بۇگىن ءماجىلىس توراعاسى نۇرلان نىعماتۋلين بىرىككەن ۇلتتار ۇيىمىنىڭ قازاقستانداعى تۇراقتى ۇيلەستىرۋشىسى نوريماسا شيمومۋرانى قابىلدادى, دەپ حابارلايدى ءماجىلىستىڭ ءباسپاسوز قىزمەتى.
جۇزدەسۋ بارىسىندا قازاقستاننىڭ اتالعان ۇيىممەن جانە ونىڭ ينستيتۋتتارىمەن ىنتىماقتاستىقتىڭ وزەكتى ماسەلەلەرىن تالقىلادى. وتكەن جىلى ءبىزدىڭ ەلىمىزدىڭ بەدەلدى حالىقارالىق ۇيىمعا قوسىلعانىنا 25 جىل بولسا, بيىل قازاقستاندا بۇۇ وكىلدىگىنىڭ اشىلعانىنا 25 جىل تولىپ وتىر.
ن.نىعماتۋليننىڭ ايتۋىنشا, قازاقستان وسى ۋاقىتتار ىشىندە حالىقارالىق قاۋىمداستىققا تابىستى ەنۋمەن قاتار, ونىڭ بەلسەندى قاتىسۋشىلارىنىڭ بىرىنە اينالدى. ءماجىلىس توراعاسىنىڭ پىكىرىنشە, قازاقستان پرەزيدەنتى ءوزىنىڭ ماڭىزدى حالىقارالىق باستامالارىن بىرىككەن ۇلتتار ۇيىمىنىڭ مىنبەرىندە كوتەرگەن بولاتىن. قازاقستان يادرولىق سىناقتارعا جان-جاقتى تىيىم سالۋ شارتىن ازىرلەۋ مەن قابىلداۋعا بەلسەنە ارالاسىپ, ورتالىق ازيادا يادرولىق قارۋدان ازات ايماق قۇرۋ باستاماشىلارىنىڭ ءبىرى بولدى.
وسى رەتتە ءماجىلىس توراعاسى قازاقستاننىڭ بۇۇ قاۋىپسىزدىك كەڭەسىنىڭ مۇشەلىگىنە سايلانۋى ءبىزدىڭ ەلىمىز بەن ەلباسىنىڭ بەيبىتشىلىك پەن قاۋىپسىزدىك جولىنداعى ەرەن ەرلىكتەرىنىڭ بۇكىل الەم الدىندا مويىندالۋى ەكەنىن جانە ونىڭ ەل تاريحىندا التىن ارىپتەرمەن جازىلاتىن ايتۋلى وقيعا بولاتىنىن اتاپ ءوتتى. وسى ورايدا, شيمومۋرا مىرزا جەتكەن جەتىستىكتەردى ەسكەرە كەلىپ, قازاقستاننىڭ بۇۇ مۇشە بولۋى زاڭدى دەپ ەسەپتەيتىنىن جەتكىزدى. سەبەبى, ءبىزدىڭ ەلىمىز دۇنيەجۇزىنىڭ جانە حالىقارالىق قاۋىمداستىقتىڭ الدىندا يادروسىز الەمنىڭ قورعاۋشىسىنا اينالدى. قازاقستان زاماناۋي مەملەكەتكە جەتۋ باعىتىندا زور تابىستارعا جەتتى.
مارتەبەلى مەيمان بۇل قازاقستان پرەزيدەنتىنىڭ ساليقالى ساياساتىنىڭ, كورەگەن باسشىلىعىنىڭ, ەرەن ەرلىكتەرىنىڭ جەمىسى ەكەنىن ايرىقشا اتاپ ءوتتى. پالاتا سپيكەرى ەلباسىنىڭ ساپالى ءومىردى قامتاماسىز ەتۋ تاپسىرمالارىن جۇيەلى تۇردە قامتاماسىز ەتۋمەن ۇندەسەتىن بۇۇ تۇراقتى دامۋ ماقساتتارىنىڭ ءبىزدىڭ ەلىمىز ءۇشىن ماڭىزدى ەكەنىن اتاپ ءوتتى. تاراپتار كەزدەسۋىندە قازاقستان مەن بۇۇ اراسىنداعى بارلىق ارىپتەستىك سۇراقتاردى ەكىجاقتى قارىم-قاتىناس, سونىڭ ىشىندە پارلامەنتتىك دەڭگەيدە ءتيىمدى جۇزەگە اسىرۋ جولدارى جان-جاقتى ايتىلدى.