مەملەكەتتەردەن كەلگەن ءانشى مەن بيشىلەر الماتىلىقتاردىڭ الدىندا ونەر كورسەتىپ, جينالعان جۇرتتىڭ ىستىق ىقىلاسىنا بولەندى.
الماتىنىڭ باسقا دا كورىكتى جەرلەرىندە كيىز ۇيلەر تىگىلىپ, داستارقاندار مولىنان جايىلدى. ۇلىستىڭ ۇلى كۇنىن تويلاۋعا ەڭبەكتەگەن بالادان ەڭكەيگەن قارتقا دەيىن كەلدى. قالا تۇرعىندارى مەن قوناقتارعا ناۋرىزكوجە جانە باسقا دا ۇلتتىق تاعامدار تاراتىلدى. تەاترلاندىرىلعان كورىنىستەر قويىلىپ, ءان مەن بي بايقاۋلارى, سپورتتىق شارالار جانە قولونەر شەبەرلەرىنىڭ جارمەڭكەسى ۇيىمداستىرىلدى.
ناۋرىز مەرەكەسى الماتىدا ءبىر اي بويى تويلانادى. سول ۋاقىت ارالىعىندا الاتاۋ بوكتەرىندەگى اسەم شاھاردا 150-دەن اسا ءتۇرلى شارالار وتەدى دەپ كۇتىلۋدە.
عالىم سۇلەيمەن,
«ەگەمەن قازاقستان»
الماتى