2014 جىلى قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىندا سوت تورەلىگى سەكتورىن ينستيتۋتتىق نىعايتۋ جوباسىن قارجىلاندىرۋعا قارىز ءبولۋ تۋرالى كەلىسىم جاسالعان بولاتىن. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ادىلەت مينيسترلىگى تىركەۋ قىزمەتى جانە زاڭ قىزمەتتەرىن ۇيىمداستىرۋ دەپارتامەنتىنىڭ ديرەكتورى باقتىگۇل اتاعازيەۆا مالىمدەدى.
«ول كەلىسىم سول جىلى قازاقستان رەسپۋبليكاسىنىڭ زاڭىنا سايكەس راتيفيكاتسيالاندى. وسى كەلىسىم اياسىندا ادىلەت مينيسترلىگى مەن حالىقارالىق قايتا قۇرۋ جانە دامۋ بانكى بىرلەسىپ تىركەۋ قىزمەتىنە, مەملەكەت كەپىلدىك بەرگەن زاڭ كومەگىنە جانە نوتارياتتىق قىزمەتكە قاتىستى زاڭنامانى رەفورمالاۋ بويىنشا جوبانى ىسكە قوستى. جوبا قۇقىقتىق بازانىڭ ماڭىزدى ەلەمەنتتەرىن نىعايتۋعا ارنالعان, بۇل سوت تورەلىگى سەكتورىن دامىتىپ, نىعايتۋعا ىقپال ەتەدى», دەدى ب.اتاعازيەۆا.
سونىمەن قاتار ول جوبانى جۇزەگە اسىرۋ ءۇشىن ادىلەت مينيسترلىگى پولشانىڭ زاڭناماسىن جەتىلدىرۋدە تابىستى تاجىريبەسى بار زاڭگەرلىك فيرما Miller Canfield وكىلدەرىن جانە GLCC Solutions ۇيىمىنىڭ گرۋزيا, شىعىس ەۋروپا جانە ورتالىق ازيا ەلدەرىنىڭ جەكە جانە مەملەكەتتىك سەكتورلاردى رەفورمالاۋدا مول تاجىريبەسى بار حالىقارالىق ساراپشىلارىن شاقىرعانىن اتاپ ءوتتى.
«جوبا اتالعان باعىتتتار بويىنشا ەلەۋلى جەتىستىككە قول جەتكىزگەن جانە حالىقتىڭ جوعارى سەنىمىنە يە بولعان اقش, ۆەنگريا, پولشا, چەحيا جانە تۇركيا سىندى دامىعان مەملەكەتتەردىڭ تالداۋى مەن تاجىريبەسىنە نەگىزدەلگەن, زاڭنامانى جەتىلدىرۋگە باعىتتالعان شارالار كونسۋلتاتسيالىق كومەك تۇرىندە ءبىر جىل بويى ىسكە اسىرىلاتىن بولادى», دەدى باقتىگۇل اتاعازيەۆا.
راۋان قايدار,
«ەگەمەن قازاقستان»