قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا بىرىككەن اراب امىرلىكتەرىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى مۇحاممەد ءال-دجابەرمەن كەزدەستى. بۇل تۋرالى اقوردانىڭ ءباسپاسوز قىزمەتى حابارلادى.
كەزدەسۋ بارىسىندا قازاقستان مەن امىرلىكتەر اراسىنداعى ءوزارا ىقپالداستىقتىڭ قازىرگى جاعدايى, سونداي-اق ساياسي, ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ پەرسپەكتيۆالارى تالقىلاندى.
– قازاقستان پرەزيدەنتى نۇرسۇلتان نازارباەۆ پەن بىرىككەن اراب امىرلىكتەرىنىڭ باسشىسى شەيح حاليفا ءال ناحاياننىڭ تىعىز ءارى ءوزارا سەنىمدى بايلانىستارىنىڭ ارقاسىندا ەلدەرىمىز اراسىندا دوستىق قارىم-قاتىناس ورنادى, – دەدى مەملەكەتتىك حاتشى.
گ.ابدىقالىقوۆا قازاقستاننىڭ 4.0-يندۋسترياسى ەلەمەنتتەرىن ەنگىزۋدى جانە الەمنىڭ وزىق دامىعان وتىز ەلىنىڭ قاتارىنا قوسىلۋدى كوزدەيتىن مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن ىسكە اسىرۋعا كىرىسكەنىن اتاپ ءوتتى.
– ءبىز بۇۇ قاۋىپسىزدىك كەڭەسىنىڭ تۇراقتى ەمەس مۇشەسىمىز. تاياۋدا نۇرسۇلتان نازارباەۆ قاۋىپسىزدىك كەڭەسىنىڭ وتىرىسىنداعى سويلەگەن سوزىندە حالىقارالىق قارىم-قاتىناستا ساياسي سەنىم مەن جۇيەلى ديالوگتىڭ ماڭىزدى ەكەنىنە نازار اۋدارعان بولاتىن, – دەدى مەملەكەتتىك حاتشى.
گۇلشارا ابدىقالىقوۆا «استانا» حالىقارالىق قارجى ورتالىعى مەن امىرلىكتەردىڭ قارجى ورتالىقتارى اراسىندا ءوزارا بەلسەندى ءىس-قيمىلدى جالعاستىرۋدىڭ ماڭىزدى ەكەنىن اتاپ ءوتتى.
سوڭىندا مەملەكەتتىك حاتشى بىرىككەن اراب امىرلىكتەرىنىڭ حالىقارالىق «استانا ەكسپو-2017» مامانداندىرىلعان كورمەسىنە بەلسەندى اتسالىسقانى ءۇشىن ريزاشىلىق ءبىلدىرىپ, دۋبايداعى كەلەسى ەكسپو-2020 كورمەسىنىڭ جوعارى دەڭگەيدە وتەتىنىنە سەنىم ءبىلدىردى.
– قازاقستان بىرىككەن اراب امىرلىكتەرىمەن تولىققاندى ستراتەگيالىق سەرىكتەستىك ورناتۋعا مۇددەلى جانە ەكسپو-2020 كورمەسىنە بەلسەندى اتسالىساتىن بولادى, – دەدى گ.ابدىقالىقوۆا.
***
قازاقستان رەسپۋبليكاسى مەن بىرىككەن اراب امىرلىكتەرى اراسىنداعى تاۋار اينالىمى 2017 جىلعى قاڭتار-قاراشا ارالىعىندا 590,3 ميلليون اقش دوللارىن قۇرادى. 2005-2017 جىلدارى امىرلىكتەردەن قازاقستانعا كەلگەن تىكەلەي ينۆەستيتسيانىڭ جالپى كولەمى شامامەن 2 ميلليارد اقش دوللارىنا جەتتى.
قازاقستاندا امىرلىكتەر كاپيتالىنىڭ قاتىسۋىمەن 233 بىرلەسكەن كاسىپورىن جۇمىس ىستەيدى. ەڭ ءىرى ەكىجاقتى ينۆەستيتسيالىق جوبا – قۇنى 1,2 ميلليارد اقش دوللارى بولاتىن «ابۋ دابي پلازا» كوپ فۋنكتسيونالدى كەشەنى.