كولىك پوليتسەيلەرى جولداۋدى جۇزەگە اسىرۋ مىندەتتەرىن تالقىلادى

 «ەل قاۋىپسىزدىگىن قامتاماسىز ەتۋدە ءبىز ەل پرەزيدەنتى ن.ءا. نازارباەۆتىڭ الدىمىزعا قويعان مىندەتتەرىن ۇنەمى باستى نازاردا ۇستانامىز. ءبىزدىڭ قىزمەتىمىز ەڭ الدىمەن ازاماتتاردىڭ ءومىرىن, كونستيتۋتسيالىق قۇقىقتارى مەن بوستاندىقتارىن  قورعاۋعا باعىتتالۋى ءتيىس»,  دەدى امانجول قابىلوۆ. ستراتەگيالىق قۇجاتتىڭ ماڭىزدىلىعىن ايتا كەلىپ, ا. قابىلوۆ پوليتسياعا دەگەن ازاماتتىق قوعامنىڭ سەنىمىن قىزمەتكەرلەردىڭ جوعارى ءبىلىمى مەن بىلىكتىلىگىنىڭ, سونداي-اق, جەكە قۇرام اراسىندا سىبايلاس جەمقورلىققا جول بەرمەۋدىڭ ارقاسىندا قول جەتكىزۋگە بولاتىنىن العا تارتتى.

دەپارتامەنتتىڭ شتاب-باسقارماسىنىڭ باستىعى پوليتسيا پولكوۆنيگى سالتانات جالعاسباەۆا ءوز بايانداماسىندا 2017 جىلى كولىك پوليتسەيلەرىمەن جەدەل جاي-كۇيدى تۇراقتاندىرۋعا باعىتتالعان ءىس-شارالار كەشەنى ويداعىداي جۇزەگە اسىرىلعانىن جەتكىزدى. ونىڭ ايتۋىنشا, دەپارتامەنتتىڭ قىزمەت كورسەتۋ اۋماعىندا وتكەن جىلى بارلىعى 2441 قىلمىستىق قۇقىق بۇزۋشىلىق تىركەلىپ, ولاردىڭ 1575-ءى قىلمىس جانە 866-ى قىلمىستىق تەرىس قىلىقتار. وتكىزىلگەن كەشەندى ۇيىمداستىرۋشىلىق-ادىستەمەلىك شارالاردىڭ ناتيجەسىندە قىلمىستار  11,9  پايىزعا, ونىڭ ىشىندە اۋىر قىلمىستار  11,2 پايىزعا, بۇزاقىلىق 14 پايىزعا, ۇرلىق 11پايىزعا, الاياقتىق 6,9 پايىزعا تومەندەگەن. 

بۇدان سوڭ بىرقاتار جەلىلىك ءبولىنىس باسشىلارىنىڭ ەسەپتەرى تىڭدالدى.

وتكەن جىلدىڭ 12 ايى ىشىندە بارلىعى 54 مىڭ قۇقىق بۇزۋشى اكىمشىلىك جاۋاپكەرشىلىككە تارتىلىپ, 94,4 ملن. تەڭگە اكىمشىلىك ايىپپۇل سالىنعان. دەپارتامەنتتىڭ جەلىلىك بولىنىستەرىنىڭ كۇشىمەن زاڭسىز اينالىمنان 255 كەلى ءتۇرلى ەسىرتكى زاتتارى تاركىلەنىپ الىنىپ, ەسىرتكى كونترابانداسىنىڭ 15 فاكتىسى انىقتالعان.

باسقوسۋ بارىسىندا مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىنىڭ باسىم باعىتتارى تالقىلاندى.

سونىمەن قاتار, قادر ساياساتىن جەتىلدىرۋ, جاۋىنگەرلىك-قىزمەتتىك دايىندىق جانە جەكە قۇرام اراسىنداعى ءتارتىپتى قامتاماسىز ەتۋ بويىنشا شارالاردى نىعايتۋ ماسەلەلەرى ءسوز بولدى.

ءماجىلىستى قورىتىندىلاعان ەلىمىزدىڭ باس كولىك پوليتسەيى وتكەن جىلى جىبەرىلگەن كەمشىلىكتەردى الداعى ۋاقىتتا بولدىرماۋدىڭ جولدارىن ايتا كەلىپ, ىشكى ىستەر جەلىلىك بولىنىستەرى باسشىلارىنا ازاماتتاردىڭ وتىنىشتەرى مەن حابارلامالارىن تولىق تىركەۋ, اۋە جانە تەمىر جول كولىكتەرى نىساندارىندا ورىن العان قىلمىستاردى اشۋدى جالعاستىرۋ بويىنشا بىرقاتار مىندەتتەر جۇكتەدى.

راۋان قايدار,

«ەگەمەن قازاقستان».