قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ رەسەي فەدەراتسياسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ميحايل بوچارنيكوۆپەن كەزدەستى, دەپ حابارلايدى اقوردانىڭ ءباسپاسوز قىزمەتى.
مەملەكەت باسشىسى قازاقستانداعى ديپلوماتيالىق ميسسياسىنىڭ اياقتالۋىنا بايلانىستى رەسەي فەدەراتسياسىنىڭ ەلشىسى م.بوچارنيكوۆپەن كەزدەستى. نۇرسۇلتان نازارباەۆ م.بوچارنيكوۆتىڭ قازاقستان مەن رەسەي اراسىنداعى قارىم-قاتىناستى نىعايتۋعا قوسقان ۇلەسىن ەرەكشە اتاپ ءوتىپ, ونىڭ قازاقستانداعى ديپلوماتيالىق قىزمەتىنە ريزاشىلىق ءبىلدىردى.
- ءسىز رەسەيدىڭ قازاقستانداعى ەلشىسى رەتىندە 11 جىل قىزمەت اتقاردىڭىز. بۇل جىلدار ىشىندە قازاقستان مەن رەسەي اراسىنداعى قارىم-قاتىناس نىعايدى. ءبىز ديپلوماتيالىق بايلانىستارىمىزدىڭ 25 جىلدىعىن اتاپ وتتىك. وڭىرارالىق ىنتىماقتاستىعىمىز دامىپ, جوعارى دەڭگەيدەگى ساپارلار مەن كەزدەسۋلەرىمىز جيىلەي ءتۇستى. ءبىزدىڭ سەرىكتەستىگىمىز - مەملەكەتارالىق قارىم-قاتىناستىڭ جارقىن مىسالى, - دەدى قازاقستان پرەزيدەنتى. مەملەكەت باسشىسى ەكى ەلدىڭ حالىقارالىق ارەنادا تابىستى ىقپالداستىق ورناتقانىن ايتتى.
- ءبىز حالىقارالىق دەڭگەيدە ءبىر-ءبىرىمىزدى قولدايمىز. اقش-قا ساپارىم كەزىندە رەسەي مەن امەريكا اراسىنداعى قارىم-قاتىناس ماسەلەسىنە زور ءمان بەردىم, - دەدى نۇرسۇلتان نازارباەۆ. ميحايل بوچارنيكوۆ ەكى ەل اراسىنداعى قارىم-قاتىناستاردىڭ جوعارى دەڭگەيدە دامىپ كەلە جاتقانىن ايتىپ, قازاقستاننىڭ جاھاندىق قاۋىپسىزدىكتى نىعايتۋ ىسىندەگى بەلسەندى قىزمەتىنە توقتالدى.
- قازاقستاندا 11 جىلدان استام اتقارعان قىزمەتىم بارىسىندا ەلدەرىڭىزگە دەگەن ريزاشىلىق سەزىمىم ارتا ءتۇستى. قازاقستاننىڭ بۇۇ قاۋىپسىزدىك كەڭەسىنە مۇشە بولۋى جانە بۇل ورگانعا توراعالىق ەتۋى حالىقارالىق بەيبىتشىلىك پەن قاۋىپسىزدىكتى قامتاماسىز ەتۋ ىسىندەگى ەلدەرىڭىزدىڭ ماڭىزدىلىعىن كورسەتىپ وتىر, - دەدى رەسەي فەدەراتسياسىنىڭ قازاقستانداعى ەلشىسى.
سونىمەن قاتار م.بوچارنيكوۆ ەكى ەلدىڭ ەۋرازيالىق ەكونوميكالىق وداق اياسىنداعى ىنتىماقتاستىعىنىڭ ناتيجەلەرى مەن الداعى پەرسپەكتيۆالارىن اتاپ ءوتتى. كەزدەسۋ سوڭىندا نۇرسۇلتان نازارباەۆ م.بوچارنيكوۆتى «دوستىق» وردەنىمەن ماراپاتتادى.