مەملەكەتتىك قىزمەتتەردى وڭتايلاندىرۋ, ولاردى ەلەكتروندى فورماتقا كوشىرۋدى دامىتا ءتۇسۋ ماقساتىندا جۇرتشىلىققا ىڭعايلى بىرقاتار جوبالار ىسكە اسىرىلۋدا.
ەندىگىدە جاس انالارعا حالىققا قىزمەت كورسەتۋ ورتالىقتارىنا بارۋدىڭ قاجەتى جوق, بارلىعى اۆتوماتيزاتسيا ارقىلى ىسكە اسادى. بۇل تۋرالى قر اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ماجىلىسىندە پرەمەر-ءمينيستردىڭ ورىنباسارى اسقار جۇماعاليەۆ ءمالىم ەتتى.
«بالا تۋعا بايلانىستى كورسەتىلەتىن مەملەكەتتىك قىزمەتتەردى ۇيدەن شىقپاي-اق راسىمدەي بەرۋگە بولادى. سوندىقتان ءموبيلدى ۇكىمەت سۇراقتارىن ۇيلەستىرۋ مەن مەملەكەتتىك ۇيىمداردىڭ دەرەكقورى ءۇشىن كومپوزيتتىك جانە پرواكتيۆتى قىزمەتتەردى بىرىكتىرۋدى جۇرگىزۋ قاجەت. بۇل رەتتە بىزدە ىشكى قور بار. بارلىق تەحنيكالىق جانە نورماتيۆتىك سۇراقتاردى ءموبيلدى ۇكىمەت پەن مەملەكەتتىك قىزمەتتەر ارقىلى رەتتەۋدى سۇرايمىن», دەيدى پرەمەر-ءمينيستردىڭ ورىنباسارى اسقار جۇماعاليەۆ.
ودان بولەك, حالىققا قىزمەت كورسەتۋ ورتالىقتارىنداعى كەزەكتى ازايتۋ ماقساتىندا بىرقاتار شەشىمدەر قابىلدانعانىنا توقتالعان ول, اۆتوكولىكتەردى راسىمدەۋگە قاتىستى قۇجات جۇمىستارىن ينتەرنەت ارقىلى رەتتەۋگە بولاتىنىن اتادى. «ياعني, ءسىز ينتەرنەت ارقىلى تاپسىرىس بەرىپ, قاجەتتى قۇجاتتى «قازپوشتا» ارقىلى الا الاسىز. بۇل قادام كولىك جۇرگىزۋشىلەرىنە ۇنايدى دەگەن سەنىمدەمىن», - دەيدى اسقار جۇماعاليەۆ.
ايا ءومىرتاي,
سۋرەتكە تۇسىرگەن ەرلان وماروۆ,
«ەگەمەن قازاقستان»