قازاقستان رەسپۋبليكاسىنىڭ قۇرمەتتى اتاقتارى مەن مەملەكەتتىك ناگرادالارىن يەلەنگەن شىعارماشىلىق تۇلعالارعا, مادەنيەت قايراتكەرلەرىنە, سونداي-اق دارىندى جاستارعا قولداۋ كورسەتۋ ماقساتىندا بەرىلەتىن قازاقستان رەسپۋبليكاسى تۇڭعىش پرەزيدەنتى – ەلباسىنىڭ 2017 جىلعى مەملەكەتتىك ستيپەندياسى يەگەرلەرىنىڭ ەسىمى بەلگىلى بولدى.
ەلباسى تاپسىرماسى بويىنشا مەملەكەتتىك حاتشى گۇلشارا ابدىقالىقوۆا بيىلعى جىلعى مادەنيەت سالاسىنداعى ستيپەنديالاردى تابىس ەتتى. ستيپەنديالار ەلىمىزدىڭ مادەنيەتىن قالىپتاستىرۋعا, ساقتاۋعا جانە دامىتۋعا قوسقان ۇلەسى ءۇشىن شىعارماشىلىق وكىلدەرىنە جىل سايىن بەرىلىپ كەلەدى. بيىلعى مەملەكەتتىك ستيپەنديا ادەبيەت پەن ونەر سالاسىنىڭ 75 قايراتكەرىنە بەرىلدى. ستيپەنديا ءاسانالى ءاشىموۆ, بيبىگۇل تولەگەنوۆا, ءسابيت ورازباەۆ, مىرزاتاي جولداسبەكوۆ, ءسابيت دوسانوۆ, ەسمۇحان وباەۆ, مەرۋەرت وتەكەشەۆا, روزا اشىربەكوۆا, ەسكەندىر حاسانعاليەۆ, نۇرعالي ءنۇسىپجانوۆ, احمەت اشيري, تىنىمباي نۇرماعامبەتوۆ, مارفۋعا ايتقوجينا, نۇكەتاي مىشباەۆا, اقۇشتاپ باقتىگەرەەۆا, تاعى باسقا ادەبيەت پەن ونەردىڭ ءىرى وكىلدەرىنە تابىس ەتىلدى. سونداي-اق مەدەت شوتاباەۆ, يرينا تەن, ءادىل احمەتوۆ, جامبىل دۇيسەنوۆ جانە باسقا دا جاس دارىندارعا مەملەكەتتىك قولداۋ كورسەتىلدى.
سالتاناتتى شارانى اشىپ, مەملەكەتتىك سىياقىعا يە بولىپ, مەرەيى تاسىعان ۇلت ماقتانىشتارىن قۇتتىقتاعان گ.ابدىقالىقوۆا ونەر مەن مادەنيەتتەگى بيىلعى ەلەۋلى جەتىستىكتەردى اتاپ ءوتتى. مەملەكەتتىك حاتشى قازاقستان پرەزيدەنتىنىڭ: «ۇلتتىڭ الەۋەتىن ارتتىرۋ ءۇشىن مادەنيەتىمىز بەن يدەولوگيامىزدى ودان ءارى دامىتۋىمىز كەرەك. «رۋحاني جاڭعىرۋدىڭ» ءمان-ماڭىزى دا ناق وسىندا. ءوزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاھاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋى ءتيىس», دەگەن سوزىنە راسىمگە قاتىسۋشىلار نازارىن اۋداردى.
جيىندا كسرو حالىق ءارتيسى ءاسانالى ءاشىموۆ, اقىن اقۇشتاپ باقتىگەرەەۆا, جاستاردان تالانتتى وپەرا ءانشىسى مەدەت شوتاباەۆ, تەلەجۇرگىزۋشى يرينا تەن, اكتريسا روزا اشىربەكوۆا ەلباسىنىڭ قامقورلىعىنا راحمەت ايتىپ, لەبىز ءبىلدىردى. مەملەكەت تاراپىنان بەرىلىپ وتىرعان ماتەريالدىق جاردەم وزدەرىن شابىتتاندىرىپ, تالانتتارىن جارقىراتىپ كورسەتۋگە قولايلى جاعداي تۋعىزاتىنىن ايتتى. «پرەزيدەنتىمىزدىڭ ونەر مەن ادەبيەتكە, تالانت پەن دارىنعا دەگەن كوزقاراسىنا ءوز باسىم ريزامىن. مەملەكەت باسشىسىنىڭ بۇل ءىلتيپاتى ءبىزدى دە ۇلكەن مىندەت پەن جاۋاپكەرشىلىككە باعىتتايدى. مىنە, ورتامىزدا جاسى 102-گە كەلگەن قازاقتىڭ ۇلكەن اكتريساسى ايشا ابدۋللينا پرەزيدەنتتىڭ وسى ىقىلاسىنا بولەنۋ ءۇشىن سوناۋ شىمكەنتتەن كەلىپ وتىر. بۇل – ونەردىڭ كۇشى! ونەر ءبىزدى ەل قۇرمەتىنە بولەسە, ەلباسى ءبىزدى قۇرمەتتەپ وتىر. ەلدى العا سۇيرەيتىن ادەبيەت, ونەر, سپورت. پرەزيدەنتىمىزدىڭ وسى سەنىمىنە لايىق بولۋ ءۇشىن ءبىز دە ءوز پارىزىمىزدى ادال اتقارۋدى ۇمىتپايىق», دەدى.
مەملەكەتتىك حاتشى ەلباسىنىڭ حالىققا ارناعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا العا قويىلعان مىندەتتەردىڭ ىسكە اسىرىلۋىنا جانە ەلىمىزدىڭ مادەنيەتى مەن ونەرىنىڭ ودان ءارى دامۋىنا قازاقستاننىڭ شىعارماشىل زيالى قاۋىم وكىلدەرى الداعى ۋاقىتتا دا ەلەۋلى ۇلەس قوسادى دەگەن سەنىمىن ءبىلدىردى.
ايگۇل احانبايقىزى,
«ەگەمەن قازاقستان»
الماتى