بۇۇ-نىڭ كوشى-قون اگەنتتىگى ليۆيا جاعالاۋىندا توقسان ميگرانتتىڭ سۋعا باتىپ كەتكەن بولۋى مۇمكىن دەپ حابارلادى. زارداپ شەككەن ءۇش كۋاگەردىڭ ايتۋىنشا, سۋعا باتىپ كەتكەندەردىڭ كوپشىلىگى پاكىستان ازاماتتارى بولعان.
ليۆيا بىرنەشە جىلدان بەرى وڭتۇستىك ەۋروپاعا تەڭىز ارقىلى جەتۋگە تىرىساتىن ميگرانتتار ءۇشىن ماڭىزدى ترانزيتتىك مارشرۋت بولىپ تابىلادى.
بىراق وتكەن جىلى يتالياعا كەلەتىن ميگرانتتار مەن بوسقىندار ءولىمىن توقتاتۋ ۇشىن قۇتقارۋشىلار مەن كۇزەت قىزمەتىن قولدانۋ ماسەلەسى ەۋروپالىق وداقتا كوپ پىكىرتالاس تۋدىرعان بولاتىن. ولاردىڭ ايتۋىنشا, پاكىستاندىقتار ارقاشان يتالياعا جەتۋ ءۇشىن كوپ قاۋىپتەرگە جولىعادى.
حالىقارالىق ميگراتسيا ۇيىمىنىڭ حابارلاۋىنشا, بىلتىر پاكىستاندىقتار ەۋروپاعا كەلەتىن ميگرانتتار اراسىندا 13-ءشى ورىندا تۇرسا, بيىل ولاردىڭ ولاردىڭ سانى كۇرت ارتىپ, 3-ءشى ورىنعا جەتكەن.
جالپى ايتقاندا, ميگراتسيا ۇيىمى بيىل ەۋروپاعا 6 624 ميگرانتتىڭ تەڭىز ارقىلى كەلگەنىن حابارلادى. ال بىلتىر وسى ۋاقىت ارالىعىنداعى كورسەتكىش 5 983 بولدى. سونىمەن قاتار, وسى ۋاقىتقا دەيىن 246 ميگرانت ولگەن نەمەسە جوعالعان ادامدار قاتارىندا.
كەمەدەگى ليۆيالىقتار
سونىمەن قاتار, BBC-ءدىڭ سولتۇستىك افريكاداعى ءتىلشىسى رانا دجاۆاد سول كەمە اپاتىندا بولعان ادامدار اراسىندا ليۆيالىقتاردىڭ بولعانىن حابارلادى.
زيۆارا قالاسىنىڭ قاۋىپسىزدىك باسقارماسىنى فەيسبۋك پاراقشاسىندا ليۆيالىق ايەلدىڭ سۋعا باتىپ كەتكەنى جانە ءتىرى قالعان ءۇش ادامنىڭ ەكەۋى ليۆيالىق ەكەنىن جازدى. نەگىزىنەن ليۆيالىقتار ەۋروپاعا جەتۋ ءۇشىن كەمەنى از قولدانۋعا تىرىسادى.
ەۋرووداقتىڭ فرونتەكس شەكارالىق اگەنتتىگىنىڭ حابارلاۋىنشا, ميگرانتتار اراسىنداعى بولعان قايعىلى جاعداي بەيسەنبى كۇنى جۇزەگە اسىرىلعان Themis وپەراتسياسىنىڭ ناتيجەسىندە بەلگىلى بولدى.