كەشە مەملەكەتتىك حاتشى قانات ساۋداباەۆتىڭ توراعالىق ەتۋىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى كۇرەس ماسەلەلەرى جونىندەگى كوميسسيانىڭ كەزەكتى ءماجىلىسى بولىپ ءوتتى. كوميسسيا ءماجىلىسىن اشقان قانات ساۋداباەۆ ءۇستىمىزدەگى جىلعى بۇل وتىرىس سوڭعى ءماجىلىس ەكەنىن, بىراق سونىمەن قاتار ول ەل تاۋەلسىزدىگىنىڭ 20 جىلدىعى قارساڭىندا ءوتىپ وتىرعاندىعىمەن جانە مەملەكەت باسشىسىنىڭ سىندارلى ساياساتىنىڭ ارقاسىندا بارلىق سالادا ۇلكەن جەتىستىككە جەتكەندىگىمىزبەن ماڭىزدى ەكەندىگىن اتاپ ءوتتى. سونىڭ ىشىندە سىبايلاس جەمقورلىققا قارسى كۇرەستە دە بىرقاتار ايتارلىقتاي شارالار قامتىلدى. ءتاۋەلسىزدىكتىڭ 20 جىلدىعى قارساڭىندا ەلىمىز بۇرىنعى كەڭەستەر وداعى رەسپۋبليكالارىنىڭ ىشىندە بارلىق جەتىستىكتەر بويىنشا ەداۋىر العا سۋىرىلىپ شىعىپ, اسىرەسە, سوڭعى كەزدەرى حالىقارالىق قاۋىمداستىق اراسىندا ءوزىنىڭ بەدەلىن ايرىقشا تانىتا ءبىلدى.
«ءبىزدىڭ ەلىمىز تاۋەلسىزدىگىمىزدىڭ 20 جىلدىعىن الەۋمەتتىك-ەكونوميكالىق, قوعامدىق-ساياسي جانە مادەني-گۋمانيتارلىق دامۋ بارىسىنداعى تاماشا جەتىستىكتەرمەن قارسى الىپ وتىر. ازاماتتاردىڭ قۇقىقتارى, زاڭنىڭ ءپارمەندىلىگى جانە ءتارتىپ ماسەلەسى تۇراقتى ءارى جۇيەلى تۇردە قامتاماسىز ەتىلەدى. مەملەكەتتىك ساتىپ الۋدىڭ زاڭدىلىقتارىن ساقتاپ, ونىڭ ايقىندىلىعىن قامتاماسىز ەتۋ بۇل سالاداعى ماعىزدى باعىتتاردىڭ ءبىرى بولىپ سانالادى. سوندىقتان دا بۇل ماسەلە بۇگىنگى ءماجىلىستىڭ كۇن تارتىبىنە ەنگىزىلىپ وتىر», – دەدى مەملەكەتتىك حاتشى.
راسىندا, بۇل ورايدا ايتار بولساق, تاۋەلسىزدىگىمىزدىڭ 20 جىلدىعى قارساڭىنداعى جەتىستىگىمىز قازاقستانداعى ۇلتتىق تۇراقتىلىق, توزىمدىلىك پەن ەتنوسارالىق دوستىق ەل دامۋىنىڭ ءبىردەن-ءبىر كورسەتكىشى بولىپ تابىلادى. اتا-بابا ارمان ەتكەن تاۋەلسىزدىگىمىزدىڭ باياندى بولۋى دا ۇلتارالىق سەنىمدىلىك پەن دوستىق قارىم-قاتىناستىڭ بەرىك تامىر جايۋى. تاۋەلسىزدىك جىلدارىندا اتقارىلعان قىرۋار جۇمىستىڭ ارقاسىندا ءمادەني, ەكونوميكالىق, قۇقىق, دەنساۋلىق, اۋىلشارۋاشىلىق جانە ت.ب. قاي سالادا بولماسىن حالىقتىڭ الەۋمەتتىك جاعدايى ارتىپ, تۇرمىسى تۇزەلدى. بۇعان قۇقىقتىق شارالاردىڭ كومەگى وراسان بولدى. سونىڭ ءبىرى – پرەزيدەنت جانىنداعى سىبايلاس جەمقورلىققا قارسى كۇرەس ماسەلەلەرى جونىندەگى كوميسسيانىڭ كەزەكتى ماجىلىسىندە كوتەرىلگەن مەملەكەتتىك ساتىپ الۋدىڭ زاڭدىلىقتارىن ساقتاۋ ماسەلەسىنىڭ دە اسەرى مول ەكەندىگى ءسوزسىز. وسىعان وراي كوميسسيا ماجىلىسىندە باس پروكۋرور ا.داۋىلباەۆتىڭ, ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ توراعاسى ق.قوجامجاروۆتىڭ, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى ءو.وكسىكباەۆتىڭ ەسەپتەرى تىڭدالدى.
الەكساندر تاسبولاتوۆ.