ەلباسى نۇرسۇلتان نازارباەۆتىڭ بيۋدجەتتەن ەڭبەكاقى الاتىن ازاماتتىق قىزمەتكەرلەردىڭ ەڭبەكاقىسىن ارتتىرۋ جونىندەگى تاپسىرماسىن ءتيىمدى تۇردە ورىنداۋ ءىس جۇزىندە قيىن بولىپ وتىر. ويتكەنى وسى قىزمەتكەرلەردىڭ ەڭبەكاقىسىن رەتتەۋ جونىندەگى قازىرگى قولدانىلىپ جۇرگەن ءادىسنامانىڭ ءوزى ەسكىرگەن. ونى 2008-2010 جىلدارداعى الەمدىك قارجى داعدارىسى كەزىنەن باستاپ قولدانىپ كەلەمىز.
سول داعدارىس جىلدارىندا ەشقانداي عىلىمي, ەكونوميكالىق نەگىزى جوق «بازالىق جالاقى» دەگەن تۇسىنىك ەنگىزدىك. بۇل داعدارىس جىلدارىندا ەڭبەكاقىنى رەتتەۋگە ءبىرشاما پايداسىن تيگىزدى. الايدا كەيىنگى, ەكونوميكالىق جاعداي تۇراقتانعان ۋاقىتتاردا ونى وزگەرتۋ كەرەك ەدى, بىراق ول 2011 جىلدان بەرى ءبىر ورىننان مىزعىماي, ءالى سول قالپىندا تۇر. ارادا 7 جىل ءوتتى, وسى ۋاقىتتا بۇل كورسەتكىشتىڭ قايتا قارالماعانى وكىنىشتى. وسىعان ەشكىم كوڭىل بولمەي وتىر.
سوندىقتان مەن ۇكىمەت باسشىسى باقىتجان ساعىنتاەۆتىڭ اتىنا دەپۋتاتتىق ساۋال جولداپ, وسى «بازالىق جالاقى» دەگەن كورسەتكىشتى زامان اعىمىنا سايكەس قايتا قاراۋ كەرەك ەكەنىن ۇسىندىم. ونىڭ ورنىنا زاڭمەن بەكىتىلەتىن ەڭ تومەنگى ەڭبەكاقى مولشەرىن قولدانۋ كەرەك. سوندا ءتۇرلى قوسىمشالار, سونىڭ ىشىندە ەڭبەك ءوتىلى, بىلىكتىلىك كوەففيتسيەنتى جانە ت.ب. قوسىلىپ, بيۋدجەتتەن ەڭبەكاقى الاتىن ازاماتتىق قىزمەتكەرلەر لايىقتى جالاقىعا قول جەتكىزەتىن بولادى. وسىنداي جاعدايدا ازاماتتىق قىزمەتكەرلەردىڭ ەڭبەكاقىعا قاتىستى نارازىلىقتارى دا ازايار ەدى.
مەنىڭ دەپۋتاتتىق ساۋالىمدى ارىپتەسىم, قارجى جانە بيۋدجەت كوميتەتىنىڭ حاتشىسى تاتيانا ياكوۆلەۆا دا قولداپ, ءوزىنىڭ قولىن قويدى. ۇكىمەت باسشىسى ءبىزدىڭ ۇسىنىسىمىزدى اياقسىز قالدىرماي, داعدارىس جىلدارىندا امالسىز قولعا الىنعان بازالىق جالاقىنى قايتا قارايتىن شىعار دەگەن ۇمىتتەمىز.
گۇلجان قاراقۇسوۆا,
ءماجىلىستىڭ قارجى جانە بيۋدجەت كوميتەتىنىڭ ءتورايىمى