ۇلتتىق ۇلان باس قولباسشىلىعىندا قىلمىسكەرگە ءىزىن جاسىرۋعا جول بەرمەي, قولعا تۇسىرگەن مايور تيمۋر راحيموۆتى قۇرمەتتەۋگە ارنالعان كەش ءوتتى.
شاراعا ارداگەرلەر, اسكەري قىزمەتشىلەر جانە مايور تيمۋر راحيموۆقا باتىلدىعى مەن ەرلىگى ءۇشىن العىسىن بىلدىرۋگە كەلگەن جاپا شەگۋشىنىڭ جاقىندارى قاتىستى.
ەسكە ءتۇسىرىپ وتسەك, وقيعا 29 قاڭتار كۇنى تۇنگى 23.00 شاماسىندا ورىن العان. قىزمەتتەن كەيىن ۇيىنە ورالعان ۇلتتىق ۇلاننىڭ 3660 اسكەري ءبولىمىنىڭ وفيتسەرى مايور تيمۋر راحيموۆ اۋلادا جانجالداسقان ەكى ادامدى بايقايدى. سول ساتتە دەرەۋ وقيعا ورنىنا قاراي جۇگىرەدى.
– العاشقىدا جىگىت پەن قىز اراسىنداعى جاي ۇرىس-كەرىس بولار دەپ ويلادىم. الايدا ارتىنان قول جۇمساۋ باستالدى, شابۋىل جاساۋشىنىڭ ويى ارام ەكەنىن ءتۇسىندىم. مەن ايقاي سالدىم, جىگىت قاشا جونەلدى, – دەيدى ءوز ويىمەن بولىسكەن مايور ت.راحيموۆ.
كۇدىكتىنى ۇلاندىق وفيتسەر قۋىپ جەتكەن بويدا قويان-قولتىق ۇرىس ادىسىمەن قولعا تۇسىرەدى. ىلە ونى ىشكى ىستەر ورگاندارى قىزمەتكەرلەرىنىڭ قولىنا تابىستايدى.
كەيىن بەلگىلى بولعانداي, قاسكوي الگى جابىرلەنۋشى قىزدىڭ «iPhone-7» ۇيالى تەلەفونىن تارتىپ الىپ, ءىزىن جاسىرماق بولعان. قىلمىس ورنىنان پىشاق پەن قىزدىڭ سومكەسى تابىلعان. قىز استانا قالاسىنىڭ تۇرعىنى بولىپ شىقتى. ال كۇدىكتى بۇعان دەيىن جاساعان قىلمىسى ءۇشىن رەسەيدە 10 جىل جازاسىن وتەگەن كورىنەدى.
كورسەتكەن ەرلىگى مەن قىراعىلىعى, قىلمىسكەردى قولعا تۇسىرۋدەگى باتىلدىعى ءۇشىن ۇلتتىق ۇلان باس قولباسشىسىنىڭ بۇيرىعىمەن مايور تيمۋر راحيموۆ سالتاناتتى شارادا «قۇقىقتىق ءتارتىپ اسكەرىنە – 25 جىل» مەدالىمەن ماراپاتتالدى.
جاپا شەگۋشى قىزدىڭ اعاسى مۇرات كوشەرباي ماراپات يەسىنە العىسىن ءبىلدىردى. ونىڭ ايتۋىنشا, سۋىق اۋا رايى مەن كەش مەزگىلگە قاراماستان وفيتسەر جانجالدىڭ ورشۋىنە جول بەرمەي, ايبىرويمەن مىندەتىن اتقارىپ, قاسكويگە قاشىپ كەتۋگە مۇمكىندىك بەرمەگەن.
ۇلاندىقتىڭ ءوزى بولسا, مۇنى ەر ازاماتتىڭ مىندەتى سانايدى. كەز كەلگەن ەر جىگىت, جاۋىنگەر قىزدى ءوزى سەكىلدى قورعاپ قالار ەدى دەپ ويلايدى. ويتكەنى قاۋىپسىزدىك پەن تىنىشتىقتى قامتاماسىز ەتۋ – ءار وفيتسەردىڭ مىندەتى.
– ءبىز حالىق ءۇشىن قىزمەت اتقارامىز. حالىقتى قورعاۋ – اسكەري قىزمەتشىنىڭ مىندەتى. بۇل ارەكەتىم باسقا قارۋلاستارىما ۇلگى بولسا ەكەن, – دەيدى مايور.
استانالىق اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى لاۋازىمىندا قىزمەت اتقاراتىن تيمۋر راحيموۆ كەشكە جۇبايى جانە ەكى بالاسىمەن بىرگە كەلدى. بارشا قاۋىم جىلى سوزدەرىن كەش يەسىنە ارناسا, ءان-بي ءانسامبلىنىڭ ونەرپازدارى پاتريوتتىق اندەر ورىندادى.