بۇگىندە جۇرت الەمنىڭ ءار تۇكپىرىنەن ءبىر-بىرىمەن ۇيالى بايلانىسقا شىعىپ, تەلەفوننان ءتىپتى ءبىر-ءبىرىن كورىپ وتىر. ال باياناۋىل تاۋىنىڭ باۋرايىنداعى اۋىلدار بايلانىس اياسىنان تىس جەردە قالىپ بارادى.
بۇگىندە باياناۋىلدىڭ جازعى-قىسقى تۋريزم الەۋەتى تاڭعالارلىقتاي. شاعىن اۆياتسياعا ارنالعان اەرودروم دا سالىنىپ جاتىر. ينفراقۇرىلىم دەگەنىڭىز كەرەمەت, اۋدان بويىنشا 45 شاقىرىمعا جارىقتاندىرۋ جەلىسى تارتىلىپ, 1700 جارىق باعانا ورناتىلىپ, 2000-نان استام شام قويىلىپتى. تۋريستەردى قارسى الۋعا دايىن. الايدا ۇيالى بايلانىس اياسىنان تىس قالعان اۋىلدار رەنىشتى.
كوزبەن كورگەنىمىزدى ايتايىق. ءبىز جولساپارمەن بارعانىمىزدا اقساڭ اۋىلى ۇيالى بايلانىسقا دا, كەڭ جولاقتى ينتەرنەتكە دە قوسىلماعانىنا كۋا بولدىق. اۋىل اۋدان ورتالىعىنىڭ ىرگەسىندە ورنالاسقان, 1 مىڭعا جۋىق حالىق تۇرادى. ءدال جانىندا مىرزاشوقى دەگەن شاڭعى كەشەنى سالىنىپ جاتىر. بۇل قۇرىلىسقا 350 ميلليون تەڭگە جۇمسالعان كورىنەدى. اۋىلدىقتاردىڭ ايتۋىنشا, مىرزاشوقى تاۋىنا دەيىن قوسىمشا ەلەكتر جۇيەسى تارتىلىپتى. ال اقساڭدا قىس ايلارىندا, ءتىپتى جازدا دا ەلەكتر جارىعى تاۋلىكتەپ ءسونىپ قالا بەرەدى. سوندىقتان تۇرعىندار بيلىكتەن قوسالقى ستانسا ورناتىپ بەرۋدى سۇراپ وتىر.
اۋداندىق تۇرعىن ءۇي-كوممۋنالدىق شارۋاشىلىق ءبولىمىنىڭ مالىمەتىنشە, ۇيالى بايلانىستىڭ تارتىلماۋىنا سەبەپ – اۋىلدارداعى تۇرعىندار سانىنىڭ ازايۋى. حالىق سانى 500-دەن اسقاندا ۇيالى بايلانىس جەلىسى ورناتىلادى.
– بايلانىس جوق ەمەس, بار. بارلىق اۋىلدا بۇرىننان بەرى تارتىلعان ءۇي تەلەفوندارى قوسىلۋلى,– دەيدى ولار.
اۋىلداردىڭ حالقى ۇيالى بايلانىسقا قوسىلۋ جايلى وتىنىشتەرىن اقپارات جانە كوممۋنيكاتسيالار مينيسترلىگىنە دە جولداعان. وبلىستىق «سارىارقا سامالى» گازەتىنىڭ تىلشىلەرى دە ماسەلە كوتەرگەن. ناتيجەسىندە وتكەن جىلى اۋداندا «كار-تەل» جشس Beeline ۇيالى بايلانىس جەلىسىن تارتۋدى باستاپتى. قازىر اۋدانداعى 38 اۋىلدىڭ 31-ءى ۇيالى بايلانىسقا قوسىلىپتى. شالعايداعى قۇندىكول جانە جۇمات شانين اۋىلدارىنا ەندى ۇيالى تەلەفون ارقىلى حابارلاسا الاسىز. قاراجار, بىرجانكول, كوكدومباق, قويتاس, اقشي, ۇزىنبۇلاقتىڭ اقشيى, مىڭبۇلاق اۋىلدارىن بايلانىسقا قوسۋ ءۇشىن ۇيالى تەلەفون وپەراتورلارىنا قوسىمشا حات جولدانىپتى. جاڭاجول, جەلتاۋ, كۇركەلى اۋىلدىق وكرۋگتەرى دە ۇيالى بايلانىستىڭ قوسىلۋىن اسىعا كۇتۋدە. بۇل جەرلەردە اۋدان بويىنشا مال باعاتىن 444 شارۋا قوجالىعى, 25 وتارلى مال فەرماسى بار.
اۋىل حالقى الىستاعى اعايىن, ستۋدەنت بالالارىمەن بايلانىسۋ ءۇشىن ۇيالى تەلەفوننىڭ قولايلى ەكەنىن ايتادى. زامانعا ساي وزگە ەلدەردەن قالعىلارى كەلمەيدى. وزىق ۋاقىتتىڭ وزىق جاڭالىعى اۋىلعا دا قولجەتىمدى بولسا دەيدى. ال بيلىك قاراپايىم اۋىل حالقىنىڭ تۋعان جەردىڭ تاۋ-تاسىن, كولدەرىن ساقتاپ, تۋريزم وركەندەيتىن اۋماقتا تۇرىپ جاتقانىن ەسكەرسە يگى.
فاريدا بىقاي,
«ەگەمەن قازاقستان»
پاۆلودار وبلىسى,
باياناۋىل اۋدانى