جىل سايىن مەكتەپ بىتىرەر كەزدە ۇبت-عا قاتىسپايتىن ءوڭىر تۇلەكتەرى الىس جانە جاقىن شەتەلدەرگە وقۋعا اتتانادى. بىلتىر 11-سىنىپتى بىتىرەتىن وڭىردەگى 3738 وقۋشىنىڭ 2676-سى نەمەسە 71,5 پايىزى تەستىلەۋگە قاتىسقان.
نەگىزى, ۇبت-نى تەك قانا ەلىمىزدىڭ جوعارى وقۋ ورىندارىنا تۇسكىسى كەلەتىن تۇلەكتەر عانا تاپسىرۋعا مىندەتتى دەلىندى. اكىمدىك وتىرىسىندا اۋدان-قالا اكىمدەرىنە مەكتەپ تۇلەكتەرىن ۇبت-عا قاتىستىرۋ كەرەكتىگى ۇنەمى ەسكەرتىلەدى. مىسالى, ۋسپەن اۋدانىندا بىلتىر مەكتەپ بىتىرگەن تۇلەكتەردىڭ 52 پايىزى عانا ۇبت-عا قاتىسقان. اۋدان رەسەيمەن شەكارالاس, سوندىقتان, مەكتەپ بىتىرۋشىلەر سول جاققا جول تارتاتىن كورىنەدى. بيىل ءوڭىردىڭ ءبىلىم بەرۋ سالاسىنا بولىنگەن قاراجات 61,6 ملرد تەڭگەنى قۇرايدى. مەكتەپتەردە كەڭ جولاقتى ينتەرنەت جىلدامدىعىن ارتتىرۋعا 184,4 ميلليون تەڭگە قارجى بولىنگەن. وبلىستىق بيۋدجەتتەن 129,2 ميلليون تەڭگەگە كومپيۋتەرلىك تەحنيكا ساتىپ الۋ جوسپارلانۋدا.
بيىل وبلىس اكىمى بولات باقاۋوۆتىڭ شەشىمىمەن جەرگىلىكتى جوعارى وقۋ ورىندارىندا وقىپ, ستۋدەنت اتانعىسى كەلەتىن تۇلەكتەرگە 200 گرانت ءبولىندى. مەكتەپ تۇلەكتەرىن ۇبت-عا قاتىسۋعا ىنتالاندىرۋ ءۇشىن گرانتتار 65- پەداگوگيكالىق, 100 مەديتسينالىق جانە 35-ءى ينجەنەرلىك-تەحنيكالىق ماماندىقتارعا ارنالعان. وبلىستىق ءبىلىم باسقارماسىنىڭ مالىمەتىنشە, قازىر بۇل ماقسات ءۇشىن باسقارما تاراپىنان جۇمىستار جۇرگىزىۋلدە. گرانت تاعايىنداۋ كونكۋرسىندا الەۋمەتتىك جاعدايى تومەن جانە ارنايى توپتاعى جاستار, اۋىل مەكتەپتەرىن بىترىگەندەر, مۇمكىندىگى شەكتەۋلى جاستاردىڭ دا مۇددەسى ەسكەرىلگەن. قازىر باسقارمادا وڭىردەگى بالاباقشالارعا باراتىن بالالاردى قابىلداۋدى جەدەل تۇردە جۇزەگە اسىرۋ, 1-سىنىپقا كەلەتىن وقۋشىلاردى ەلەكتروندى جۇيە بويىنشا تىركەۋ, بىرىڭعاي اقپاراتتىق جۇيە, تسيفرلى ءبىلىم بەرۋ كونتەنتىن ەنگىزۋ سياقتى جاڭاشىلدىقتار جۇرگىزىلۋدە. سونىمەن بىرگە, مەملەكەتتىك قىزمەت بارىسىنداعى جۇمىستارداعى جەدەلدىك, جاڭارتىلعان ۇلتتىق ءبىلىم بەرۋ مالىمەتتەر بازاسىن جاساۋ, ۇستازداردىڭ بوس ورنى T-hunter مامانداندىرىلعان جۇيەسى, Smart – مەكتەپ, زاماناۋي ەلەكتروندى Teacher office, جەدەل اقپاراتتىق جۇيە جانە اكىمشىلىك-شارۋاشىلىق قىزمەتتى جوسپارلاۋ سياقتى 10 جوبا ىسكە اسىرىلادى.
ناتيجەسىندە, اتا-انالار ونلاين رەجيمىندە وتىنىشتەرىن جولداپ, بالالارىنىڭ وقۋ ۇلگەرىمىن باقىلاي الادى. مۇعالىمدەرگە ءاربىر سانات ءۇشىن مەملەكەت تاراپىنان ەڭبەكاقىنى ارتتىرۋ رەتىندە قارجىلاندىرۋ قاراستىرىلۋدا. ساناتقا لايىق بولۋ ءۇشىن اتەستاتتاۋدان وتكىزۋ بارىسىندا پورتفوليا تۇرىندە توم-توم قاعاز جينايتىن.
ەندى جاڭاشىلدىق تەحنيكا ناتيجەسىندە ۇستازدار جەكە كۋالىگىنىڭ كوشىرمەسى مەن ءوتىنىش بەرسە جەتكىلىكتى. اقپاراتتى ۇلتتىق مالىمەتتەر ءبىلىم بەرۋ بازاسىنان الادى. قاعازباستىلىقتان ارىلتادى. ۇلتتىق ءبىلىم بەرۋ مالىمەتتەر بازاسىندا ءاربىر مەكتەپ بويىنشا دەرەكتەر قورى جيناستىرىلادى. جوسپارلانعان جوبالاردى ءتيىستى تەحنيكالىق جابدىقتارسىز جۇزەگە اسىرۋ دا مۇمكىن ەمەس.
فاريدا بىقاي,
«ەگەمەن قازاقستان»
پاۆلودار