21-23 اقپاندا قازاقستان رەسپۋبليكاسى پارلامەنتىنىڭ دەلەگاتسياسى ەقىۇ پارلامەنتتىك اسسامبلەياسىنىڭ قىسقى سەسسياسىنا قاتىسۋ ءۇشىن ۆەنادا ساپارمەن بولدى. دەلەگاتسيا قۇرامىندا سەنات دەپۋتاتتارى دارحان كالەتاەۆ, دۋلات قۇسداۋلەتوۆ, تولەۋبەك مۇقاشەۆ, ميحايل بورتنيك جانە ءماجىلىس دەپۋتاتى قۇرالاي قاراكەن بولدى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
ساپار اياسىندا اۋستريا رەسپۋبليكاسى ۇلتتىق كەڭەسىنىڭ مۇشەسى رەينحولد لوپاتكا باستاعان پارلامەنت مۇشەلەرىمەن كەزدەسۋ بولدى. ەكى ەلدىڭ زاڭ شىعارۋ ورگاندارىنىڭ وكىلدەرى قازاقستان مەن اۋستريا ىنتىماقتاستىعىنىڭ كەلەشەگىن, ساۋدا-ەكونوميكالىق بايلانىستاردى ورىستەتۋ قاجەتتىگىن, ۆيزالىق ءتارتىپتى جەڭىلدەتۋ مۇمكىندىكتەرىن تالقىلادى.
22 اقپاندا ەقىۇ پا تۇراقتى كوميتەتى مەن جالپى كوميتەتتەرىنىڭ وتىرىستارى بولدى. سەناتورلار د. كالەتاەۆ پەن ت. مۇقاشەۆ ساياسي ماسەلەلەر جانە قاۋىپسىزدىك جونىندەگى جالپى كوميتەتتىڭ, د. قۇسداۋلەتوۆ دەموكراتيا, ادام قۇقىقتارى جانە گۋمانيتارلىق ماسەلەلەر جونىندەگى جالپى كوميتەتتىڭ جۇمىستارىنا قاتىستى. م. بورتنيك پەن ق.قاراكەن ەكونوميكالىق ماسەلەلەر, عىلىم, تەحنولوگيا جانە قورشاعان ورتا جونىندەگى جالپى كوميتەتتىڭ وتىرىستارىنا قاتىستى.
سەنات دەپۋتاتى د. كالەتاەۆ ەقىۇ پارلامەنتتىك اسسامبلەياسىنىڭ توراعاسى گەورگي تسەرەتەليمەن كەزدەستى. سەناتور ءبىزدىڭ ەلىمىزدە وتكەن كونستيتۋتسيالىق رەفورما تۋرالى جۇزدەسۋشىنى حاباردار ەتتى. تاراپتار قازاقستان پارلامەنتى مەن ەقىۇ پا-نىڭ بۇدان بىلايعى ىنتىماقتاستىعىنىڭ كەلەشەگى تۋرالى اڭگىمە ءوربىتتى. سونداي-اق ەىقۇ استانا ءسامميتىنىڭ مۇرالارىن ساقتاۋ جانە دامىتۋ, بۇۇ قاۋىپسىزدىك كەڭەسىندەگى قازاقستان رەسپۋبليكاسىنىڭ توراعالىق ەتۋىندەگى باسىمدىقتار تۋرالى دا ايتىلدى.