پحەنچحانداعى XXIII قىسقى وليمپيادا ويىندارىندا بياتلوننان بەلورۋسسيانىڭ ايەلدەر قۇراماسى جارىستىڭ جەڭىمپازى اتاندى. قۇراما ساپىندا قازاقستاننىڭ تۋماسى دينارا الىمبەكوۆا دا بار. وسىلايشا تۇڭعىش رەت قازاق قىزى قىسقى وليمپيادا ويىندارىنىڭ التىن مەدالىنە يە بولىپ وتىر.
بەلارۋس قىزدارى ەستافەتالىق جارىستا 1:03:54.5 ۋاقىتىمەن شۆەتسيا (كۇمىس, 1:04:17.2) مەن فرانتسيانى (قولا, 1:04:27.6) باسىپ وزىپ التىن مەدالدى جەڭىپ الدى. بەلارۋس اتىنان ونەر كورسەتكەن سپورتشىلار قاتارىندا قازاقستاندا تۋعان دينارا الىمبەكوۆا بولدى.
دينارا 1996 جىلعى 5 قاڭتاردا قاراعاندى وبلىسىنداعى اباي قالاسىندا دۇنيەگە كەلگەن. ءۇش جاسقا تولعاندا ونىڭ اكە-شەشەسى بەلارۋس ەلىنە تۇراقتى تۇرۋ ءۇشىن كوشىپ كەتكەن. العاشىندا ول شاڭعى سپورتىمەن اينالىسقان. 2008 جىلى بياتلونعا اۋىسادى. دينارا - جاسوسپىرىمدەر اراسىنداعى الەم بىرىنشىلىگىنىڭ جەڭىمپازى (2015 جىل, ايەلدەر ەستافەتاسى), IBU CUP كۇمىس جۇلدەگەرى (2016 جىل, سپرينت), يۋنيورلار اراسىنداعى جازعى الەم چەمپيوناتىنىڭ كۇمىس جانە قولا جۇلدەگەرى (2017 جىل, ارالاس ەستافەتا جانە سپرينت). ول سونداي-اق, بەلارۋس رەسپۋبليكاسىنىڭ سپورت شەبەرى اتاعىنا قول جەتكىزگەن.
قازىر دينارا بەلارۋس مەملەكەتتىك دەنە تاربيەسى ۋنيۆەرسيتەتىنىڭ شاڭعى سپورتى جانە بياتلون كافەدراسىندا ءبىلىم الىپ جاتىر.
ال بياتلون بويىنشا قازاقستاننىڭ ايەلدەر قۇراماسى گالينا ۆيشنەۆسكايا, داريا كليمينا (پاۆلودار), الينا رايكوۆا (اقمولا وبلىسى) جانە ولگا پولتورانينا (شقو) جالپى ەسەپتە 18 كوماندانىڭ ىشىندە 14-ءشى ورىندى يەلەندى (1: 14: 18.0).