«نۇر وتان» پارتياسىنىڭ ورتالىق اپپاراتىندا 1 ناۋرىز – پارتيا كۇنىنە وراي ۇيىم قاتارىنا قابىلداۋ سالتاناتى ءوتتى.
شاراعا جاس نۇروتاندىقتارمەن قاتار, ۇيىمنىڭ قالىپتاسۋىنا زور ەڭبەك سىڭىرگەن الدىڭعى بۋىن وكىلدەرى دە ارنايى قاتىستى. پارتيا توراعاسىنىڭ ءبىرىنشى ورىنباسارى ماۋلەن اشىمباەۆ بارشا نۇروتاندىقتاردى ايتۋلى مەرەكەمەن قۇتتىقتاپ, جۇمىستارىنا تابىس تىلەدى. سونداي-اق ول «نۇر وتاننىڭ» الدىندا ەلباسى, پارتيا توراعاسى نۇرسۇلتان نازارباەۆ ايقىنداپ بەرگەن پارتيا قىزمەتىن جاڭعىرتۋعا باعىتتالعان ماڭىزدى مىندەتتەر تۇرعانىنا نازار اۋداردى.
وسىدان تۋرا 19 جىل بۇرىن, ياعني 1999 جىلدىڭ 1 ناۋرىزىندا پارتيانىڭ ءبىرىنشى تاريحي سەزى ءوتىپ, وندا ەلباسى ءبىراۋىزدان «نۇر وتان» پارتياسىنىڭ توراعاسى بولىپ سايلاندى. سودان بەرى پارتيا جىلناماسىنا التىن ارىپتەرمەن جازىلعان ءدال 1 ناۋرىزدا پارتيا كۇنىن اتاپ ءوتۋ يگى داستۇرگە اينالدى. وسى ۋاقىت ارالىعىندا «نۇر وتان» حالقىمىزدىڭ الەۋمەتتىك جاعدايىن جاقسارتىپ, قازاقستاننىڭ دامۋىنا باعىتتالعان ەلباسى تاپسىرمالارىن جۇزەگە اسىرۋعا ۇلكەن ۇلەس قوستى. پارتيا ساياسي كەڭەسىنىڭ كەڭەيتىلگەن وتىرىسىندا مەملەكەت باسشىسى ەلىمىزدەگى جەتەكشى ساياسي كۇشتى ءححى عاسىردىڭ بارلىق تالاپتارىنا ساي, يننوۆاتسياعا بەيىم, جوعارى تەحنولوگيالى, كرەاتيۆتى پارتياعا اينالدىرۋ جونىندە ناقتى تاپسىرما بەردى. سوعان وراي نۇروتاندىقتاردىڭ بىلەك سىبانىپ ىسكە كىرىسكەنىن ايتقان ماۋلەن اشىمباەۆ ەلباسى جۇكتەگەن مىندەتتەردى ورىنداۋ ءۇشىن كادرلىق اۋديت جۇرگىزۋ, ساراپتامالىق جۇمىستاردى كۇشەيتۋ, جاستاردى كوپتەپ جۇمىلدىرۋ سياقتى تىڭ باستامالاردىڭ بەرەرى مول ەكەنىنە توقتالدى. وسىنداي يگى ىستەر «نۇر وتاندى» زامانانىڭ جاڭا بيىگىنە كوتەرمەك.
– ءبىز ءوزىمىزدىڭ باستى مىندەتىمىزدەن جاڭىلماي, ەلباسىنىڭ سەنىمدى تىرەگى بولىپ, ەلىمىزدە قولعا الىنعان جاڭعىرتۋ جۇمىستارىنا جۇيەلى تۇردە قاتىسۋىمىز كەرەك. حالىقتى الاڭداتقان قوعامداعى وزەكتى ماسەلەلەردى جەدەل ءارى وڭتايلى شەشۋ ءۇشىن دە «نۇر وتان» ەلمەن ەتەنە جۇمىس ىستەپ, بارلىق باستامانىڭ باسى-قاسىندا بولۋى ءتيىس, – دەدى ماۋلەن اشىمباەۆ.
وسى رەتتە بۇگىنگى مەرەكەگە وراي ەلىمىزدىڭ بارلىق وڭىرىندە پارتيا قاتارىنا قابىلداۋ ءراسىمى وتكىزىلگەنىن اتاپ وتكەن ءجون. استانا قالاسىنىڭ وزىندە ءار سالادا ەڭبەك ەتىپ جۇرگەن 19 ازاماتقا پارتيا بيلەتى تابىس ەتىلدى. ولاردىڭ قاتارىندا «قازاقستانداعى 100 جاڭا ەسىم» جوباسىنىڭ قاتىسۋشىلارى – توعىزقۇمالاقتان سپورت شەبەرى اسەل داليەۆا, ۆولەيبولدان پاراليمپيادالىق جاستار قۇراماسىنىڭ كاپيتانى سەرىك ەسماتوۆ, شىعىسقازاقستاندىق مۇعالىم ۆالەنتين اليفانوۆ, «ۇزدىك پەداگوگ-2017» توسبەلگىسىنىڭ يەگەرى الەكساندر كينتسەل جانە وپەرا ءانشىسى مەدەت شوتاباەۆ بار. سونداي-اق جوعارى ساناتتى حيرۋرگ دانيار جاقىپوۆ, «زەردە» ۇلتتىق حولدينگىنىڭ باسقارما توراعاسى رۋسلان ەڭسەباەۆ, قاراعاندىلىق كاسىپكەر ليۋدميلا ۆايمەر, نازارباەۆ ۋنيۆەرسيتەتىنىڭ ستۋدەنتى, «كومپيۋتەرلى فيزيكا» حالىقارالىق وليمپياداسىنىڭ جەڭىمپازى ميرات جەكەەۆ, سولتۇستىكقازاقستاندىق كاسىپكەر يۆان زەنچەنكو, قۇرمانعازى اتىنداعى رەسپۋبليكالىق بايقاۋدىڭ گران-پري يەگەرى قايرات كاكىموۆ, پەداگوگيكا عىلىمدارىنىڭ ماگيسترى اسەل قوجاحمەتوۆا, قاراعاندى وبلىسىنداعى «اتامەكەن» كاسىپكەرلەر پالاتاسىنىڭ ديرەكتورى ەرنار قۇلپەيىسوۆ, قوستانايلىق جاس كاسىپكەرلەر نۇرسۇلتان قاسىموۆ پەن قادىرجان ماقانعالي, «قازاقستان-2050» جالپىۇلتتىق قوزعالىسى كەڭەسىنىڭ توراعاسى مۇحتار مانكەەۆ, «استانا Innovations» اكتسيونەرلىك قوعامىنىڭ باسقارما توراعاسى ولجاس سارتاەۆ جانە PhD, دوتسەنت جانار تايجانوۆا دا بۇگىن پارتيالىق بيلەتتەرىن الدى. جاڭادان قابىلدانعان نۇروتاندىقتارعا پارتيالىق بيلەتتەرىن سالتاناتتى جاعدايدا تاپسىرعان ماۋلەن اشىمباەۆ ولاردىڭ ەلباسىمىزدىڭ ساليقالى ساياساتىن جۇزەگە اسىرۋعا جانە پارتيانىڭ ودان ءارى دامىپ, نىعايۋىنا ۇلكەن ۇلەس قوساتىندارىنا سەنىم ءبىلدىردى.
– ءبىز پارتيا قاتارىنا ءوز ءىسىنىڭ شەبەرى, پاتريوت, ەلىمىزدى جاڭعىرتۋعا مۇددەلى, پارتيا كۇن ءتارتىبىن جۇزەگە اسىرۋعا قاتىسقىسى كەلەتىن ازاماتتاردى قابىلداۋىمىز كەرەك. بۇگىن پارتيا مۇشەسى اتانىپ وتىرعان جانداردى سولاردىڭ قاتارىندا دەپ ەسەپتەيمىن. ءبىز سىزدەردى ۇنەمى قولداپ وتىرامىز. الداعى ۋاقىتتا ەلىمىزدىڭ جارقىن بولاشاعى جولىندا بىرلەسىپ جەمىستى جۇمىس ىستەپ, بيىك بەلەستەردى باعىندىرامىز دەپ سەنەمىن, – دەدى پارتيا توراعاسىنىڭ ءبىرىنشى ورىنباسارى.
ءىس-شاراعا «نۇر وتاننىڭ» ساياسي ۇيىم رەتىندە قالىپتاسىپ, بۇگىنگىدەي بيىك دارەجەگە جەتۋىنە زور ەڭبەك سىڭىرگەن پارتيا ارداگەرلەرى مەن قۇرمەتتى مۇشەلەرى دە ارنايى شاقىرىلدى. ماۋلەن اشىمباەۆ ەل دامۋى جولىندا ەسەلى ەڭبەك ەتكەن جانداردى پارتيا توراعاسى جانە بارشا نۇروتاندىقتار اتىنان كاسىبي مەرەكەلەرىمەن قۇتتىقتاپ, العىس ءبىلدىردى.
ءىس-شارا سوڭىندا «نۇر وتان» پارتياسى توراعاسىنىڭ ءبىرىنشى ورىنباسارى بارشا قازاقستاندىقتاردى العىس ايتۋ كۇنىمەن قۇتتىقتاپ, بۇل كۇننىڭ پارتيامىزدىڭ باستى مەرەكەسىمەن قاتار كەلۋىندە ۇلكەن ءمان بار ەكەنىن ايتتى. سونداي-اق ول العىس ايتۋ كۇنى قازاقستان حالقىنىڭ ىنتىماعى مەن بىرلىگىن ارتتىراتىن اسا زور ماڭىزعا يە ەكەنىن دە ءسوز ەتتى.
جولدىباي بازار, «ەگەمەن قازاقستان»