قازاقتان شىققان تۇڭعىش سپورت كوممەنتاتورى سۇلتانعالي قاراتاي ۇلى 82 جاسقا قاراعان شاعىندا ومىردەن ءوتتى. بۇل تۋرالى قازاقستان فۋتبول فەدەراتسياسى حابارلادى.
سۇلتانعالي قاراتاەۆ 1936 جىلى 23 ماۋسىمدا اقتوبە وبلىسىندا دۇنيەگە كەلگەن. 1970-80 جىلدارى قازاق راديوسىندا شولۋشى ءارى ديكتور بولىپ جۇمىس ىستەدى, سونداي-اق, تەلەۆيدەنيە سالاسىندا دا ءبىراز قىزمەت ەتكەن.
وتكەن عاسىردىڭ جەتپىسىنشى جىلدارى الماتىنىڭ ورتالىق ستاديونىنان تىكەلەي ەفيردى العاش رەت قازاقشا سايراتقان سۇلتانعالي قاراتاي ۇلى ەدى. ونىڭ سپورت رەپورتاجدارى ءالى كۇنگە دەيىن التىن قوردا ساقتاۋلى تۇر.
سۇلتانعالي قاراتاەۆتىڭ بۇگىندە قازاق كوممەنتاتورلىعىنا قاجەتتى كوپتەگەن تەرمين سوزدەردى ەنگىزگەنى بەلگىلى. ماسەلەن, «ايىپ الاڭى», «وڭ قاپتال», «سول قاپتال», «قوسالقى قۇرام» ت.ب. سوزدەر بار. بۇگىندە سول ءسوز تىركەستەرى سپورت جۋرناليستيكاسىندا ءجيى قولدانىلادى.
سۇلتانعالي قاراتاي ۇلىنىڭ سپورت جۋرناليستيكاسىنداعى ەڭبەگى ەرەن. سونىمەن قاتار, بىرنەشە تاريحي-تانىمدىق ماقالالارى مەن اۋدارما ەڭبەكتەرى دە جارىق كوردى.
سۇلتانعالي قاراتاي ۇلىنىڭ ەسىمى قازاق فۋتبولىنىڭ تاريحىندا ماڭگى قالماق.