قازاقستان مەن ەۋروپالىق وداق اراسىندا ديپلوماتيالىق قارىم-قاتىناستاردىڭ جولعا قويىلعانىنا شيرەك عاسىر بولدى. سىرتقى ىستەر مينيسترلىگى وسى وقيعاعا قاتىستى جاسالعان بىرلەسكەن مالىمدەمەنى جاريالادى.
2018 جىلعى 2 اقپاندا ەۋروپالىق وداق پەن قازاقستان رەسپۋبليكاسى اراسىندا ديپلوماتيالىق قارىم-قاتىناستاردىڭ ورناعانىنا 25 جىل تولدى. وسى كۇننەن باستاپ ەكى تاراپ اراسىندا تىعىز ءارى ءوزارا ءتيىمدى ىنتىماقتاستىق قالىپتاسا باستادى.
شيرەك عاسىر ىشىندە ەۋروپالىق وداق پەن قازاقستان اراسىندا قارىم-قاتىناستىڭ بەرىك شارتتىق-قۇقىقتىق بازاسى قۇرىلدى. ونىڭ ىرگەتاسى 2015 جىلعى 21 جەلتوقساندا قول قويىلعان ەو مەن قر اراسىنداعى كەڭەيتىلگەن ارىپتەستىك جانە ىنتىماقتاستىق كەلىسىمى بولىپ تابىلادى.
2016 جىلعى 1 مامىردان باستاپ جارتىلاي قولدانىسقا ەنگەن بۇل قۇجات ەكىجاقتى قارىم-قاتىناستىڭ جاڭا كەزەڭگە بەت العانىن كورسەتەدى جانە حالىقتارىمىزدىڭ يگىلىگى ءۇشىن كوپتەگەن سالالارداعى ىنتىماقتاستىقتىڭ قۇقىقتىق نەگىزىن ەلەۋلى كەڭەيتتى. قازاقستان ەو-مەن وسىنداي كەلىسىمگە قول قويعان ورتالىق ازيانىڭ تۇڭعىش مەملەكەتى بولدى.
كەلىسىم قازاقستان مەن ەۋروپا اراسىنداعى ۇزاق مەرزىمدى بايلانىستاردى قارقىنداتۋدىڭ لوكوموتيۆى بولۋعا ارنالعان. قۇجات ساۋدا, ەكونوميكالىق جانە ينۆەستيتسيالىق ىنتىماقتاستىق ءۇشىن قولايلى جاعدايلار جاساۋعا, سونداي-اق ساياسي جانە ادام قۇقىقتارى سالاسىنداعى ديالوگتى كەڭەيتۋگە باعىتتالعان.
ەۋروپالىق وداق پەن قازاقستان ورتالىق ازيا بويىنشا ەو ستراتەگياسىنىڭ ىسكە اسىرىلۋىنا بىرلەسە قولداۋ بىلدىرۋدە. ادامي كاپيتالدى دامىتۋ, ءبىلىم بەرۋ, قورشاعان ورتانى قورعاۋ, سۋ رەسۋرستارىن ۇتىمدى پايدالانۋ, ءوڭىردىڭ ءتيىمدى كولىك-لوگيستيكالىق ينفراقۇرىلىمىن قالىپتاستىرۋ, قاۋىپ-قاتەرلەرگە قارسى كۇرەس ماسەلەلەرىنە ەرەكشە كوڭىل ءبولىنىپ وتىر.
ەۋروپالىق وداق پەن قازاقستان ودان ءارى ورتاق قۇندىلىقتارعا نەگىزدەلگەن ءوزارا ءىس-قيمىل جاساۋ ءۇشىن زور الەۋەتتىڭ بار ەكەندىگىنە سەنىمدى جانە ارىپتەستىك پەن ىنتىماقتاستىقتىڭ بارلىق نىساندارىن دايەكتى جەتىلدىرۋدى جالعاستىرۋعا دايىن ەكەنىن بىلدىرەدى.
«ەگەمەن اقپارات»