استانا قالاسىنىڭ 20 جىلدىعى مەن قىزىلوردا قالاسىنىڭ 200 جىلدىعىنا وراي سىر وڭىرىندە رەسپۋبليكالىق ايتىس ءوتتى. قازاقستاننىڭ 9 قالاسىنان اقىندار كەلىپ, «استانا – بيىك ءتورىم, قىزىلوردا – تۋعان جەرىم!» تاقىرىبىن ارقاۋ ەتىپ, دوداعا ءتۇستى.
ايتىستىڭ اشىلۋ سالتاناتىنا وبلىس اكىمى قاتىسىپ, اقىندارعا ساتتىلىك تىلەدى.
«ەدىلدەن ايىرىلعان قازاق ەسىلدەن دە ايىرىلارداي بولىپ تۇرعان ەلەڭ-الاڭ كەزەڭدە ەلباسىنىڭ باتىلدىعىمەن, كەمەڭگەر شەشىمىمەن ەۋرازيا تورىندە, سارىارقانىڭ توسىندە زاماناۋي استانا بوي كوتەردى. ەلوردانى الماتىدان اقمولاعا اۋىستىرۋ - بۇل قازاقتىڭ ءوز بيلىگى ءوز قولىنا تيگەن سوڭ ۇلتتىڭ بولمىس-ءبىتىمىن ساقتاپ, بولاشاعىن باياندى ەتۋ ماقساتىندا «ون ويلانىپ, توعىز تولعانىپ» بارىپ, قابىلدانعان تاريحي شەشىم بولدى. مىڭجىلدىقتار توعىسىنداعى مۇنداي باتىل قادام قازىر قاي قىرىنان الىپ قاراساق تا دۇرىستىعىن ۋاقىت دالەلدەدى. قۇلا دالادان قۇبىلاعا بەت تۇزەگەن, ءسانى مەن سالتاناتى جاراسقان, ساۋلەتى تالايلاردى تامساندىرعان ەلوردامىز - تاۋەلسىزدىگىمىزدىڭ تىرەگىنە, ەكونوميكامىزدىڭ جۇرەگىنە, الەم ەلدەرى باس قوساتىن دوستىق مەكەنىنە اينالدى. اتا-بابانىڭ اتتىڭ جالىندا, تۇيەنىڭ قومىندا ءجۇرىپ قورعاعان كەڭ بايتاق جەرىمىزدى ساقتاپ قالۋداعى ەلباسى نۇرسۇلتان ءابىش ۇلى نازارباەۆتىڭ ەرلىگىن قازاق قوعامى ەندى عانا تۇسىنە باستاعانداي», - دەدى ايماق باسشىسى.
شاراعا ارنايى ماڭعىستاۋدان كەلگەن اقىن مەلس قوسىمباەۆ سىر ەلىنە ارناۋىن ايتتى.
بۇگىنگى بايقاۋعا استانا, الماتى, اقتوبە, تاراز, اتىراۋ, قاراعاندى, سەمەي, پاۆلودار جانە قىزىلوردا وبلىسىنىڭ اتاقتى ايتىس شەبەرلەرى قاتىستى.
باس جۇلدەنى قىزىلوردالىق اقىن مەيىربەك سۇلتانحان جەڭىپ الدى. ءبىرىنشى ورىن قاراعاندىلىق ماقسات اقانوۆقا بۇيىرسا, الماتىلىق رۇستەم قايىرتاي ەكىنشى ورىن يەلەندى. سونداي-اق, سەمەيلىك اسەم ەرەجەقىزى, پاۆلودارلىق قايرات نۇرقانات جانە جەرلەسىمىز مۇحتار نيازوۆ ءۇشىنشى ورىن الدى. قالعان قاتىسۋشىلار ىنتالاندىرۋ سىيلىقتارمەن ماراپاتتالدى.
اتاپ وتەيىك, «سىر ەلى – جىر ەلىندە» بۇگىنگى كۇنگە دەيىن جىرشى-جىراۋ, اقىن-ايتىسكەرلەردىڭ ونەرى كەڭ كولەمدە ناسيحاتتالىپ كەلەدى. 2016 جىلى قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي حالىقارالىق ايتىس پەن ءداستۇرلى مۋزىكالىق ونەر فەستيۆالى ۇيىمداستىرىلسا, وتكەن جىلى جەلتوقسان ايىندا «پاراساتتى پوەزيا» حالىقارالىق شىعارماشىلىق كەش ءوتتى.