وسىدان ءبىراز ۋاقىت بۇرىن الەۋمەتتىك جەلىلەردە اۋليەاتالىق ازاماتتىڭ «قازاقۆاگەن» كولىگىن جاساعانى تۋرالى جازىلعان بولاتىن. قاراپايىم قويشىنىڭ بۇل جەتىستىگى ءبىر كۇندە ونى ونەرتاپقىش رەتىندە تانىتتى.
ادەتتە «گەلەندۆاگەن» كولىگىن جۇرتتىڭ ءبارى بىلەدى. ونىڭ باعاسىنىڭ دا قىمبات, مۇمكىندىگىنىڭ دە جوعارى ەكەنى بەلگىلى. ال مىنا بۇرىن جۇرت ەستىپ-كورمەگەن «قازاقۆاگەن» كولىگىنىڭ قۇراستىرىلۋى شىنىندا دا ەلدى ەلەڭ ەتكىزدى.
كولىكتى ويلاپ تاپقان ونەرتاپقىشتىڭ اتى-ءجونى – تولەگەن يۋسۋپوۆ. تالاس اۋدانىنىڭ تۋماسى. قاراپايىم قويشى ءۇش دوڭگەلەكتى موتوتسيكلدەن كولىك جاساپ, ونىڭ اتىن «قازاقۆاگەن» دەپ قويىپتى. العاشىندا تولەگەننىڭ بۇل كولىگىنە قىزىققان كورشىلەرى ونى ۆيدەوعا ءتۇسىرىپ الىپ, الەۋمەتتىك جەلىلەرگە جاريالاپ جىبەرگەن. سودان بەرى «قازاقۆاگەن» كولىگىن قىزىقتاۋشىلار دا, وعان تامسانۋشىلار دا كوپ.
ءبىر قاراعاندا «گەلەندۆاگەن» كولىگىنە كەلەتىن «قازاقۆاگەن» ساعاتىنا 80 شاقىرىم جىلدامدىقپەن جۇرەدى. تاعى ءبىر ارتىقشىلىعى, 100 شاقىرىم قاشىقتىققا 1 ليتر جانارماي جاعادى ەكەن. بۇل كولىك نەگىزىنەن كۇن باتارەياسىمەن جۇمىس ىستەيدى.
«قازاقۆاگەن» جول تالعامايدى. ءۇش ادام سىياتىن ورنى مەن جۇك سالعىشى بار. تولەگەن يۋسۋپوۆ بۇل كولىكپەن مال باعىپ, ءتىپتى جاقىندارى مەن دوستارىنىڭ تويىنا دا باراتىنىن ايتادى. ال اتالعان كولىكتى ونەرتاپقىشتىڭ قالاي جاساپ شىعارعانىن بىلگىسى كەلەتىندەر دە كوپ. اۋەلى ونەرتاپقىش ءۇش دوڭگەلەكتى موتوتسيكلگە قوزعالتقىش پەن رۋل ورناتقان. ودان كەيىن سىرتىن اليۋمينيمەن قاپتاپتى. ءوزى كولىكتى قۇراستىرىپ شىعارۋدا ەشقانداي شىعىن بولماعانىن ايتادى. ونىڭ ىشىندە قۋاتتاعىش, پەش, كونديتسيونەر دە بار ەكەن. داۋىلدا دا, جاۋىندا دا, اياز بەن اپتاپ ىستىقتا دا جول تالعامايتىن «قازاقۆاگەن» كولىگىنە ءبىراز ازاماتتار تاپسىرىس بەرىپ قويىپتى.
حاميت ەسامان, «ەگەمەن قازاقستان»
جامبىل وبلىسى