ەۋرازيالىق توپ (ERG) قۇرامىنداعى «قازحروم» تۇك» اق فيليالى – اقسۋ فەرروقورىتپا زاۋىتىندا قولعا الىنعان جاڭا جوبانى «ERG كوممەرتسيالىق ورتالىعى» جشس جانە «ترانسكوم» جشس بىرلەسە جۇزەگە اسىردى.
ىسكە قوسىلعان يننوۆاتسيالىق قوندىرعى قىس كەزىندە جۇك ۆاگوندارىندا جولدا قاتىپ قالعان جۇكتەردىڭ ءتۇسىرىلۋىن جەدەلدەتىپ, زاۋىتقا جەتكەن كەزدە ۆاگونداردىڭ تۇرىپ قالۋ ۋاقىتىن ازايتاتىن كورىنەدى.
– جالپى, ءار كاسىپورىندا جۇك تاسۋشى ۆاگونداردىڭ «جىبىتكىشى» بولۋ كەرەك دەگەن ماسەلە بۇرىننان تالقىلانىپ كەلدى, – دەيدى كاسىپورىن ديرەكتورى سەرگەي پروكوپەۆ. – شەتەل كاسىپورىندارىنىڭ تاجىريبەسى دە زەرتتەلدى. وتكەن كۇزدە ناقتى شەشىمگە كەلدىك. سولتۇستىكتىڭ سۋىق اۋا رايىنا ساي, قوندىرعىنى ورنالاستىرۋدىڭ ءتيىمدى ورنى, قۇرىلىمى مەن قولدانىلاتىن جابدىقتىڭ ءتۇرى انىقتالدى.
ءسويتىپ العاشقى كەزەگى پايدالانۋعا بەرىلگەن ۆاگون «جىبىتكىش» الىپ قوندىرعى ىشىنە بىردەن 8 جۇك ۆاگونى تۇراتىنداي مۇمكىندىك تۋدى. ناتيجەسىندە, ۆاگون جاقتاۋلارى نەبارى جارتى ساعاتتا 70وس دەيىن قىزادى. اۆتوماتتاندىرىلعان باقىلاۋ جۇيەسى قۋاتتى رەتتەپ وتىرادى. كەلەسى كەزەكتە قوندىرعى تاۋلىگىنە شيكىزات تيەلگەن 50 جۇك ۆاگونىن ء«جىبىتىپ», جوبالىق قۋاتىندا جۇمىس ىستەي باستايدى. ەرەكشە قوندىرعى كاسىپورىننىڭ ءونىمدى جۇمىس جاساۋىنا دا اسا قاجەت. ۆاگوندارعا تيەلگەن شيكىزاتتىڭ توقتاۋسىز جەتكىزىلۋى, ءتۇسىرىلۋى ماڭىزدى. زاۋىتتا جىل سايىن 1 ميلليون توننادان اسا فەرروقورىتپا وندىرىلسە, قازىر باسىم بولىگى الىس شەتەلدەرگە ەكسپورتتالۋدا. كاسىپورىندا سوڭعى بىرنەشە جىلدىڭ ىشىندە وندىرىستىك, ەكولوگيالىق جانە الەۋمەتتىك ينۆەستيتسيالىق كوپتەگەن جوبالار جۇزەگە اسىرىلىپ كەلەدى. زاۋىت ماماندارى, جۇمىسشىلارى ەڭبەك جەتىستىكتەرمەن بىرگە, قىس كەزىندە جولدان كەلگەن شيكىزات تيەگەن جۇك ۆاگوندارىن «جىبىتكىش» سياقتى يننوۆاتسيالىق شەشىمدەردى ىزدەستىرۋ جولىندا ەڭبەك ەتۋدە.
فاريدا بىقاي, «ەگەمەن قازاقستان»
پاۆلودار وبلىسى, اقسۋ قالاسى