ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا وبلىستا جۇمىس ساپارىمەن بولىپ, بىرقاتار كەزدەسۋلەر وتكىزدى.
ۆەدومستۆو باسشىسى جەرگىلىكتى جەرلەردە «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى اياسىندا اتقارىلىپ جاتقان ءىس-شارالارمەن, جاڭا سيپاتتاعى اتاۋلى الەۋمەتتىك كومەكتى جۇزەگە اسىرۋدىڭ ءتيىمدى تەتىكتەرىمەن تانىستى. اۋدان اكىمدەرىنىڭ, جۇمىسپەن قامتۋ جانە الەۋمەتتىك باعدارلامالار ءبولىمى جەتەكشىلەرىنىڭ قاتىسۋىمەن وتكەن القالى باسقوسۋدا ءوزىن-ءوزى جۇمىسپەن قامتىعانداردى رەسىمدەۋ بويىنشا جول كارتاسىن ورىنداۋ بارىسى كەڭىنەن اڭگىمەلەندى.
مينيستر كىرىسپە سوزىندە ۇكىمەتتىڭ كەڭەيتىلگەن وتىرىسىندا ەلباسى ن. نازارباەۆ ءوزىن-ءوزى جۇمىسپەن قامتىپ جۇرگەن ازاماتتاردى زاڭداستىرىپ, رەسمي تۇردە تىركەۋگە تاپسىرما بەرگەنىن ايتا كەلىپ, بۇل باعىتتا قىرۋار شارۋالار اتقارىلىپ جاتقانىن جەتكىزدى. بىلتىر مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋگە دايىندىق كەزىندە تۇرعىنداردىڭ مارتەبەسى دەرەكتەر بازاسىندا تەكسەرىلگەن بولاتىن. ناتيجەسىندە 13,2 ميلليون ادامنىڭ الەۋمەتتىك مارتەبەسى انىقتالدى. ءۇي-ءۇيدى ارالاۋ كەزىندە ءوزىن-ءوزى جۇمىسپەن قامتىعان 3 ميلليون ادام رەسىمدەلسە, 130 مىڭدايى – سولتۇستىك قازاقستان وبلىسىنىڭ تۇرعىندارى. سالالىق ۆەدومستۆو جەتەكشىسى جينالعانداردىڭ نازارىن ماسەلەنىڭ ەڭ وزەكتى تۇستارىنا اۋدارىپ, ءوزىن-ءوزى جۇمىسپەن قامتىعانداردى ەكى ساناتقا ءبولۋ كەرەكتىگىن اتاپ كورسەتتى. ءبىرىنشى توپ – بەيرەسمي جۇمىسپەن قامتىلعاندار, ياعني ەشقانداي ەڭبەك كەلىسىمشارتىنسىز تىركەلمەگەن جەكە كاسىپكەرلەر مەن جالدامالى جۇمىسشىلار. قىزىلجار وڭىرىندە ولاردىڭ سانى 39 مىڭنان اسىپ جىعىلادى. بۇل ساناتاعىلاردى رەسىمدەۋ ورتالىق دەڭگەيدە جۇرگىزىلسە, جەڭىلدەتىلگەن سالىق پەن تىركەۋ, شاعىن نەسيە بەرۋ تەتىكتەرىن كەڭەيتۋ قامتاماسىز ەتىلەدى. ال ءوزىن-ءوزى جۇمىسپەن قامتىعان ەكىنشى توپ ءۇشىن جەرگىلىكتى دەڭگەيدە جۇمىسقا ورنالاسۋعا جاردەمدەسۋگە ناقتى شارالار قابىلداۋ قاجەت. بۇلاردىڭ سانى وبلىستا 36 مىڭ ادامعا جەدەعابىل. وسى رەتتە بيىل 27,5 مىڭ ءوزىن-ءوزى جۇمىسپەن قامتۋشى جانە جۇمىسسىز جۇرگەندەردى ناتيجەلى جۇمىسقا تارتۋدى قاداپ تاپسىردى.
وبلىس اكىمىنىڭ ورىنباسارى اسحات ساقىپكەرەەۆ ادامداردى جۇمىسپەن قامتاماسىز ەتۋدىڭ مەملەكەتتىك ساياساتىنىڭ ورىندالۋى جايلى باياندادى. بىلتىر 30714 ادام جۇمىسقا ورنالاسقان. جاڭادان قۇرىلعان جۇمىس ورىندارىنا 13492 ادام تارتىلعان. ەڭبەك نارىعىندا وڭ احۋال قالىپتاستىرۋ, كوشى-قون ۇدەرىسىن رەتتەۋ ماقساتىمەن جول كارتاسى ءتۇزىلىپ, 13,3 مىڭ جۇمىسسىز بەن 14,2 مىڭ ءوزىن-ءوزى قامتۋشىنى ەڭبەككە تارتۋ قاراستىرىلعان.
مينيستر حالىق تىعىز ورنالاسقان, جۇمىس كۇشى كوپ ايماقتاردان كوشىپ كەلگەن وتباسىلاردى ورنالاستىرۋ, الەۋمەتتىك كومەكتەر بەرۋ شارالارىن كەشەندى تۇردە جۇرگىزۋدى مىندەتتەدى. كۇنگەي جاقتاردان قونىس اۋدارعانداردى جۇمىسقا ورنالاستىرۋ جەتكىلىكسىز دەڭگەيدە. 2017 جىلى ەڭبەككە قابىلەتتى ادامداردىڭ جارتىسى عانا جۇمىسپەن قامتىلعان, دەدى م.ابىلقاسىموۆا. وسىعان بايلانىستى جۇمىسپەن قامتۋ جانە ەڭبەك اعىندارىن رەتتەۋدى ءتيىستى دارەجەدە جۇرگىزۋدى اتاپ كورسەتتى.
ءومىر ەسقالي,
"ەگەمەن قازاقستان"
سولتۇستىك قازاقستان وبلىسى