پورتۋگاليادا كوپتەگەن الەمنىڭ دامىعان ەلدەرىندەگىدەي ءنومىرى ءبىرىنشى سپورت فۋتبول ەكەنى داۋسىز.
فۋتبولمەن تىنىستاعان ليسسابون داۋىل الدىنداعى تىمىرسىقتاي, تىنشىپ, اتلانت تەڭىزىنىڭ تولقىنىمەن تەربەلىپ تۇر. انە-مىنە, كەرىلە ۇيقىسىنان ويانىپ, ۇلكەن فۋتبولدىڭ ءدۇبىرلى تويىن باستاپ كەتكىسى كەلەتىندەي. ەسكى شاھاردىڭ ءاربىر بۇرىشىنان باس كوتەرىپ, سىبدىر-سىبدىر فۋتبول جايلى كۇبىرلەسكەن فاناتتار بۇگىن ءتۇس اۋا ءبىر كوشەنىڭ بويىنا جان-جاقتان اعىلا تۇسەدى. توقسان سالا توعىسقان تارباعاتايدىڭ كولىندەي بارلىعى جىلجي وتىرىپ, «جوزە الۆەلادە» ستاديونىنا بارىپ قۇيىلادى. بۇل جولعى جيىنعا باستى سەبەپكەر قازاق كومانداسى – «استانا».
قوناقۇيدىڭ الدىنداعى پەدرو «استانا» دەگەندە قولىنداعى اق قولعابىن شەشتى. «وتكەن جولعى ويىندا ابدەن زارە-قۇتىمىزدى قاشىردىڭىزدار. «استانا» وسال ەمەس ەكەن», دەيدى جۇرەك تۇسىن ۇستاپ. وسىنداي سوزدەرگە كوڭىل سەمىرتىپ, ەل فۋتبولىنىڭ اتاعى شالعايعا شاۋىپتى عوي دەيمىز ىشتەي. وتكەن عاسىردىڭ بەل ورتاسىندا اتاعى دۇركىرەگەن «سپورتينگتىڭ» ىرگەتاسى مىندا عانا قالانعان «جوزە الۆالادە» دەگەن ستاديونى بار. وسى ستاديوننىڭ اشىلۋىنىڭ ءوزى قىزىقتى. العاشقى ماتچ 2003 جىلى 6 تامىز كۇنى «سپورتينگ» پەن «مانچەستەر يۋنايتەد» اراسىندا وتەدى. سول ويىندا «قىزىل سويقانداردىڭ» اتى اڭىزعا اينالعان جارتىلاي قورعاۋشىسى رايان گيگگز كريشتيانۋ رونالدۋدى كورىپ, ويىن بىتىسىمەن سەر الەكسكە مىنا جاس پەرىنى جىلدام ساتىپ الىڭىز دەپ اقىل ايتادى. ءوزىنىڭ ەڭ سەنىمدى, ءارى اقىلدى ويىنشىسىنىڭ ايتقانىن بۇلجىتپاعان الەكس باپكەر ارتىنان قالماي ءجۇرىپ رونالدۋدى ساتىپ الادى. ودان كەيىن بۇل ستاديون ەۋرو-2014 جارىسىنىڭ 4 ويىنىن قابىلداعان. سوسىن رەسەيلىك تسسكا تۋرا وسى ستاديوندا الاڭ يەلەرىن جەڭىپ ۋەفا كۋبوگىنىڭ يەگەرى اتانعان. ول 2005 جىلى بولعان وقيعا.
جالپى «استانانىڭ» «سپورتينگپەن» تەرەزەسى تەڭ تايتالاساتىن ويى بولعانى جاسىرىن ەمەس. العاشقى ويىندا باسىمدىلىق الساق, كىم بىلەدى دەپ كوزدى تارس جۇمىپ كوز قورقاق قول باتىر دەپ الاڭعا شىققان. الايدا, 48 بەن 55-مينۋتتار ارالىعىندا برۋنو فەرناندەس (پەنالتيدەن), جەلسون مارتينش, سەيدۋ دۋمبيا ۇشەۋى قازاقستاندىق ۇجىمعا وتە اۋىر ءۇش سوققى بەردى. 7-مينۋتتىڭ ىشىندە جەرلەستەرىمىز جەر سيپاپ قالدى. 1:0 ەسەبىمەن ۇتىپ تۇرىپ, اياق استى كەلگەن گولداردان ەسەڭگىرەدى. فۋتبولشىلار تۇگىل تريبۋناداعى جانكۇيەردىڭ سالىسى سۋعا كەتتى. باسى ءتاتتى بولعانىمەن, اياعى وسىلايشا قاتتى بولادى دەپ كىم ويلاعان؟ ءتىپتى, فاناتتار سەكتورىنان ەكىنشى گولدى تالاپ ەتىپ, «سپورتينگتىڭ» سىلەكپەسىن شىعارۋدى تىلەگەندەر دە از ەمەس ەدى. ءوز الاڭىندا كوپ جەڭىلە بەرمەيتىن كلۋبىمىز مۇنداي اۋىر حالگە تۇسەدى دەپ ارينە كوبىسى ويلاي قويعان جوق. دەگەنمەن, دەڭگەيدىڭ اتى دەڭگەي. «يۋۆەنتۋسپەن» تەڭ ءتۇسىپ جۇرگەن چەمپيوندار ليگاسىنىڭ كومانداسى ەۋروپا ليگاسىنا كەلگەندە اۆتوماتتى تۇردە ءتۋرنيردىڭ فاۆوريتىنە اينالماي ما؟ قۇرامىندا وسىدان ەكى جىل بۇرىن ەۋروپا چەمپيونى بولعان فۋتبولشىلار جۇرسە, قالعاندارى ءوز مەملەكەتتەرىنىڭ ۇلتتىق قۇرامالارىندا وينايتىن سەن تۇر مەن اتايىندار بولسا, نە شارا, نە داۋا! ونىڭ ۇستىنە «استانا» قورعاۋشىسى يۋري لوگۆينەنكو ەكى سارى قاعاز الىپ, الاڭنان قۋىلدى. 10 اداممەن پورتۋگاليانىڭ اتاقتى كومانداسىنا قايبىر سەس كورسەتەسىز.
تىنعان ويىن تىندى. سىرت الاڭداعى ماتچتان دا ءۇمىت از. بىراق, بۇل تەك «استاناعا» عانا ەمەس, بارشا قازاقستاندىق كلۋبتارعا ساباق بولۋى كەرەك. «سپورتينگ» سەكىلدى باي تاريحىڭ بولماسا دا, ءوز اكادەمياڭدى قۇرىپ, جاستارىڭدى تاربيەلەپ سودان ءنار الاتىن دەڭگەيگە جەتۋ. ۇنەمى, سىرتتان كەلگەن لەگيونەردىڭ اياعىنا قاراپ وتىرا بەرۋ ءوزىڭ وتىرعان اعاشتىڭ بۇتاعىن كەسكەنىمەن تەڭ. كريشتيانۋ رونالدۋ, لۋيش ناني سەكىلدى فۋتبولشىلاردى سىيلاعان «سپورتينگ» اكادەمياسى بۇكىل كلۋبقا تابىس ءتۇسىرىپ, قانشاما پورتۋگال بالالارىنا ۇلكەن سپورتقا ەسىك اشىپ وتىر. دىڭگەگى مىقتى كوماندانىڭ دەڭگەيى دە بىزدەن جوعارى بولاتىن سودان دا شىعار.
جاۋاپتى ويىننىڭ جالعىز عانا كوتەرەر جۇگى بار. «استانا» كەلەسى كەزەڭگە ءوتۋدى ويلامايدى. تەك ابىرويمەن ونەر كورسەتىپ, قازاق فۋتبولىنىڭ جالاۋىن جەلبىرەتۋ. ويىن الدىنداعى ءباسپاسوز ءماسليحاتىندا باس باپكەرىمىز ستانيمير ستويلوۆتىڭ دا ايتقانى وسى بولدى. راسىمەن دە از ۋاقىتتىڭ ىشىندە «استانا» كارى قۇرلىققا جاپ-جاس بولىپ اتىن جايىپ ۇلگەردى-اۋ!
ەرمۇحامەد ماۋلەن, «ەگەمەن قازاقستان» – ليسسابوننان (پورتۋگاليا)