قاراعاندى وبلىسى اۋماعىندا ۇزىندىعى 800 شاقىرىم بولاتىن اۆتوكولىك جولدارىن جوندەۋ جوسپارعا ەندى. بۇل جۇمىستارعا 39 ملرد تەڭگەدەن استام قارجى قاراستىرىلدى, دەپ حابارلايدى قازاقپارات.
ەلباسىنىڭ بيىلعى جولداۋىن تالقىلاۋعا ارنالعان اكتيۆتىڭ جينالىسىندا وبلىس اكىمى ەرلان قوشانوۆ اۋدان ورتالىقتارى ىشىندەگى جولداردى جوندەۋگە قارجى قاراستىرىلعانىن اتاپ ءوتتى. بۇرىندارى بۇل جۇكتەمەنى اۋدان اكىمدىكتەرى مەن رەسپۋبليكالىق قازىنا ورىنداپ كەلدى. ەندى جولداردى قالپىنا كەلتىرۋ شارالارىن وبلىستىق بيۋدجەت ەسەبىنەن ىسكە اسىرۋعا شەشىم قابىلداندى.
«قاراعاندى وبلىسىنىڭ ترانزيتتىك الەۋەتى زور. بۇگىنگى جاعدايدى ەسكەرە وتىرىپ, ءبىز بۇل باسىمدىقتى تولىق دەڭگەيدە پايدالانا الۋىمىز كەرەك. مەملەكەت باسشىسى جولداردىڭ جەرگىلىكتى جەلىلەرىن جوندەۋ مەن قايتا سالۋعا قاتىستى قارجىلاندىرۋ سوماسىن ارتتىرۋعا تاپسىرما بەرگەن بولاتىن. وتكەن جىلى ەلەۋلى جۇمىستار اتقارىلدى, ياعني 863 شاقىرىم جول جوندەۋدەن ءوتتى», - دەپ توقتالدى ءوڭىر باسشىسى.
بەلگىلى بولعانداي, 2018 جىلى ورتالىق-وڭتۇستىك دالىزىندەگى قاراعاندىدان تەمىرتاۋعا دەيىنگى ارالىقتا جۇمىستار اياقتالادى. وسى جىلعا قاراعاندى-جەزقازعان جولىنىڭ ۋچاسكەلەرىنە ورتاشا جوندەۋ شارالارى, سونىمەن قاتار وزگە دە جولداردى قامتۋ جوسپارلانعان. «اعىمداعى جىلى بيۋدجەتتەن جولداردى جوندەۋ جۇمىستارىنا 39 ملرد 100 ملن تەڭگە ءبولىندى. بۇل ءوز كەزەگىندە 800 شاقىرىم جولدى قامتۋعا مۇمكىندىك بەرەدى», - دەپ ناقتىلادى ە. قوشانوۆ.
اتاپ ايتقاندا, بيىل وبلىستىق ءارى اۋداندىق اۆتوجولدارداعى ءتورت كوپىر قايتا سالىنباق, سونداي-اق قاراباس-جانتاس جانە اقتوعاي-بالقاش باعىتتارىنداعى پروبلەمالى ۋچاسكەلەردە كۇردەلى جوندەۋ جۇرگىزىلمەك.