بۇگىن ەلوردادا گرەك-ريم, ەركىن جانە ايەلدەر كۇرەسى فەدەراتسياسىنىڭ ۇيىمداستىرۋىمەن جاڭادان اشىلعان ايەلدەر كۇرەس اكادەمياسىنىڭ تانىستىرىلۋ ءراسىمى ءوتتى.
بۇعان دەيىن ءدال وسىنداي ورتالىق تەك الماتىدا عانا بولاتىن جانە ول ەركىن كۇرەس شەبەرلەرىنە ارنالعان. ال بۇرىمدى سپورتشىلاردىڭ اكادەمياسى العاش رەت قۇرىلىپ وتىر. ياعني ەلوردانىڭ ورتالىعىندا ورنالاسقان سپورتتىق كەشەن ەندى ۇلتتىق قۇراما مۇشەلەرىنە جىل ون ەكى اي قىزمەت كورسەتەدى. وقۋ-جاتتىعۋ جيىندارىنا ىڭعايلى بولۋ ءۇشىن بۇندا جەكە جاتتىعۋ زالى, ءوز قوناق ءۇيى جانە اسحاناسى بار. ال ۇلكەن زالعا توسەلگەن بوز كىلەمدە نەگىزگى جاتتىعۋ جۇمىستارى جۇرەدى. قازىردىڭ وزىندە ەلىمىزدىڭ تۇكپىر-تۇكپىرىنەن كەلگەن سپورتشىلار بۇندا ازيا چەمپيوناتى الدىنداعى سوڭعى دايىندىقتارىن پىسىقتاپ جاتىر. قۇرلىقتىق دودا 27 اقپان مەن 4 ناۋرىز ارالىعىندا بىشكەكتە وتەدى.
ايەلدەر كۇرەسىنەن ۇلتتىق قۇرامانىڭ باس باپكەرى قايرات ساعاديەۆ بۇل اكادەميانىڭ ۇلتتىق قۇرامادان تىس قالعان قوسالقى قۇرامنىڭ بالۋاندارى ءۇشىن قولايلى دەيدى. «بۇل اكادەميانىڭ ماقساتى – الدىمىزدا وتەتىن ازيا ويىندارى, الەم چەمپيوناتتارى جانە 2020 جىلى توكيودا وتەتىن وليمپيادا ويىندارىنا ۇلتتىق قۇرامادان باسقا قوسالقى كوماندانىڭ شەبەرلىكتەرىن دامىتۋ, جارىستاردان كەلگەننەن كەيىن كوماندامەن اناليز جاسايمىز. تاماقتانۋعا نەمەسە باسقا دا قاجەتتى زاتتارعا جاعدايلار جاسالعان», دەيدى ول.
اكادەميانىڭ اشىلۋ راسىمىنە گرەك-ريم, ەركىن جانە ايەلدەر كۇرەسى فەدەراتسياسىنىڭ ايەلدەر كۇرەسى بويىنشا ۆيتسە-پرەزيدەنت گۋزەل مانيۋروۆا, قازاقستان قۇراماسىنىڭ باس باپكەرى قايرات ساعاديەۆ, بوكستان لوندون وليمپياداسىنىڭ چەمپيونى سەرىك ساپيەۆ پەن جەڭىل اتلەتيكادان سيدنەي وليمپياداسىنىڭ جەڭىمپازى ولگا شيشيگينا قاتىسىپ, سوڭىنان ەرگەن سپورتشىلارعا ساتتىلىك تىلەدى.