ىشكى ىستەر ۆيتسە-مينيسترى ەرلان تۇرعىمباەۆ مالىمدەگەندەي نەگىزگى بولجام بويىنشا اقتوبە وبلىسىنداعى اۆتوبۋستىڭ ورتەنىپ كەتۋىنىڭ سەبەبى ءورت قاۋىپسىزدىگى تالاپتارىن ساقتاماعانمەن بايلانىستى بولىپ وتىر. بۇل تۋرالى اقتوبە وبلىسى اكىمدىگىنىڭ ءباسپاسوز قىزمەتى حابارلادى.
«قازىرگى تاڭدا وقيعا ورنىنداعى جۇمىستار اياقتالدى. قازا بولعانداردىڭ مايىتتەرى وزبەكستانعا جىبەرىلدى. ول جاقتا بىرقاتار گەنومدىق ساراپتاما جۇرگىزىلىپ, مارقۇمداردىڭ دەنەلەرى تۋىستارىنا بەرىلەدى. نەگىزگى بولجامعا سايكەس, وتتى سالعىرت پايدالانۋ ءورتتىڭ شىعۋىنا سەبەپ بولعان. وقيعا ورنىندا دانەكەرلەيتىن شام تابىلدى. سونىمەن قاتار, تەرگەۋ كەزىندە بەس ليتر بەنزين قۇيىلعان پلاستماسسا ىدىستىڭ (اۆتوبۋستا) بولعاندىعى انىقتالدى» - دەدى ە.تۇرعىمباەۆ.
ونىڭ ايتۋىنشا, تەرگەۋ ورگاندارى زارداپ شەككەندەردەن جاۋاپ الۋدى 19 قاڭتار, جۇما كۇنى باستاعان.
«وتتى سالعىرت پايدالانعاندىعى جونىندەگى بولجام امان قالعانداردىڭ تۇسىنىكتەمەلەرىمەن راستالىپ وتىر. اۆتوكولىكتىڭ قوزعالتقىشى ءوشىپ قالىپ, كولىكتىڭ ءىشى سالقىن بولعان, سول كەزدە دانەكەرلەيتىن شام جىلىتقىش رەتىندە قولدانىلعان. ول ەكى ساعاتتان استام ۋاقىت جۇمىس ىستەيدى. سول كەزدە بەس ليترلىك ىدىستاعى بەنزين توگىلەدى دە, وت لاپ ەتەدى. ءسويتىپ, از ۋاقىتتا اۆتوبۋس ىشىندەگى ازاماتتاردىڭ بارلىعىنىڭ ءومىرىن جالمايدى. سونداي-اق, جول-كولىك وقيعاسى نەمەسە قانداي دا ءبىر كريمينالدىق جاعدايدىڭ بولۋى مۇمكىن دەگەن بولجامدار تولىقتاي جوققا شىعارىلدى. وقيعا ورنىن تەكسەرۋ اياقتالعاننان كەيىن اتالمىش اۆتوكولىكتەن ەشقانداي سۋىق قارۋ, اتىس قارۋى, وق-ءدارى نەمەسە سول وق-دارىلەردىڭ قالدىقتارى تابىلمادى», - دەپ جەتكىزدى ىشكى ىستەر ءمينيسترىنىڭ ورىنباسارى.
دەنساۋلىق ساقتاۋ ۆيتسە-ءمينيسترى الەكسەي تسوي اۋرۋحانادا جاتقان بەس ازاماتتىڭ دەنساۋلىعى تۋرالى ايتتى.
«سانيتارلىق اۆياتسيا ارقىلى جەتكىزىلگەن بارلىق ەمدەلۋشىلەر كەشەدەن بەرى تولىق تەكسەرىلدى. ولاردىڭ جاعدايى جاقسى, جاعداي تۇراقتى. پسيحولوگتار وتە بەلسەندى جۇمىس ىستەدى, ويتكەنى ەمدەلۋشىلەردى مورالدىق تۇرعىدان قالپىنا كەلتىرۋ قاجەت بولدى. بۇگىن جاعداي قالىپتى. زارداپ شەككەندەردىڭ دەنساۋلىعىنا ەشقانداي قاۋىپ ءتونىپ تۇرعان جوق. ولاردى اۋرۋحانادان شىعارۋعا بولادى», - دەدى ا. تسوي.
سونداي اق, جۇما كۇنى, استانا ۋاقىتى بويىنشا شامامەن 21:00-دە, ءورت كەزىندە قازا بولعان 52 ادامنىڭ ءمايىتىن وزبەكستان رەسپۋبليكاسىنىڭ توتەنشە جاعدايلار مينيسترلىگى اقتوبەدەن تاشكەنتكە ۇشاقپەن الىپ كەتتى.
«ۇشاق وزبەكستانعا كەلگەننەن كەيىن, قاجەت بولعان جاعدايدا, قوسىمشا تەرگەۋ شارالارى جۇرگىزىلەتىن بولادى. مايىتتەر تۋىستارىنا بەرىلەدى», - دەدى وزبەكستان رەسپۋبليكاسىنىڭ توتەنشە جاعدايلار ءمينيسترى رۋستام دجۋراەۆ.
ول سونداي-اق قازاقستان تاراپىنا كورسەتكەن كومەگى مەن قولداۋى ءۇشىن العىسىن ءبىلدىردى: «وزبەكستان پرەزيدەنتى رەسپۋبليكا ازاماتتارىنىڭ قازاسىنا بايلانىستى ۇكىمەتتىك كوميسسيا قۇردى. كوميسسيا مۇشەلەرى اقتوبە قالاسىنا جىبەرىلدى, بىزگە مۇندا بارىنشا كومەك بەرىلدى. جۇمىس ورنى, كولىك جەدەل تۇردە بەرىلىپ, مامانداردىڭ كومەگى كورسەتىلدى. بارلىعى قىسقا مەرزىمدە جۇرگىزىلدى. مۇندا بارلىق ماسەلەلەر تولىق شەشىلدى, ءمايىتتى انىقتاۋ, كۋاگەرلەردەن جاۋاپ الۋ كەزىندە ەشقانداي پروبلەمالار بولعان جوق. وسىعان بايلانىستى قازاقستان رەسپۋبليكاسىنىڭ پرەزيدەنتىنە, ۇكىمەتى مەن وسى ەكى كۇن بويى بىزگە كومەكتەسكەن بارلىق مينيسترلىكتەر مەن مەكەمەلەرگە العىس ايتقىم كەلەدى. قايعىمىزدى بولىسكەندەرىڭىز ءۇشىن راحمەت», - دەدى مينيستر.