الماتىداعى دوستىق ۇيىندە مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن تالقىلاۋ بويىنشا دوڭگەلەك ۇستەل ءوتتى.
جيىندا باس قوسقان قازاقستان حالقى اسسامبلەياسىنىڭ وكىلدەرى مەن بىرقاتار قۇرىلىمداردىڭ باسشىلارى ەلدىڭ ستراتەگيالىق دامۋىن ايقىنداپ بەرگەن باستى قۇجاتتىڭ ءمان-ماڭىزىنا ءۇڭىلىپ كوردى.
دوڭگەلەك ۇستەل جۇمىسىن اشىپ بەرگەن قازاقستان حالقى اسسامبلەياسى توراعاسىنىڭ ورىنباسارى – قازاقستان رەسپۋبليكاسى پرەزيدەنتىنىڭ قحا حاتشىلىعىنىڭ مەڭگەرۋشىسى دارحان مىڭباي جولداۋدا ايقىندالعان ماقسات-مىندەتتەردىڭ جۇزەگە اسۋى جولىندا اسسامبلەيا اتقاراتىن جۇمىستاردىڭ سالماعىن سارالاپ بەردى. ول جاڭا جولداۋ مەملەكەتتىڭ بارلىق سالاسىنداعى دامۋدىڭ جاڭا ساپالىق دەڭگەيگە كوتەرىلۋىنە كەدەرگى كەلتىرەتىن ارەكەتتەرگە توسقاۋىل قويىپ, تسيفرلىق دامۋ داۋىرىنە اپاراتىن ايقىن جول دەپ اتاپ ءوتتى. اسىرەسە, جولداۋدان تۋىندايتىن ماقساتتاردى ىسكە اسىرۋدا جاستاردىڭ جان-جاقتى جەتىلۋىنە جاعداي جاساۋعا اسسامبلەيا تاراپىنان ەرەكشە باسىمدىق بەرىلەتىنىن ايتىپ, بيىل قوعامدىق-ساياسي باعىتتا اسسامبلەيا قولعا الاتىن ون ءبىر جوبانىڭ بارلىعى جاستارعا ارنالاتىنىن تىلگە تيەك ەتتى.
– پرەزيدەنت جولداۋى اسا ءبىر تاريحي كەزەڭدە حالىققا جولداندى. وندا قامتىلعان نەگىزگى ماسەلەنىڭ ءبىرى – ادام كاپيتالىن دامىتۋ. ادام كاپيتالى دەگەنىمىزدە ەڭ ءبىرىنشى ويعا كەلەتىنى ادامنىڭ ءبىلىم الۋى. ءبىز الەمدىك دەڭگەيگە شىعۋ ءۇشىن, وركەنيەتتىڭ كوشىنەن قالىپ قويماۋ ءۇشىن شەت تىلدەرىن بىلۋمەن عانا شەكتەلىپ قالماي, كوپتەگەن وزىق تەحنولوگيالاردى مەڭگەرۋىمىز كەرەك. ول ءۇشىن جاستارعا جول اشۋ, ولاردىڭ جان-جاقتى ءبىلىم الىپ دامۋىنا قولداۋ كورسەتۋدىڭ ماڭىزى زور. ءبىز الداعى ءساۋىر ايىندا بارلىق جاستار بىرلەستىكتەرىنىڭ جەتەكشىلەرىن استاناعا جيناپ, «جاڭعىرۋ جولى» قوزعالىسىنىڭ جۇمىسىن باستايمىز. ارنايى شتاب قۇرىلىپ, ونىڭ اتقاراتىن جۇمىسى ناقتىلانادى. «جاڭعىرۋ جولى» قوزعالىسى «رۋحاني جاڭعىرۋ», «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» باعدارلاماسىنداعى مىندەتتەر ارقىلى جاستاردىڭ دامۋىن قامتاماسىز ەتەدى. اسسامبلەيانىڭ 26-شى سەسسياسىن وتكىزگەننەن كەيىن, ءبىز «جاڭعىرۋ جولى» رەسپۋبليكالىق فورۋمىن وتكىزەمىز. وندا قحا تاراپىنان ازىرلەنگەن جاستاردىڭ الەۋمەتتىك جوبالارىن تانىستىرامىز. ەلباسىمىز ايتقانداي, «ەلىمىزدىڭ الەمدىك ەكونوميكاداعى تابىستارىنىڭ نەگىزى ءبىزدىڭ باستى قۇندىلىقتارىمىز رەتىندە قالا بەرەتىن ازاماتتىق بەيبىتشىلىك, ۇلتارالىق جانە كونفەسسياارالىق كەلىسىم». ەلباسى اتاپ كورسەتكەن ۇلتتاردىڭ تاتۋلىعى مەن بىرلىگى ءاردايىم باستى نازاردا. قازاقستاندى مەكەندەگەن بارلىق حالىقتى ۇلتىنا, دىنىنە قاراماي بىرىكتىرە ءتۇسۋىمىز كەرەك. ويتكەنى ءبىر مۇددە جولىندا جۇدىرىقتاي جۇمىلعاندا عانا ءبىز ۇلكەن جەتىستىكتەرگە قول جەتكىزە الامىز, – دەدى دارحان مىڭباي.
مەملەكەتتى دامىتۋدا زاماناۋي تالاپتار مەن وركەنيەتتىڭ جاھاندىق كورىنىسىنە ساي ارەكەت ەتۋدى باعدارلايتىن بۇل قۇجاتتىڭ مازمۇنى دا, قوعام الدىنا جۇكتەر جاۋاپكەرشىلىگى دە سالماقتى. وسىعان وراي ءوز پىكىرىن بىلدىرگەن الماتى كارىس ۇلتتىق ورتالىعى توراعاسىنىڭ ورىنباسارى گەورگي كان: «پرەزيدەنتىمىزدىڭ جاڭا جولداۋى مەملەكەتىمىزدىڭ دامۋ جولىنداعى ۇلكەن ۇمتىلىستارىن كورسەتەدى. اتالعان جولداۋدا ەكونوميكامىزدىڭ ورلەۋىنە ىقپال ەتەتىن ءار سەكتور جەكە-جەكە كورسەتىلىپ, ولاردى ارى قاراي جەتىلدىرۋ مەن دامىتۋدىڭ ناقتى ماقساتتارى اتاپ ايتىلعان. قازاقستان حالقىنىڭ ءال-اۋقاتىن ارتتىرۋ, ادام كاپيتالى, ءسىز بەن ءبىزدىڭ سالاۋاتتى ءومىر ءسۇرۋىمىز, ءبارى-ءبارى قامتىلعان. جولداۋدا نىسانعا الىنعان ءار ماسەلەنىڭ ماڭىزى زور» دەپ اتاپ ءوتتى.
شارا بارىسىندا ءسوز العان قحا قاراستى ەتنومادەني بىرلەستىكتەردىڭ باسشىلارى دا پرەزيدەنت جولداۋىنا قولداۋ ءبىلدىرىپ, وندا كورسەتىلگەن باعىتتار مەن كوزدەلگەن ماقساتتار بارلىق قوعام مۇشەلەرىن بىرىكتىرە تۇسەتىن كۇش ەكەنىن ايتتى.
ارمان وكتيابر, «ەگەمەن قازاقستان»