جورىتقاندا جولىڭ بولسىن, كابانانگا!

«بوز بالا بولىپ كەلىپ ەدىم, كەمەلدەنگەن شاعىمدا كەتىپ بارامىن. ماعان دەگەن ىستىق ىقىلاستارىڭىزدى, جاقسىلىقتارىڭىزدى, قولداۋلارىڭىزدى ۇمىتپايمىن. «استانا» كومانداسى, قازاق ەلى مەنىڭ ماڭگى جۇرەگىمدە», دەپ كابانانگا العىس ايتىپ, جىلى لەبىزىن ءبىلدىرىپتى.

كونگولىق شابۋىلشى ساۋد ارابياسىنىڭ «ال-ناسر» كلۋبىنا اۋىستى. ترانسفەرلىك قۇنى 2 ملن ەۋروعا باعالانىپتى. بۇل قازاقستان فۋتبولىنىڭ تاريحىندا بۇرىن-سوڭدى بولماعان ەڭ ءىرى ترانسفەرلىك كەلىسىم. ماركەتينگتىك, يميدجدىك تۇرعىدان «استانا» كوزدەگەنىنە جەتتى دەۋگە دە بولادى. قوماقتى قارجى تاپتى. وعان ەندى «جورىتقاندا جولىڭ بولسىن!» دەيمىز.

قانشا دەگەنمەن كابانانگا جوقتان گول جاسايتىن, جويقىن سوققىلارىمەن, شەبەر تەحنيكاسىمەن, جىلدامدىعىمەن, وزىنە دەگەن سەنىمدىلىگىمەن, ەرەكشە ويىنىمەن كوزگە تۇسكەن ويىنشى. «استانا» قارجى جاعىنان پايدا تاپقانمەن, الداعى «سپورتينگپەن» وتەر قوس ويىندى قالاي وتكىزبەك؟ كاباناگانى ءدال وسى شاقتا جىبەرگەنى دۇرىس بولدى ما؟ پورتۋگاليالىقتارمەن ويىندا ونىڭ ورنىن كىم باسادى؟ مىنە, وسى تەكتەس سۇراقتار قازىر قازاق جانكۇيەرلەرىنىڭ كوكەيىندە تۇرعانى انىق. سول سەكىلدى باس باپكەر ستانيمير ستويلوۆتىڭ باستى ۋايىمىنا اينالعانى انىق. كابانانگانىڭ قانشالىقتى قاجەتتى ويىنشى ەكەنىن الداعى قوس ويىننىڭ قورىتىندىسىنان بايقايتىن بولامىز.

دەي تۇرعانمەن تاياقتىڭ ەكىنشى شەتى بارىن دا ۇمىتپايىق. ەندى ۇنەمى قوسالقى قۇرامدا قالىپ جۇرەتىن رومان مۇرتازاەۆ, دجوردجە دەسپوتوۆيچ سەكىلدى فۋتبولشىلارعا جول اشىلدى. سونداي-اق, ۇيىرىنە قايتا قوسىلعان باۋىرجان جولشيەۆ وقۋ-جاتتىعۋ جيىنىندا جاقسى قىرىنان كورىنىپ, ستانيمير ستويلوۆتىڭ سەنىمىنە قايتا كىرسە, بۇرىنعى بابىنا قايتا ورالۋى مۇمكىن.

ستويلوۆ تۇسىندا «استانانىڭ» بىرقاتار ماڭىزدى ويىنشىسى كەتتى. بىراق بولگار مامانى ىلعي دا لايىقتى ويىنشىلار الىپ, ماۋسىم سوڭىندا جوعارى ناتيجەلەرگە جەتىپ ءجۇردى. قىسقاسى كەتكەن شاكىرتىنىڭ ورنىن جوقتاتپادى. ستويلوۆتىڭ بۇل جولى دا ءبىر بىلگەنى بولار دەگەن ءۇمىت جوق ەمەس. قارا قابىلانعا الداعى ۋاقىتتا ساتتىلىك, ال «استاناعا» «سپورتينگپەن» وتەر قوس ويىندا تەك جەڭىس تىلەيمىز!

ەركەبۇلان جومارت, «ەگەمەن قازاقستان»