توقسان اۋىز ءسوزدىڭ توبىقتاي ءتۇيىنى, كوپتەن كۇتكەن تاريحي ماڭىزعا يە وقيعا – ەلباسى قازاق ءتىلىنىڭ جاڭا ءالىپبيى تۋرالى جارلىعىنا قول قويدى.
بۇكىل قوعام بولىپ اتسالىسقان, ەل بولىپ بەلسەندىلىك تانىتقان جاڭا ءالىپبي نۇسقاسىن حالىق جاقسى قابىلدادى دەپ ويلايمىن. ولاي دەيتىنىم, بۇل ماسەلە ءتۇرلى دەڭگەيدە تالاي تالقىدان ءوتىپ, ماماندار مەن قوعامنىڭ پىكىرى ەسكەرىلىپ, جەتىلدىرىلگەن, كوڭىلگە قونىمدى, قولدانىسقا وتە ىڭعايلى نۇسقا بولىپ بەكىتىلدى.
ەلىمىزدىڭ ءاربىر ازاماتى لاتىن قارپىنە كوشۋ – بۇل الەمدىك وركەنيەتكە قول جەتكىزۋدىڭ باستى جولى ەكەنىن ءبىلىپ, وعان بۇگىننەن باستاپ بەيىمدەلە بەرۋى ءتيىس.
لاتىن گرافيكاسىنا كوشۋ – ۇلتىمىز ءۇشىن جاسالعان ماڭىزدى قادامداردىڭ ءبىرى. ەل تاريحىنا كوز جۇگىرتسەك, ءبىرىنشى بايلىق قاشاندا – جەر, ەكىنشىسى – ءتىل, ءۇشىنشىسى – مەملەكەت جانە ونىڭ تاريحى بولۋى كەرەكتىگى ايقىندالادى.
كەزىندە الاش قايراتكەرلەرى دە لاتىن ءالىپبيىن كەڭىنەن قولدانعان. الاش ارداقتىسى احمەت بايتۇرسىن ۇلى ايتىپ كەتكەندەي, «ۇلتتىڭ ساقتالۋىنا دا, جوعالۋىنا دا سەبەپ بولاتىن نارسەنىڭ ەڭ قۋاتتىسى – ءتىلى». سوندىقتان لاتىن قارپى بىزگە جات دۇنيە ەمەس.
وركەنيەتتى الەم لاتىن جازۋىن ەرتەدەن پايدالانعانىن بىلەمىز. بۇگىندە لاتىن قارپى دۇنيە ءجۇزىنىڭ جۇزدەن اسا ەلدەرىندە قولدانىسقا ەنسە كەرەك. ماسەلەن تۇركيا, ازەربايجان, وزبەكستان, تۇرىكمەنستان ەلدەرى بۇل الىپبيگە الدەقاشان كوشىپ ۇلگەرگەن.
لاتىن قارپىنە ءوتۋ – ورىس ءتىلدى نەمەسە وزگە ءتىلدى ازاماتتارىمىزدىڭ مۇددەسىنە قايشى ەمەس. كەرىسىنشە, قولدانىستاعى ورىس ءتىلى ءوز قىزمەتىن جالعاستىرا بەرمەك. ال ماماندار لاتىن قارپىنە كوشۋ ارقىلى قازاق ءتىلىن جاس بۋىنعا, شەتەلدىكتەرگە ۇيرەنۋ الدەقايدا جەڭىلدەيتىنىن العا تارتۋدا.
شارتاراپقا زور سىلكىنىس تۋعىزعان ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق سيپاتتاعى ماقالاسىندا «قوعامدىق سانا جاڭعىرۋدىڭ نەگىزگى قاعيدالارىن قالىپتاستىرۋدى عانا ەمەس, سونىمەن بىرگە, ءبىزدىڭ زامان سىناعىنا لايىقتى توتەپ بەرۋىمىزگە قاجەتتى ناقتى جوبالاردى جۇزەگە اسىرۋىمىزدى دا تالاپ ەتەدى. وسىعان بايلانىستى مەن الداعى جىلداردا مىقتاپ قولعا الۋ قاجەت بولاتىن بىرنەشە جوبانى ۇسىنامىن. بىرىنشىدەن, قازاق ءتىلىن بىرتىندەپ لاتىن الىپبيىنە كوشىرۋ جۇمىستارىن باستاۋىمىز كەرەك...», – دەلىنگەن.
ەلباسى اتاپ وتكەندەي قازاق ءتىلىن لاتىن قارپىنە كوشىرۋ ماسەلەسىنىڭ ءمانى تەرەڭدە جاتىر. سەبەبى بۇل جەردە گرافيكا ماسەلەسى عانا ەمەس, قوعامدىق سانا مەن مادەنيەتتى قايتا جاڭعىرتۋ ماسەلەسى تۇر. حالقىمىزدىڭ باسىم كوپشىلىگى قوس ءتىلدى, ال سوڭعى كەزدەگى اعىلشىن تىلىنە دەگەن سۇرانىستىڭ ارتقانىن ەسكەرەر بولساق لاتىن تىلىنە كوشۋ قوعامدا ايتارلىقتاي پروبلەما تۋىنداتپاۋى ءتيىس.
لاتىن قارپىنە كوشۋ ارقىلى كوش ىلگەرى جۇرەتىنى انىق. ماسەلەن: ءتىلدىڭ تابيعي تازالىعى ساقتالىپ, قازاق ءتىلىن وقىتۋ بارىسىندا ارتىق تاڭبا مەن ەملەگە قاتىستى ەرەجەلەر قىسقارىپ, قازاق قاۋىمى دۇنيەجۇزىلىك عالامتور جەلىسىنە ەركىن ەنە الادى. ەڭ باستىسى, لاتىن قارپىنە كوشۋ ارقىلى قازاق ءتىلىنىڭ مارتەبەسى ارتىپ, حالىقارالىق دەڭگەيگە شىعۋىنا مۇمكىندىك تۋماق. سونىمەن قاتار لاتىن قارپىن قولداناتىن تۇركى الەمىمەن رۋحاني, مادەني, ەكونوميكالىق جان-جاقتى بايلانىستىڭ ارتۋىنا دا مۇمكىندىك زور بولادى دەپ كۇتىلۋدە.
بۇل ءىرى باستاما – تاۋەلسىز مەملەكەت پەن قازاق قوعامىنىڭ دارا تاڭداۋى. ەلىمىز بۇعان دايىن دەسەم ارتىق ايتپاعان بولارمىن. جاڭا قارىپكە كوشۋ ۇلكەن نارتاۋەكەلدەن تۋعان شەشىم. قورىتا كەلگەندە, قازاق حالقىنىڭ ىلگەرىرەكتە قولدانعان الىپبيىنە قايتا ورالۋى, ۇلتتىق سانامىزدىڭ قايتا جاڭعىرۋىنا جول اشادى دەمەكپىن.
ايدار ءابۋوۆ, حالىقارالىق مادەنيەت جانە ءدىن ورتالىعىنىڭ ديرەكتورى