كوزىمىز انىق جەتكەن باستى ءبىر ماسەلە اقتوبە وبلىسىنىڭ اكىمى بەردىبەك ساپارباەۆتىڭ قورىتىندى ەسەبى وتەتىن كۇنگە دەيىن بىرقاتار اۋىلدىق وكرۋگتەر اكىمدەرىنىڭ جانە بارلىق اۋدان اكىمدەرى مەن باسقارما باسشىلارىنىڭ ەسەبىنە قاتىساتىنى, بۇعان ۋاقىت تابا بىلەتىنى. جاي قاتىسىپ قويماي جەرگىلىكتى جەردە تۋىنداعان ماسەلەنىڭ ءتۇيىنىن سول ساتتە شەشۋگە ۇمتىلاتىنىن تۇيسىندىك. ال ۋاقىتتى قاجەت ەتەتىن ماسەلەلەر بولسا ونىڭ ورىندالاتىن كۇنىن بەلگىلەيدى. شالعايداعى اۋىل تۇرعىندارىنىڭ تاراپىنان قويىلعان سۇراقتارعا جاۋاپ قايتارىپ, مۇڭ-مۇقتاجدارىنا ورتاقتاسادى.
جىلدىق ەسەبىنە وسىنداي جان-جاقتىلىق پەن كەڭ تىنىستىلىق بەرۋى, ءارى حالىقتىڭ قالىڭ ورتاسىندا ۇدايى بولۋى ارقىلى ءوڭىر باسشىسى پرەزيدەنتتىڭ اتقارۋشى ورگانداردىڭ تۇرعىندارمەن ەسەپتى كەزدەسۋ وتكىزۋ جونىندەگى جارلىعىن ورىنداۋ كەزىندە ونى تاعى ءبىر باسقاشا قىرىنان تولىقتىرا تۇسكەندەي كورىنەدى. ياعني مۇنىڭ ءوزى وبلىس اكىمى ءوزىنىڭ قورىتىندى ەسەبى وتەتىن كۇنگە دەيىن ءوزى باسقارىپ وتىرعان ءوڭىر قالاي تىنىستاپ, قانداي كۇي كەشىپ وتىرعانىن كوڭىلىنە ءتۇيىپ كەلەدى دەگەن ويدى بىلدىرەدى. اگلومەراتسيالىق ايماق باسشىسى بيىلعى قورىتىندى ەسەبىندە. ەڭ باستىسى, كوپشىلىككە ايتىلعان ماسەلە تۇجىرىمدى ءارى ناقتى تۇردە كورىنىس تاپتى. وتكەن جىلدىڭ قورىتىندىسى بويىنشا ءوڭىر ەكونوميكاسىنىڭ ءوسىمى 5 پايىزدى قۇراپتى. بۇل ەلىمىزدەگى كەز كەلگەن ءوڭىردىڭ ەنشىسىنە تيە قويمايتىن ەكونوميكالىق ءوسىم. دۇنيەدە نە نارسەنىڭ دە قادىر-قاسيەتى مەن ارتىقشىلىعىن سالىستىرمالى تۇردە باعامداۋعا ءارى سەزىنۋگە بولادى. وسىنىڭ الدىنداعى 2016 جىلى بۇل كورسەتكىش نەبارى ءبىر پايىزدى عانا قۇراعان بولسا 5 پايىزدىق ءوسىم قارقىندى ءارى سەرپىندى دامۋدىڭ ناقتى بەلگىسى بولماق.
مىنە, تۇرعىندار الدىندا بەرگەن ەسەبى كەزىندە وبلىس اكىمى ب.ساپارباەۆ ءوز ءسوزىن وسى ارنادان ساباقتادى. بۇل وبلىس ەكونوميكاسىنىڭ نەگىزگى سالالارىن – ونەركاسىپ پەن ساۋدانى, اۋىل شارۋاشىلىعى مەن قۇرىلىستى, سونداي-اق شاعىن جانە ورتا بيزنەستى دامىتۋ مەن جاڭا تەحنولوگيالاردى ەنگىزۋ ەسەبىنەن قامتاماسىز ەتىلدى, دەدى بۇدان ءارى ءوڭىر باسشىسى. اقتوبە – رەسپۋبليكامىزداعى ونەركاسىبى دامىعان وڭىرلەردىڭ ءبىرى. وتكەن جىلى وبلىس ەكونوميكاسىنىڭ باسىم باعىتىن قۇرايتىن وڭدەۋشى كاسىپورىندار العان بيىكتەر دە وبلىس باسشىسى ەسەبىنەن تىس قالعان جوق. مۇندا دا جاقسى ءوسىم بار. ونىڭ ءوزى سالاداعى وڭدەۋشى ورىنداردى دامىتۋ ەسەبىنەن قامتاماسىز ەتىلگەن. ياعني كاسىپورىندارداعى ءوسىم 7,9 پايىزعا ءوسىپ, جالپى تابىس 527 ميلليارد تەڭگەنى قۇراعان.
– ءوڭىر باسشىسى ءوز ەسەبىندە بيىلعى 2018 جىل وبلىستا ەكونوميكالىق سەرپىلىس جىلى بولىپ جاريالانعانىن اتاپ كورسەتتى. سوعاي ساي جاڭعىرتۋدىڭ بەس ۆەكتورى بەلگىلەنگەن. اتاپ ايتقاندا, بۇلار الەۋمەتتىك باعدار, ءومىر ساپاسىن جاقسارتۋ, ازىق-ت ۇلىك قاۋىپسىزدىگى, يندۋستريالىق دامۋ جانە كەدەرگىسىز بيزنەس بولىپ تابىلادى. سونداي-اق ايماقتا الەۋمەتتىك باعدار اياسىندا «باقىتتى بالالىق شاق» جىلى اتالىپ وتىلمەك. سوعان سايكەس 150-دەن تومەن ەمەس سپورتتىق جانە ويىن الاڭدارىنىڭ قۇرىلىسى بوي كوتەرمەك. جەتىم بالالار مەن اتا-اناسىنىڭ قامقورلىعىنسىز قالعان بالالاردى تۇرعىن ۇيمەن قامتاماسىز ەتۋ شارالارى بەلگىلەنبەك. سونىمەن بىرگە سال اۋرۋىنا شالدىققان بالالار مەن اۋتيزم بالالارعا ارنالعان ورتالىق تۇرعىزىلماق. «اسەم» جىل بويى وقۋ-ساۋىقتىرۋ لاگەرىنىڭ قۇرىلىسى دا وسى قاتاردا تۇر.
كەز كەلگەن ءوڭىر ەكونوميكاسىنىڭ دامۋ دەڭگەيىنە قوزعاۋ سالاتىن باستى يندەكس – ينۆەستيتسيالىق قاراجات. ءوڭىردىڭ ينۆەستيتسيالىق تارتىمدىلىعىن, بۇعان قوسا وبلىستىڭ قاراجات قۇيۋعا ىڭعايلى ەكەنىن, شەتەلدىك ينۆەستورلاردىڭ سانا-سەزىمىنە سىڭىرە بىلگەن ايماق باسشىسىنىڭ ىلكىمدى ءىسىنىڭ ارقاسىندا وتكەن جىلى وبلىس ەكونوميكاسىنا 437 ميلليارد تەڭگە ينۆەستيتسيا قۇيىلىپتى. بۇل 2016 جىلعى دەڭگەيدەن 63 ميلليارد تەڭگەگە ارتىق. تارتىلعان ينۆەستيتسيانىڭ ەداۋىر بولىگى جەكە سەكتور سۋبەكتىلەرىنىڭ قارجىلارى بولىپ تابىلادى. ال ينۆەستيتسيا تارتۋداعى بيىلعى مەجەمىز – 510 ميلليارد تەڭگە. بۇل وبلىس ەكونوميكاسىن ودان ءارى دامىتۋعا قوسىلاتىن قوماقتى قاراجات بولماق, دەپ ءتۇيىن جاسادى وسى تۇستا ب.ساپارباەۆ.
ءوڭىر باسشىسىنىڭ تۇرعىندارمەن كەزدەسۋى اياقتالعاننان كەيىن كەزدەسۋگە قاتىسۋشىلاردىڭ ءبىر توبى گازەت تىلشىسىنە ءوز وي-پىكىرلەرىن بىلايشا جەتكىزدى.
كەڭەس ءبىرمانوۆ,
اقتوبە وبلىستىق ارداگەرلەر كەڭەسىنىڭ توراعاسى:
– بەردىبەك ساپارباەۆ ءوزىنىڭ بۇگىنگى ەسەبىندە وبلىستا وتكەن جىلى 800 مىڭ شارشى مەترگە تاياۋ تۇرعىن ءۇي پايدالانۋعا بەرىلگەنىن اتاپ ءوتتى. بۇل وڭىردە بۇرىن-سوڭدى بولىپ كورمەگەن بيىك ناتيجە. وتكەن جىلدان بەرى اقتوبەگە «نۇرلى جەر» باعدارلاماسى بويىنشا تۇرعىزىلعان از قاباتتى ۇيلەر تۇرعىزۋ تاجىريبەسىن ۇيرەنۋگە دەلەگاتسيالار ءۇزىلىسسىز كەلۋدە. بۇل وتە جاقسى نىشان. ءۇي تۇرعىزۋ ىسىندە وبلىستاعى وڭ ناتيجەلەر جەتكىلىكتى. بۇل ىستە ءوڭىر باسشىسىنىڭ ەڭبەگى مول.
ايگۇل دۇيسەنوۆا,
اقتوبە وبلىسىنداعى ۇكىمەتتىك ەمەس ۇيىمدار قاۋىمداستىعىنىڭ پرەزيدەنتى:
– ءوڭىر باسشىسى مەملەكەت-جەكەمەنشىك ارىپتەستىگى سەرپىندى دامۋدىڭ ءبىر جولى ەكەنىن تۇيىندەپ بەردى. بۇل شىندىق. سونىڭ ارقاسىندا وبلىس ورتالىعى كۇننەن-كۇنگە كوركەيىپ كەلەدى. بۇگىنگى ەسەپتە ۇكىمەتتىك ەمەس ۇيىمداردىڭ ءوڭىردى دامىتۋعا قوسقان ۇلەسى جونىندە جاقسى ايتىلدى. وسى تۇرعىداعى مەملەكەتتىك-الەۋمەتتىك تاپسىرىستار كولەمى ءوسىپ كەلەدى. مۇنداي بىرلەسكەن جوبالاردىڭ كەلەشەگى كەمەل دەپ بىلەمىن.
جانسۇلۋ اتامۇراتوۆا,
قوبدا اۋداندىق ءماسليحاتىنىڭ دەپۋتاتى, گيمنازيا ديرەكتورى:
– مەن بۇگىنگى ەسەپتەگى ءبىلىم بەرۋ سالاسىنا قاتىستى ايتىلعان تالداۋلار مەن ساراپتامالارعا ايرىقشا كوڭىل ءبولدىم. سونىڭ ىشىندە وبلىستا ءۇش اۋىسىمداعى جانە اپاتتى جاعدايداعى مەكتەپتەردى جويۋ جونىندە قابىلدانعان شەشىمدەر سۇيسىندىرەدى. ءۇش اۋىسىمداعى تىعىز ءارى كۇردەلى وقۋ ۇدەرىسىن باستان كەشىپ جاڭا ۇلگىدەگى عيماراتقا قونىس اۋدارعان ءبىلىم ورداسىنىڭ ءبىرى – ءبىزدىڭ قوبدا اۋداندىق گيمنازياسى. ءوڭىر باسشىسىنىڭ ايتۋىنشا, بيىل وبلىستا 15-تەن استام جاڭا مەكتەپ عيماراتى پايدالانۋعا بەرىلمەك. بۇدان اسقان قۋانىش بار ما؟
سابىتاي جەكسەنباەۆ,
بايعانين اۋدانىنداعى, «قوستەمىر» شارۋا قوجالىعىنىڭ جەتەكشىسى:
– 3-4 ونىمدىلىگى از مال ۇستاعاننان گورى, ءبىر اسىل تۇقىمدى مال وسىرگەن الدەقايدا ءتيىمدى, دەدى وبلىس اكىمى. بۇل پىكىرگە تولىقتاي قوسىلامىن. بيىل وڭىردە مال تۇقىمىن اسىلداندىرۋ جونىندە ىرگەلى شارالار قولعا الىناتىنى, وعان بولىنەتىن سۋبسيديا مولشەرى وسەتىنى مەنى قاتتى قۋانتتى. بۇل – مال سانىن ودان ءارى كوبەيتۋگە ۇلكەن سەپتىگىن تيگىزەتىن مەملەكەتتىك قولداۋدىڭ كورىنىسى.
مەيىرحان اقداۋلەت ۇلى,
اقىن-پۋبليتسيست, قازاقستان جازۋشىلار وداعىنىڭ مۇشەسى:
– اقىنى اكىمىن ىزدەگەن ەلدىڭ ماڭدايىنىڭ سورى بەس ەلى. اكىمى اقىنىن ىزدەگەن ەل باقىتتى ەل دەگەن ءتامسىل بار. وسى ورايدا بۇگىنگى ەسەپتە ايتىلعانداي وتكەن جىلى وبلىس ورتالىعىندا قايتالانباس ۇلگىدەگى رۋحاني حرامدار, ونەر جانە مادەنيەت وردالارىنىڭ بوي تۇزەۋى اكىمى اقىنى مەن ەل-جۇرتىن ىزدەگەندەي اسەر قالدىرادى. بۇل وتە ادەمى ۇيلەسىم, كەرەمەت گارمونيا. رۋحاني كەم-كەتىكتى تۇگەلدەي بىلگەن باسشىنىڭ ءباسى مەن مارتەبەسى قاشان دا جوعارى.
مەرەكە نۇرتازين,
«№4 اقتوبە قالالىق ەمحاناسى» مقك-نىڭ ديرەكتورى:
– وڭىرىمىزدە قۇرىلعان مەديتسينالىق كلاستەردىڭ رەسپۋبليكادا بالاماسى جوق ەكەنى ءبارىمىز ءۇشىن ماقتانىش. تىڭنان تۇرەن سالۋ وڭاي ءىس ەمەس. بۇعان ءوڭىر باسشىسىنىڭ تىكەلەي قولداۋى بولماعان جاعدايدا مۇنداي جەتىستىككە جەتەر مە ەدىك, جەتپەس پە ەدىك؟! بەردىبەك ماشبەك ۇلى اتاپ كورسەتكەندەي, وبلىستا جۇزەگە اسىرىلىپ جاتقان مەملەكەت-جەكەمەنشىك ارىپتەستىگىنىڭ نەگىزگى ۇلەسى دەنساۋلىق ساقتاۋ سالاسىنا تيەسىلى ەكەنى – حالىق دەنساۋلىعىنا دەگەن جاناشىرلىقتىڭ ءبىر كورىنىسى.
تەمىر قۇسايىن, «ەگەمەن قازاقستان»
اقتوبە وبلىسى