سالاماتتى ءومىر سالتىن ناسيحاتتاۋ ارقاشان دا مەملەكەتتىڭ نەگىزگى مىندەتتەرىنىڭ ءبىرى بولىپ قالا بەرەدى. مەملەكەت باسشىسى ن.نازارباەۆ ءوزىنىڭ «قازاقستان – 2050» ستراتەگياسىندا «ۇلتتىڭ دەنىنىڭ ساۋلىعى – ءبىزدىڭ تابىستى بولاشاعىمىزدىڭ نەگىزى» دەپ اتاپ كورسەتتى.
ەلىمىزدىڭ مەديتسينالىق قاۋىمداستىعى دابىل كوتەرىپ, كوپشىلىك ورىنداردا ساتۋعا شەكتەۋ قويىلعانىنا قاراماستان جاس بالالار مەن جاسوسپىرىمدەردىڭ ەنەرگەتيكالىق سۋسىنداردى تۇتىنۋىنىڭ ارتىپ كەلە جاتقانىن ايتۋدا.
قازاقستاندىق دارىگەر مامانداردىڭ ايتۋىنا قاراعاندا, ەنەرگەتيكالىق سۋسىنداردىڭ قۇرامىندا ەسىرتكى زاتتارى بار, ولار ورتالىق نەرۆ جۇيەسىنىڭ بۇزىلۋىنا اسەر ەتەدى. بالا ونى ءبىرشاما ۋاقىت ۇزبەي ىشسە ابدەن داعدىلانىپ, بايلانىپ قالۋى دا عاجاپ ەمەس. سۋسىنداردىڭ وسىنداي جامان بەلگىلەرى تۋرالى اقپارات سىرتىنا وتە ۇساق ارىپتەرمەن اجىراتۋعا قيىن ەتىلىپ جازىلعان. ال پايدالى جاقتارى كەرىسىنشە, ۇلكەن ارىپتەرمەن, كوزگە بىردەن تۇسەتىن ەتىپ, جاقسى جارناما تۇرىندە بەرىلگەن. قۇقىق قورعاۋ ورگاندارىنىڭ قىزمەتكەرلەرى وسىنداي ەنەرگەتيكالىق سۋسىنداردى كوپ ىشەتىن بالالاردىڭ بۇزاقى, تەنتەك مىنەزدەرىمەن ءجيى كوزگە ءتۇسىپ, تەمەكىگە دە باسقا بالالارمەن سالىستىرعاندا ءۇش ەسە ءۇيىر بولاتىنىن, ەسىرتكىگە دە قۇمار بولىپ, ءتۇرلى قىلمىستارعا دا ءجيى باراتىنىن ايتادى.
شەتەلدىك مامانداردىڭ ايتۋىنا قاراعاندا, ەنەرگەتيكالىق سۋسىندار قورقىنىش, ۇيقىسىزدىق, ۇرەيلەنۋ, اشۋلانشاقتىق, جۇرەكتىڭ قاتتى سوعىسى سياقتى كەسەلدەردىڭ تۋىنا سەبەپكەر بولاتىن كورىنەدى. دۇنيەجۇزىلىك دەنساۋلىق ساقتاۋ ۇيىمى بالالار اراسىنداعى جۇرەك-قان تامىرلارى سىرقاتتارى مەن جۇيكە جۇيەسىنىڭ بۇزىلۋىن, اسقازان-ىشەك اۋرۋلارىن بولدىرماۋدىڭ ءبىر جولى – ەنەرگەتيكالىق سۋسىنداردى شەكتەۋ ەكەنىن ايتقان. سوندىقتان دامىعان ەلدەردىڭ كوبىندە بۇل سۋسىنداردى ساتۋعا تۇتاستاي نەمەسە جارتىلاي شەكتەۋ قويىلعان.
ءبىزدىڭ ەلىمىزدە قازاقستاننىڭ مەملەكەتتىك باس سانيتارلىق دارىگەرىنىڭ 2013 جىلدىڭ 19 تامىزداعى «سەرگىتەتىن كومپونەنتتەرى بار سۋسىنداردى ساتۋعا تىيىم سالۋ تۋرالى» اتتى قاۋلىسىمەن ورتا جانە ارناۋلى ورتا ءبىلىم بەرەتىن مەكەمەلەردە, جوعارى وقۋ ورىندارىندا, دەنساۋلىق ساقتاۋ مەكەمەلەرىندە, جاسوسپىرىمدەر مەن جاستار كوپ جينالاتىن ورىندارداعى مادەني-كوپشىلىك شارالاردا مۇنداي سۋسىنداردى ساتۋعا تىيىم سالىنعان.
الايدا بۇل تىيىم ءوزىنىڭ ناتيجەسىن كورسەتە الماي وتىر, اتالعان جەردىڭ بارىندە ەنەرگەتيكالىق سۋسىندار كەدەرگىسىز ساتىلىپ جاتاتىنىن كورەمىز. ءتىپتى, مۇنداي جەرلەردە ساتىلماعاننىڭ وزىندە جاسوسپىرىمدەر كوشەنىڭ كەز كەلگەن بۇرىشىنان ونى وپ-وڭاي ساتىپ الىپ جاتادى. سوندىقتان ۇكىمەت باسشىسى ءوزىنىڭ ارنايى قاۋلىسىمەن ەلىمىزدىڭ بارلىق تۇكپىرلەرىندە جاستارى كامەلەتكە تولماعاندارعا وسىنداي سۋسىنداردى مۇلدە ساتپاۋ تۋرالى وكىم بەرگەنى ءجون. سپيرتتىك ىشىمدىكتەردى ساتۋعا وسىنداي تىيىم بەرىلگەن سوڭ ونى ساتۋ شەكتەلدى عوي, ەنەرگەتيكالىق سۋسىندارعا دا سونداي شارا كەرەك. سونىمەن قاتار وسى قاۋلىنى بۇزعان ساتۋشىلارعا قانداي اكىمشىلىك جازا قولدانىلاتىنى دا وسى قاۋلىدا قاراستىرىلعانى دۇرىس. سوندا ءبىز جاسوسپىرىمدەر مەن بالالاردىڭ دەنساۋلىعىن ساقتايتىن بولامىز. ماجىلىستەگى «نۇر وتان» پارتياسى فراكتسياسىنىڭ ءبىر توپ مۇشەلەرى وسى ۇسىنىسىمىزدى پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال رەتىندە جولدادىق
ساكەن قانىبەكوۆ,
ءماجىلىس دەپۋتاتى.