التاي مەن الاتاۋدىڭ اراسىن كەزىپ, ساق-ساق كۇلگەن سارى اياز ءبىر جاعىنان تالاي جاندى اۋرەگە سالىپ, قىسپاققا العانىمەن, ەكىنشى جاعىنان ادامداردىڭ جۇرەگىنە مەيىرىمدىلىك, قايىرىمدىلىق سەزىمدەرىن ۇيالاتقانداي.
كەشە عانا بۇقارالىق اقپارات قۇرالدارىنان ايالدامادا تۇرىپ شىڭىلتىر ايازدىڭ شىرماۋىنا تۇسكەن ەلوردا تۇرعىندارىنا ىستىق شاي تاراتىلعانىن وقىپ ەدىك. مۇنداي ىزگى ىستەر ءبىزدىڭ وڭىردە دە باستاۋ الدى. 23 قاڭتار كۇنى وسكەمەندەگى حاليفا التاي مەشىتى, وسكەمەن ورتالىق مەشىتى, مۇحامادي جانە زاششيتا مەشىتتەرى باستاعان قالاداعى بارلىق مەشىتتەردەن 20-دان استام تاكسي شىعىپ, ايالدامادا اۆتوبۋس كۇتىپ اياز قارىعان تۇرعىنداردى قالاعان جەرلەرىنە دەيىن جەتكىزىپ سالدى. «يمامدارىمىز كۇندىز جانە كەشكى مەزگىلدەردە كىسى كوپ جينالاتىن جەرلەرگە ارنايى باردى. يگى ىسكە اتسالىسۋعا مەشىت جاماعاتتارىمەن قاتار, كولىگى بار قالا تۇرعىندارى دا قوسىلىپ جاتىر. بۇگىن اماندىق بولسا 53 ورىندىق ۇلكەن اۆتوبۋس شىعارۋدى جوسپارلاپ وتىرمىز. بۇل اۆتوبۋس «وزەن ۆوكزالى» ايالداماسىنان احمەر اۋىلىنا دەيىنگى باعىتتا جۇرەتىن بولادى. سونىمەن قاتار قالالىق ىشكى ساياسات بولىمىمەن بىرلەسىپ ايالدامالارعا بارىپ, ادامدارعا ىستىق شاي تاراتتىق», دەيدى وسكەمەندەگى حاليفا التاي مەشىتىنىڭ نايب-يمامى داۋلەت قابيبولدين.
وسكەمەن قالالىق ىشكى ساياسات ءبولىمىنىڭ قىزمەتكەرى الىبەك تۇرسىمبەتوۆ «يمام-تاكسي» جوباسى 23 قاڭتار كۇنى تۇسكى ساعات 1-دەن باستاپ ۇيىمداستىرىلىپ, «وزەن ۆوكزالى» – احمەر اۋىلى, وبلىستىق مەشىت – جمك (جىبەك ماتالار شاعىن اۋدانى), ورتالىق بازار – ابلاكەت شاعىن اۋدانى سەكىلدى ءۇش باعىتتا جۇرگەنىن ايتادى. «تاكسيلەر كوشەدە قول كوتەرگەن كىسىلەردى دە وتىرعىزىپ الىپ, قالاعان جەرلەرىنە جەتكىزدى. كەشكى ساعات بەس جارىمنان باستاپ وسكەمەندەگى جاستار رەسۋرستىق ورتالىعىنىڭ ەرىكتىلەرى وبلىستىق مەشىتتىڭ يمامدارىمەن بىرگە قالاداعى ەڭ ۇلكەن ايالدامالاردا ىستىق شاي تاراتتى. بۇل اكتسيا ايازدىڭ بەتى قايتقانشا جالعاساتىن بولادى», دەيدى ول.
رەتى كەلگەندە ايتا كەتەيىك, «يمام-تاكسي» جوباسىن وبلىستىق مەشىت قىزمەتكەرلەرى بۇعان دەيىن رامازان ايىندا ۇيىمداستىرعان بولاتىن.
ازامات قاسىم, «ەگەمەن قازاقستان»
وسكەمەن