بۇگىن ءۇرجار اۋدانىنىڭ بەستەرەك اۋىلىندا استانا قالاسىنىڭ 20 جىلدىعىنا وراي ەرەسەكتەر اراسىنداعى بۇركىتشىلەردىڭ ءحىى رەسپۋبليكالىق چەمپيوناتى باستالدى.
ۇلتتىق سپورت تۇرلەرى قاۋىمداستىعى مەن ءۇرجار اۋدانى اكىمدىگىنىڭ قولداۋىمەن, بۇركىتشى, اتبەگى تاتتىمبەت كاپ ۇلىنىڭ ۇيىمداستىرۋىمەن ءوتىپ جاتقان قىراندار سايىسىنا قاتىسۋعا ەلىمىزدىڭ وبلىستارى مەن قالالارىنان 39 بۇركىتشى كەلدى.
«بۇركىتشىلەر سايىسى ءبىزدىڭ اۋدانىمىزدا ەكىنشى جىل قاتارىنان ۇيىمداستىرىلىپ وتىر. وسى رەتتە ۇلتتىق قۇندىلىقتارىمىزدى ۇلىقتاپ, ءتول سپورتىمىزدى دارىپتەپ جۇرگەن, وسى سايىستىڭ وتۋىنە ۇيىتقى بولعان تاتتىمبەت كاپ ۇلىنا العىس بىلدىرەمىز. چەمپيوناتتىڭ ءساتتى وتۋىنە تىلەكتەسپىن», - دەدى ءۇرجار اۋدانىنىڭ اكىمى سەرىك زاينۋلدين جارىستىڭ اشىلۋ سالتاناتىندا سويلەگەن سوزىندە. سونىمەن قاتار اۋدان باسشىسى ت.كاپ ۇلىنا اۋداننىڭ قۇرمەتتى ازاماتى اتاعىن بەرۋ جونىندە ۇسىنىس تۇسكەنىن ايتتى.
سالتاناتتى شارادا ءسوز العان ۇلتتىق سپورت تۇرلەرى قاۋىمداستىعىنىڭ ءبىرىنشى ۆيتسە-پرەزيدەنتى ەرلەن وسپانوۆ كەلەسى جىلى ءۇرجار اۋدانىندا حالىقارالىق بۇركىتشىلەر سايىسىن وتكىزۋدى جوسپارلاپ وتىرعاندارىن جەتكىزدى.
ازامات قاسىم, «ەگەمەن قازاقستان» شىعىس قازاقستان وبلىسى, ءۇرجار اۋدانى, بەستەرەك اۋىلى
سۋرەتتەردى تۇسىرگەن اۆتور