ايگىلى توميريس, تۇمار پاتشايىمنىڭ تاريحي بەينەسى كۇنى بۇگىنگە دەيىن باتىرلىق پەن ادىلدىكتىڭ كورىنىسىندەي ەلەس بەرەدى. گەرودوتتىڭ جازباسىندا ادامزات تاريحىنداعى ايگىلى وقيعا پارسى پاتشاسى كيردىڭ ساق پاتشايىمىن وزىنە ايەل ەتىپ الماقشى بولعانىنان باستالادى. الايدا كير پاتشانىڭ ساياساتىن تۇسىنگەن تۇمار پاتشايىم ونىڭ ۇسىنىسىن قابىلداماۋى مۇڭ ەكەن, ارادا قيان-كەسكى شايقاس باستالادى. تاريحتا مۇنىڭ سوڭى كير پاتشانىڭ ولىمىمەن اياقتالعانى ايتىلادى.
قايسارلىقتىڭ قاشاندا قاسيەتى جوعارى. تۇمار پاتشايىمنىڭ بۇل كورەگەندىگى الەمدەگى جۇزدەگەن قالامگەرلەردىڭ, تاريحشىلاردىڭ شىعارمالارىندا كوركەمدىك ادىسپەن بەينەلەندى. ۇرپاقتار ساناسىندا ەلدىك مۇددەنى ساقتاپ قالۋداعى ەرلىك بولىپ قالىپتاستى. تۇمار پاتشايىمنىڭ قايسارلىعى مەن سۇلۋلىعى دا بولات جانداربەكوۆتىڭ «ساقتار» رومانىندا كوركەم بەينەلەنگەن ەدى. جامبىل وبلىستىق قازاق دراما تەاترىندا اتالعان رومان جەلىسى بويىنشا «توميريس» تاريحي دراماسى ساحنالاندى. ال درامانىڭ قويۋشى رەجيسسەرى استانالىق دينا جۇمابەكوۆا بولدى. سونداي-اق سۋرەتشى راحات ساپاراليەۆانىڭ جان-جاقتى شەبەرلىگى كورەرمەندى ساقتار داۋىرىندە جۇرگەندەي اسەرگە بولەدى.
ەڭ باستىسى, ساحنالىق قويىلىمدا ەركىندىك ورىن العان. كوپ جاعدايدا تاريحي شەشىمدەر سوزبەن عانا ەمەس, ارەكەتپەن دە بەرىلىپ وتىردى. تۇمار پاتشايىمنىڭ بەينەسىن سومداعان انار ساعىمبەكوۆا قيمىلىمەن دە, سوزىمەن دە كورەرمەندى ءتانتى ەتتى. ايەل زاتى قانشا جەردەن نازىك دەسەك تە, ەل مەن جەردى قورعاپ قالۋداعى قاتالدىقتى اكتريسا كير پاتشانىڭ باسىن الۋ وقيعاسى كەزىندە تاعى ءبىر كورسەتتى. وزەۋرەپ كەلىپ, ءولىم قۇشقان كيردىڭ بەينەسىن سومداعان كەنەن اقۇرپەكوۆ, رۋستام رولىندەگى مامبەت قوجاليەۆ تە كورەرمەندى كونە داۋىرگە تارتقانداي بولدى.
دراما رەجيسسەرى دينا جۇمابەكوۆانىڭ ايتۋىنشا, شىعارماشىلىق ۇجىم ءبىر اي بويى بىرلەسە ەڭبەكتەنگەن. ال تەاتر ديرەكتورى بولات بەكجانوۆ قويىلىمنىڭ ءساتتى شىققانىن ءسوز ەتىپ, الداعى ۋاقىتتاردا «توميريس» تاريحي دراماسىنىڭ تەاتر تورىنەن تابىلاتىنىن ايتتى.
حاميت ەسامان, «ەگەمەن قازاقستان»
جامبىل وبلىسى