پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا ينۆەستيتسيالار جانە دامۋ ءمينيسترى جەڭىس قاسىمبەك پەن سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى شەتەل ينۆەستيتسيالارىن تارتۋ ماسەلەلەرى جونىندە باياندادى.
جەڭىس قاسىمبەكتىڭ ايتۋىنشا, 2017 جىلدىڭ 9 ايىنىڭ قورىتىندىسى بويىنشا تىكەلەي شەتەلدىك ينۆەستيتسيالاردىڭ جالپى اعىنى $15,8 ملرد قۇرادى, بۇل 2016 جىلدىڭ وسى كەزەڭىمەن سالىستىرعاندا 5,3%-عا جوعارى كورسەتكىش.
قر ينۆەستيتسيالار جانە دامۋ مينيسترلىگى «Kazakh Invest» اق-مەن بىرلەسىپ, جالپى قۇنى $47,8 ملرد بولاتىن, ىسكە اسىرىلىپ جاتقان 145 ينۆەستيتسيالىق جوبانىڭ نەگىزگى ءتىزىمىن قالىپتاستىردى, وعان بارلىق ەلدىك ىنتىماقتاستىق باعدارلامالارى اياسىنداعى جوبالار, سونىڭ ىشىندە قازاقستاندىق–قىتاي, قازاقستاندىق–تۇرىك جانە باسقا دا ينۆەستيتسيالىق جوبالار كىردى.
قازاقستان–قىتاي ىنتىماقتاستىعى اياسىندا جالپى سوماسى $27,7 ملرد بولاتىن 51 جوبا جۇزەگە اسىرىلىپ جاتىر, ولاردىڭ شامامەن $140 ملن سوماسىنا 4 جوبا ەنگىزىلدى. بيىل $623 ملن ينۆەستيتسيالار كولەمى بار قىتاي كاپيتالىنىڭ قاتىسۋىمەن 5 جوبانىڭ قۇرىلىسى باستالادى. قازاقستان–تۇركيا ىنتىماقتاستىعى باعدارلاماسى («جاڭا سينەرگيا») 26 جوبادان تۇرادى. وسى جىلى جالپى سوماسى $15,5 ملن بولاتىن 2 جوبانى جۇزەگە اسىرۋ كوزدەلگەن. سونداي-اق, مەملەكەت باسشىسىنىڭ شەت ەلدەرگە ساپارى بارىسىندا قول قويىلعان كەلىسىمدەر اياسىندا جۇزەگە اسىرىلاتىن باسقا دا ينۆەستيتسيالىق جوبالار نەگىزگى تىزىمگە ەنگىزىلگەن.
بيىل جالپى 145 جوبانىڭ $1,6 ملرد سوماسىنا 15 جوباسىنىڭ قۇرىلىسىن باستاۋ جوسپارلانىپ وتىر. كەلەشەكتە حالىقارالىق قارجى ينستيتۋتتارىنىڭ قاراجاتتارى تارتىلاتىن جوبالار, ونىڭ ىشىندە ءمجا جوبالارى تىزىمگە قوسىلادى.
وسى جىلى قر ينۆەستيتسيالار جانە دامۋ مينيسترلىگى ۇلتتىق ينۆەستيتسيالىق ستراتەگيانى ىسكە اسىرۋدىڭ بەلسەندى كەزەڭىنە كوشەدى. 2018 جىلى 45 ءىس-شارانى ورىنداۋ كوزدەلگەن.
«ينۆەستيتسيالار تارتۋ ماسەلەسى – مينيسترلىكتىڭ باستى باسىمدىقتى جۇمىستارىنىڭ ءبىرى ءارى اردايىم تۇراقتى باقىلاۋداعى ءىس», — دەپ قورىتىندىلادى جەڭىس قاسىمبەك.
قر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردىنىڭ ايتۋىنشا, ەكونوميكانىڭ باسىم سالالارىنا شەتەل ينۆەستيتسيالارىن جانە يننوۆاتسيالىق تەحنولوگيالاردى تارتۋعا, سونداي-اق وتاندىق ەكسپورتتىق ونىمدەردى وتكىزۋگە جاردەمدەسۋ — قر سىرتقى ەكونوميكالىق ساياساتىنىڭ باستى ەلەمەنتى جانە ساۋدا مەن ەكونوميكالىق ديپلوماتيانىڭ نەگىزگى باسىمدىقتارىنىڭ ءبىرى.
مۇحتار تىلەۋبەردىنىڭ ايتۋىنشا, مەملەكەت باسشىسى ەكونوميكالىق ديپلوماتيانى دامىتۋعا ەرەكشە كوڭىل بولەدى. شەت ەلدەرگە رەسمي ساپارلاردىڭ بارلىعى دەرلىك ونىڭ شەتەلدىك بيزنەس قاۋىمداستىقتارمەن جەكە كەزدەسۋلەرىن كوزدەيدى, كوممەرتسيالىق كەلىسىمدەر جاسالادى. ماسەلەن, ەلباسىنىڭ 2016–2017 جج. ساپارلارى اياسىندا $6 ملرد استام سوماعا ينۆەستيتسيالىق جانە ساۋدا كەلىسىمدەرىنە قول قويىلدى. 2018 جىلعى قاڭتارداعى مەملەكەت باسشىسىنىڭ اقش-قا رەسمي ساپارىنىڭ قورىتىندىسى بويىنشا شامامەن $7 ملرد سوماسىن قۇرايتىن 27 قۇجاتقا قول قويىلدى.
ينۆەستيتسيالاردى سىرتقى دەڭگەيدە تارتۋ جونىندەگى جۇمىستى كۇشەيتۋ ماقساتىندا ينۆەستورلارمەن ماقساتتى جۇمىس ىستەۋ ءۇشىن 10 باسىمدىقتى ەلدەردە قر ينۆەستيتسيالار جانە دامۋ مينيسترلىگىنىڭ ينۆەستيتسيالىق كەڭەسشىلەر جەلىسىن ورىستەتۋ بويىنشا جۇمىستار جۇرگىزىلۋدە.
قر-نىڭ شەت ەلدەردەگى مەكەمەلەرى «Kazakh Invest» ۇك» اق-نىڭ شەت ەلدەردەگى وكىلدەرىمەن بىرلەسىپ شەتەلدىك ىسكەرلىك قاۋىمداستىقپەن ينۆەستيتسيالىق ىنتىماقتاستىقتى نىعايتۋ بويىنشا تۇراقتى ءىس-شارالار وتكىزۋدە.
«جالپى العاندا, ەل باسشىلىعى بەلگىلەگەن سىرتقى ەكونوميكالىق باعىتتار ءسىم قىزمەتىنىڭ بارلىق سپەكترى بويىنشا ايقىنداۋشى فاكتور رەتىندە قويىلعان. سىرتقى ساياسي ۆەدومستۆو, اسىرەسە ەكونوميكالىق ديپلوماتيانى ىنتالاندىرۋ, شەتەلدىك ينۆەستيتسيالاردى تارتۋدا ىشكى تەتىكتەر مەن سىرتقى ارىپتەستەر اراسىنداعى ماڭىزدى بايلانىستىرۋشى بۋىن رەتىندە تانىلادى. اتالعان كوپجوسپارلى جۇمىس الداعى ۋاقىتتا دا جالعاسىن تابادى», — دەپ تۇيىندەدى مۇحتار تىلەۋبەردى.