ايماقتا ۆەتەرينار مامانداردىڭ جەتىسپەۋى, مال اۋرۋى, اۋىل شارۋاشىلىعى سالاسىنداعى مەملەكەتتىك قولداۋ شارالارى تۋرالى وبلىس اكىمى نۇرلان نوعاەۆتىڭ قىزىلقوعا اۋدانىندا وتكىزگەن كوشپەلى ماجىلىسىندە ايتىلدى. بۇل تۋرالى اتىراۋ وبلىستىق وڭىرلىك كوممۋنيكاتسيالار قىزمەتى حابارلايدى.
جەرگىلىكتى اتقارۋشى ورگانداردىڭ قولداۋى ارقاسىندا مۇنايلى ايماقتاعى اۋىل شارۋاشىلىعى سالاسىندا سوڭعى جىلدارى وڭ وزگەرىستەر بولدى. اگروونەركاسىپ كەشەنىندە جاڭا جوبالار جۇزەگە اسىپ, بۇرىن وڭىردە قولعا الىنباي كەلگەن دايىن ءونىم شىعارۋ مەن وڭدەۋ ءىسى باستاۋ الدى. وتكەن 2017 جىلى وبلىستا مال باسى كوبەيدى. سونىڭ ىشىندە تۇيە مەن جىلقى سانى 13,5 جانە 3,6 پايىزعا دەيىن ارتتى.
وبلىس اكىمى مال اۋرۋىنىڭ, سونىڭ ىشىندە برۋتسەللەزدىڭ الدىن الۋدا ناقتى شارالار قابىلداۋ كەرەكتىگىن ايتتى. وسى سالادا ماماندار دايىنداۋ, تارتۋ, مەديتسينيكالىق پرەپاراتتار مەن ۆاكتسينالار الۋ, مال سويۋ تسەحتارىن سالۋ, تۇرعىندار اراسىندا سانيتارلىق مادەنيەتتى ارتتىرۋ بويىنشا كەشەندى باعدارلاما جاساۋدى تاپسىردى. مالىمەتتەرگە سايكەس مال اۋرۋىنىڭ 80 پايىزى جەكە قولداعى ءتورت ت ۇلىك اراسىندا كەزدەسەدى.
-بىزگە ماماندار تارتۋ كەرەك. ستۋدەنتتەردى وقىتۋعا گرانت ءبولۋ جۇيەسى بار. قانشا گرانت كەرەك بولسا, سونشا بەرەمىز. باستىسى, وسى سالادا ءبىلىم الۋعا تالاپتاناتىن جاستار بولۋى كەرەك, - دەدى نۇرلان نوعاەۆ. – جاۋاپتى ادامدارعا ۆەتەرينار مامانداردى تۇرعىن ءۇيدى جەڭىلدىكپەن الۋشىلار قاتارىنا قوساتىن, باسقا دا الەۋمەتتىك جاردەماقىلار تولەنەتىن ساناتقا قوسۋ ماسەلەسىن شەشۋدى تاپسىرامىن.
مەملەكەتتىك قولداۋ شارالارىنا كەلسەك, ايماقتا اۋىل شارۋاشىلىعىن سۋبسيديالاۋ ون باعدارلاما بويىنشا جۇرگىزىلەدى. سول ارقىلى 720 شارۋا قوجالىعى 2,6 ملرد تەڭگە سوماسىندا مەملەكەتتىك قولداۋعا يە بولعان. بۇل باعىتتاعى جۇمىستار ماحامبەت, قىزىلقوعا, قۇرمانعازى اۋداندارىندا جاقسى جۇزەگە اسىپ جاتىر. بيىل اۋىل شارۋاشىلىعىن سۋبسيديالاۋعا 2,9 ملرد تەڭگە ءبولىندى. وبلىس اكىمى وسى رەتتەگى جۇمىستاردىڭ قاتاڭ باقىلاۋدا بولاتىنىن دا اتاپ ايتتى.
- بۇل وتە ماڭىزدى ماسەلە, سوندىقتان بارشاڭىزدىڭ دا جاۋاپكەرشىلىكپەن قاراۋلارىڭىزدى سۇرايمىن, - دەدى نۇرلان نوعاەۆ. – شارۋالار سۋبسيديانى ۋاقىتىلى الىپ وتىرۋلارى كەرەك. مەملەكەت باسشىسى اۋىل شارۋاشىلىعىن قولداۋ قاجەتتىگى جايلى ۇنەمى ايتادى. ءبىز قولداۋدىڭ قاجەت كەزدە جانە قاجەت ۋاقىتىندا بولۋىنا جاعداي جاسايىق. كاسىپكەرلەر پروبلەمالارىنىڭ شەشىلۋ مەرزىمى ۇزاپ كەتەتىنىنە, سۋبسيديا ابدەن جۇمىستى ءبىتىرىپ بولعان سوڭ عانا بەرىلەتىنىنە شاعىمدانباسىن. سۋبسيديا شارۋالارعا ابدەن اياقتالعاننان كەيىن ەمەس, ناقتى جۇمىس بارىسى كەزىندە كەرەك. بۇگىندە ايماق كارتوپقا دەگەن قاجەتتىلىكتىڭ 46 پايىزىن, كوكونىستەرگە دەگەن قاجەتتىلىكتىڭ 154,8, باقشا ونىمدەرىنىڭ 129,3 پايىزىن ءوزى قامتاماسىز ەتىپ وتىر. الداعى ۋاقىتتا كارتوپقا قاجەتتىلىكتى جەرگىلىكتى ونىمدەر ارقىلى تولىق جابۋ جوسپاردا بار, ول ءۇشىن ەگىن شارۋاشىلىعىندا جاڭا تەحنولوگيالار ەنگىزۋگە كوڭىل بولىنۋدە.