استانادا «ەندى ەشقاشان: اشارشىلىق, حولوكوست, كامبودجا, قوجالى, رۋاندا» تاقىرىبىندا فوتوكورمە ءوتتى. كورمەنى ازەربايجان رەسپۋبليكاسىنىڭ قازاقستانداعى ەلشىلىگى مەن تۇركى مادەنيەتى مەن مۇراسى قورى بىرلەسىپ ۇيىمداستىردى.
كورمە تۇركى اكادەمياسى حالىقارالىق ۇيىمى (TWESCO), ءبىلىم جانە عىلىم مينيسترلىگىنىڭ مەملەكەتتىك تاريحى ينستيتۋتى مەن ءيزرالدىڭ قازاقستانداعى ەلشىلىگىنىڭ قولداۋىمەن ءوتتى. ازەربايجان ەلشىلىگىندە وتكەن جيىندا قازاقستاندا تىركەلگەن ديپلوماتيالىق كورپۋس وكىلدەرى مەن مەملەكەت جانە قوعام قايراتكەرلەرى قاتىستى.
كورمەنىڭ اشىلۋ سالتاناتىندا ازەربايجاننىڭ قازاقستانداعى ەلشىسى راشاد ماممادوۆ, تۇركى مادەنيەتى مەن مۇراسى قورىنىڭ پرەزيدەنتى گۇناي ەفەنديەۆا, مەملەكەت تاريحى ينستيتۋتى ديرەكتورىنىڭ ورىنباسارى امانگەلدى قاشقىمباەۆ پەن استانا قالاسىنىڭ باس ءراۆۆينى شمۋەل كارناۋح ءسوز سويلەپ, ادامزات تاريحىنداعى جانتۇرشىگەرلىك جاعدايلاردىڭ ەندى قايتالانباۋىن تىلەدى.
كورمەدە جوعارىدا اتالعان قاندى وقيعالاردىڭ سيرەك كەزدەسەتىن تاريحي فوتولارى ۇسىنىلىپ, قوجالى گەنوتسيدىنە ارنالعان ءاننىڭ تۇساۋى كەسىلدى.