...ريزاشىلىعىن بىلدىرەدى
مۇعالىمدەردىڭ جاعدايى جاقسارماق
مەملەكەت باسشىسى قازاقستان حالقىنا ارنالعان جولداۋىندا دەنساۋلىق ساقتاۋ سالاسىنداعى قىزمەتكەرلەردىڭ جالاقىسى 28 پايىزعا دەيىن, ءبىلىم بەرۋ سالاسى قىزمەتكەرلەرىنىڭ جالاقىسى 29 پايىزعا دەيىن, الەۋمەتتىك قورعاۋ سالاسى قىزمەتكەرلەرىنىڭ جالاقىسى 40 پايىزعا دەيىن, «ب» كورپۋسىنداعى مەملەكەتتىك قىزمەتشىلەردىڭ جالاقىسى 30 پايىزعا, ستيپەنديالار 25 پايىزعا وسكەنىن ايتتى. «داعدارىس زامانى. ايتسە دە, الەمنىڭ ساناۋلى عانا ەلدەرى الەۋمەتتىك سالاعا جۇمسايتىن شىعىندارىن وسىلاي ارتتىرا الدى. رەسپۋبليكالىق بيۋدجەتتىڭ الەۋمەتتىك سالاعا بولىنگەن شىعىنى 2018 جىلى 12 پايىزعا ءوسىپ, 4,1 تريلليون تەڭگەدەن استى. الەۋمەتتىك تولەمدەردى, سونىڭ ىشىندە زەينەتاقىنى ءوسىرۋ 3 ميلليوننان استام قازاقستاندىقتىڭ تابىسىن كوبەيتەدى. 2018 جىلدىڭ 1 قاڭتارىنان باستاپ ىنتىماقتى زەينەتاقى 8 پايىزعا ارتتى», دەدى ەلباسى.
مەملەكەت باسشىسى مۇعالىم مارتەبەسىن ارتتىرۋ ماقساتىمەن ءبىلىم بەرۋدىڭ جاڭارتىلعان مازمۇنىنا كوشكەن ۇستازداردىڭ لاۋازىمدىق جالاقىسىن 2018 جىلى 30 پايىزعا كوبەيتۋدى تاپسىردى. «جاڭارتىلعان مازمۇن دەگەنىمىز – حالىقارالىق ستاندارتتارعا ساي كەلەتىن جانە نازارباەۆ زياتكەرلىك مەكتەپتەرىندە بەيىمدەلۋدەن وتكەن زاماناۋي وقۋ باعدارلامالارى. بۇلار ءبىزدىڭ بالالارىمىزعا قاجەتتى فۋنكتسيالىق ساۋاتتىلىق پەن سىني تۇرعىدان ويلاۋ قابىلەتىن دارىتادى», دەدى نۇرسۇلتان نازارباەۆ. ياعني بيىل كاتەگوريالار اراسىنداعى الشاقتىق ايقىندالىپ, مۇعالىمدەر ءۇشىن بىلىكتىلىك دەڭگەيىن ەسكەرەتىن كاتەگوريالاردىڭ جاڭا كەستەسى ەنگىزىلەدى.
جالپى, پرەزيدەنتىمىز ءبىلىم سالاسىنا قاشاندا ەرەكشە نازار اۋدارىپ كەلەدى. وتكەن 2017 جىلى وڭتۇستىك قازاقستان وبلىسىندا 34 مەكتەپتىڭ پايدالانۋعا بەرىلۋى ءسوزىمىزدىڭ دالەلى.
روزا پاك, №45 مەكتەپ-گيمنازيانىڭ ديرەكتورى
شىمكەنت
...كومەك كۇتەدى
اۋىز سۋ ماسەلەسى قاشان شەشىلەدى؟
ءبىزدىڭ قاراسۋ اۋىلى اق تارىنىڭ اتاسى شىعاناق بەرسيەۆتىڭ كىندىك قانى تامعان جەر. وسى توپىراقتا ول وتىزىنشى جىلداردىڭ اياعى مەن قىرقىنشى جىلداردىڭ العاشقى جارتىسىندا تارى وسىرۋدەن الەمدىك رەكورد جاساعان. ايتايىن دەگەنىم, اتا داڭقى مەن اتاعى شىققان اۋىلدا اۋىزسۋ ماسەلەسى كوپتەن بەرى شەشىمىن تاپپاي كەلەدى. راس, اۋىلىمىزدىڭ اۋماعى جەراستى سۋ كوزدەرىنە باي. ءارى سۋ تىم تەرەڭدە دە ەمەس, قۇدىق قازساڭ ون شاقتى كۇرەك ويىمنان كەيىن مولتىلدەپ شىعا كەلەدى.
اتتەڭ شىركىن, نە كەرەك, ءبىر وكىنىشتىسى جەردىڭ سۋى اششى. مالعا ىشۋگە جاراعانىمەن, ونى تۇرعىندار شاي ءىشىپ, اس قامداۋعا پايدالانا المايدى. سوندىقتان دا اۋىل ادامدارىنىڭ كوپشىلىگى ونى قاراسۋدان 11 شاقىرىم قاشىقتىقتا ورنالاسقان قاراتال دەپ اتالعان ەلدى مەكەننەن تاسىپ ىشەدى. ءبىرى بيدون, ءبىرى بوشكە دەگەندەي, اركىم ونى قولدارىندا بار ىدىسپەن تاسىمالداپ جەتكىزەدى. مۇنداي جاعدايدا سانيتارلىق تازالىق تۋرالى ءسوز قوزعاۋدىڭ ءوزى ارتىق. بۇگىنگى كۇنى قاراسۋلىقتاردىڭ وي-تىلەگى بىرەۋ عانا – اۋىلداستارىمىز اۋىزسۋعا قارىق بولاتىن كۇن قاشان كەلەر ەكەن دەپ كۇتىپ ءجۇر.
سانسىزباي مولداعۇلوۆ
اقتوبە وبلىسى, ويىل اۋدانى, قاراسۋ اۋىلى
...جاقسىلىعىن جەتكىزەدى
بالالار – شەكسىز الەمدە
وڭتۇستىك قازاقستان وبلىسىندا «رۋحاني جاڭعىرۋ» باعدارلاماسى اياسىندا وبلىستىق ءبىلىم باسقارماسىنىڭ ۇيىمداستىرۋىمەن رەسپۋبليكالىق «قازاقستان بالالارى – شەكسىز الەمدە!» شىعارماشىلىق كينوفەستيۆالى ۇيىمداستىرىلدى. باسقوسۋ – قازاق كينو ونەرىنىڭ دامۋىن جانە شوقتىعىنىڭ بيىكتىگىن ايعاقتايتىن, جاسوسپىرىمدەر اراسىنداعى ۇزدىك كلاسسيكالىق ونەر ۇلگىلەرىن, دارىندىلاردى انىقتاۋ, ونداعى جاسوسپىرىمدەردىڭ وزىندىك ورنى مەن الار ۇلەسىنەن حاباردار ەتەتىن رەسپۋبليكالىق دەڭگەيدەگى وقۋشىلار اراسىندا تۇڭعىش رەت ۇيىمداستىرىلعان ءىس-شارا.
شىمكەنت قالاسىنداعى «جاستار رەسۋرستىق ورتالىعىندا» دۇركىرەپ وتكەن شاراعا استانا, الماتى قالالارى مەن ەلىمىزدىڭ بارلىق وڭىرلەرىنەن بالالار جينالدى.
كينوفەستيۆال بارىسىندا قاتىسۋشى جاسوسپىرىمدەردىڭ «دەرەكتى كينو», «ويىندى كينو», «STOP-MOTION-ۆيدەو», «الەۋمەتتىك جارناما, الەۋمەتتىك روليك», «انيماتسيا», «ۆيدەو-ارت» جانە «مۋزىكالىق فيلم» نوميناتسيالارى بويىنشا شىعارماشىلىعىنا ساراپتاما جاساۋ ءۇشىن كينو سالاسىنىڭ كاسىبي ماماندارى بەلسەندىلىكپەن جۇمىس جاساپ, قورىتىندىسى بويىنشا جۇلدەگەرلەر ماراپاتتالدى. جۇلدەلى ورىن يەلەرىنە ءار اتالىم بويىنشا وبلىستىق ءبىلىم باسقارماسىنىڭ ءى, ءىى جانە ءىىى دارەجەلى ديپلومدارى مەن ارنايى سىيلىقتار تاپسىرىلدى. ال بارلىق اتالىمدار بويىنشا جالپى كوماندالىق ەسەپتە ءى ورىنعا – استانا قالاسى, ءىى ورىنعا – وڭتۇستىك قازاقستان جانە ءىىى ورىنعا الماتى قالاسى قول جەتكىزدى.
ب.ەشەنقۇلوۆ, مەكتەپ وليمپيادالارىن وتكىزۋ ورتالىعىنىڭ ديرەكتورى
وڭتۇستىك قازاقستان وبلىسى
…العىس ايتادى
جاڭا مەكتەپكە ەل ريزا
بىلتىر الماتى وبلىسىنىڭ ەڭبەكشىقازاق اۋدانىنا قاراستى ەسىك قالاسىندا 600 ورىندىق جاڭا مەكتەپ پايدالانۋعا بەرىلگەن بولاتىن. شاراعا وبلىس اكىمى اماندىق باتالوۆ قاتىسىپ, وقۋشىلاردى, ولاردىڭ اتا-انالارى مەن ۇستازداردى قۋانىشتى ساتتەرىمەن قۇتتىقتاعان ەدى.
ەسكە سالار بولساق, قۇرىلىس جۇمىستارىن «جوندەۋ قۇرىلىس» جشس جۇرگىزدى. جوبانىڭ جالپى سمەتالىق قۇنى 1,4 ملرد تەڭگەنى قۇراپتى. مەكتەپ ەكى قاباتتى, 600 وقۋشىعا ارنالعان. مەكتەپتە قاجەتتى جابدىقتارمەن قامتاماسىز ەتىلگەن فيزيكا, حيميا كابينەتتەرى, اكت جانە سپورت زالدارى, اسحانا, مۋلتيمەديالى-لينگافوندىق جانە باسقا دا كابينەتتەر قاراستىرىلعان. بالالاردىڭ ءبىلىم الۋىنا وسىنداي جاعداي جاسالىنىپ وتىرىلعانىنا ەل-جۇرت اركەز العىستارىن بىلدىرۋدە.
سامال قابىشەۆا
الماتى وبلىسى
...اسەرىمەن بولىسەدى
ۇيلەنىپ, وتباسىن قۇرعان ءجون ەكەن
ۇيلەنىپ, تۇرمىس قۇرعان ءجون ەكەن... تاپقانىڭدى ۇيىڭە تاسيسىڭ. بويداق كەزدە اقشا تۇسسە كافە, رەستوران, تۋعان كۇن دەپ قۇرتساڭ, ۇيلەنگەن سوڭ ءبىر تيىن شىعىن شىعارماۋعا تىرىساسىڭ. ءتىپتى جولدان ينە تاۋىپ الساڭ دا, ءارى اۋدارىپ, بەرى اۋدارىپ قاراپ, ساباقتاۋلى جىبىمەن تۇسپەگەن ەكەن-اۋ دەپ قالتاڭا سۇڭگىتەسىڭ. قىزدار دا سولاي. بويداق كەزدە تۋش, لاك, ماكياج, شاش جاساتۋ دەپ اقشانى سۋداي شاشادى. اپتاسىنا التى رەت سۇلۋلىق سالونى, ديسكوتەكا. تۇسكە دەيىن ءۇش كويلەك, تۇستەن كەيىن ءتورت كويلەك اۋىستىرىپ شىعىنعا باتادى. تۇرمىسقا شىقتى – راحات. اقشا, اس-سۋ, كيىم كەشەك, ءجۇرىپ تۇرۋ اقىسىن قامتاماسىز ەتەتىن ادامى بار. مەيرام سايىن قۇشاق-قۇشاق گۇل, سىيلىق. ەكەۋى عانا بىلەتىن قۇپيا نارسەلەر بولادى اراسىندا. ەركەكتەردى ايتسايشى, سولاردىكى راحات. ىستىق تاماق, مۇرنىڭ تەرلەپ وتىرىپ تاماقتاناسىڭ... ايتارىم – ەرتەرەك جۇپتارىڭدى تاۋىپ وتاۋ تىگىڭدەر. ۇرىس-كەرىس دەگەن بەكەر اڭگىمە. ءۇي بولعان سوڭ ىدىس-اياق سىڭعىرلاپ تۇرادى. سىڭعىرلاسا سىڭعىرلاي بەرسىن, ساقىرلاپ كەتپەسە بولدى.
مۇحيت تاستان