استانادا ميگراتسيالىق جانە تسيفرلى تۇرعىدا حالىققا قىزمەت كورسەتۋ ورتالىقتارىنىڭ (حقو) رەسمي اشىلۋ سالتاناتى ءوتتى.
وعان پرەمەر-ءمينيستردىڭ ورىنباسارى اسقار جۇماعاليەۆ, اقپارات جانە كوممۋنيكاتسيالار ءمينيسترى داۋرەن اباەۆ قاتىستى.
مەملەكەت باسشىسى نۇرسۇلتان نازارباەۆ ۇسىنعان «تسيفرلى قازاقستان» باعدارلاماسى ارقىلى ازاماتتاردىڭ ساۋاتتىلىعىن ارتتىرۋ كوزدەلىپ وتىر. جيىنعا قاتىسقان اقپارات جانە كوممۋنيكاتسيالار ءمينيسترى داۋرەن اباەۆ حقكو-نىڭ ءتيىمدى تۇستارى جايلى وي ءبولىستى.
– ەلەكتروندى حقو-نىڭ باستى ماقساتى – ازاماتتاردىڭ تسيفرلى تەحنولوگيالار ارقىلى قاجەتتى قۇجاتتارىنا جىلدام قول جەتكىزۋىن قامتاماسىز ەتۋ. وتكەن جىلى حقو 37 ميلليونعا جۋىق ادامعا قىزمەت كورسەتىپتى. ال ونىڭ 24 ميلليونى ەلەكتروندى قۇجاتتاردى تاڭداعان. جىل وتكەن سايىن قىزمەت كورسەتۋدىڭ ەلەكتروندى نۇسقاسىنا سۇرانىس كوبەيىپ كەلەدى. ەندى تسيفرلى حقو-نى ەلىمىزدىڭ وزگە دە قالالارىندا اشۋدى ماقسات ەتۋىمىز كەرەك, – دەدى داۋرەن اباەۆ.
اقپارات جانە كوممۋنيكاتسيالار ءمينيسترىنىڭ ايتۋىنشا, بۇرىن شەتەلدىك ازاماتتار قازاقستاندا جۇمىس ىستەۋى ءۇشىن قاجەتتى قۇجاتتاردى جيناۋىنا بەس كۇن جۇمساعان. ودان بولەك ءتۇرلى مەكەمەلەردەن ءوتۋى ءتيىس بولاتىن. ال ەندى ميگراتسيالىق حقو ارقىلى نەبارى ءبىر-ەكى ساعاتتا ءبارىن اياقتاۋعا بولادى.
سول سياقتى ۆەدومستۆو باسشىسى مۇنداي ورتالىقتاردىڭ زاڭسىز ەڭبەك ميگرانتتارىنىڭ ازايۋىنا دا سەپتىگى تيەتىنىن اتاپ ءوتتى.
– قازىرگى ۋاقىتتا زاڭسىز ميگرانتتار وزدەرىنىڭ قۇقىقتارىن بىلمەيدى. ال جۇمىس بەرۋشىلەر ءتۇرلى كەدەرگىلەرگە بايلانىستى شەتەلدىكتەردى جۇمىسقا اكەلۋدەن قورقاتىن. وعان بىردەن – ءبىر سەبەپ – قۇجات جيناۋ بارىسىندا ءبىراز ۋاقىت جۇمساۋى. ال ەندى ءبارى تەز شەشىلەتىندەي جاعداي جاسالىپ وتىر. سونىمەن قاتار ينۆەستيتسيالىق تارتىمدىلىعىمىزدى ارتتىرۋعا, تۋريستەردىڭ قاتارىن قالىڭداتۋعا بولادى دەگەن ويدامىن, – دەدى مينيستر.
مەملەكەت باسشىسى نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا «جەمقورلىقتىڭ الدىن الۋعا باعىتتالعان كۇرەس جالعاسا بەرەدى. كوپ جۇمىس ىستەلىپ جاتىر», دەلىنگەن. ال ەڭبەك ميگراتسياسىندا كولەڭكەلى تۇستاردىڭ دا جوق ەمەستىگى بەلگىلى. داۋرەن اباەۆ ءوز سوزىندە ميگراتسيالىق جانە تسيفرلى حقو ارقىلى وسى كەمشىلىكتى جويۋعا بولاتىنىن جەتكىزدى.
استانا قالاسى ءىىد كوشى-قون باسقارماسىنىڭ باسشىسى ەركەتاي تۇتقىشەۆتىڭ ايتۋىنشا, وتكەن جىلى ۋاقىتشا تىركەۋدەن 160 مىڭ شەتەل ازاماتى ءوتىپتى, سونداي-اق 11 مىڭى زاڭسىز جۇرگەندىكتەن جاۋاپقا تارتىلعان. ال ونىڭ ىشىندە 1800-ءى سوت شەشىمى بويىنشا ەلىمىزدەن شىعارىلىپتى. قازاقستانعا جۇمىس ىستەۋ ماقساتىندا كەلگەندەردىڭ 70 پايىزى وزبەكستاندىقتار ەكەن.
استانا قالاسىنىڭ ا.يمانوۆ كوشەسىندە ورنالاسقان ميگراتسيالىق حقو ساعات 09:00-18:30 ارالىعىندا ءۇزىلىسسىز جۇمىس ىستەيدى. مۇندا ازاماتتاردىڭ مەديتسينالىق تەكسەرىس پەن داكتيلوسكوپيادان وتۋىنە, ساقتاندىرۋ ءپوليسىن رەسىمدەۋىنە, سايكەستەندىرۋ ءنومىرىن الۋىنا جاعداي جاسالعان. سونداي-اق ازاماتتاردىڭ تسيفرلىق ساۋاتىن اشۋ ماقساتىندا تەگىن ساباقتار دا وتكىزىلەدى. ول اپتانىڭ ءار كۇنىندە بەكىتىلگەن تاقىرىپتار بويىنشا جۇرگىزىلەدى. ءبىر ساعاتتى قۇرايتىن كۋرستا ەلەكتروندى ۇكىمەت پورتالىن پايدالانۋ تاسىلدەرى تۇسىندىرىلەدى, سونداي-اق مەملەكەتتىك قىزمەتتەرگە قول جەتكىزۋ جولدارى ۇيرەتىلەدى.
ايان ءابدۋالي, «ەگەمەن قازاقستان»