اقتاۋدا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىسى بويىنشا دەپارتامەنتىنىڭ ۇيىمداستىرۋىمەن سىبايلاس جەمقورلىققا قارسى ءىس-قيمىل جانە مەملەكەتتىك كورسەتىلەتىن قىزمەتتەر ماسەلەلەرى بويىنشا كەڭەيتىلگەن ءماجىلىس ءوتتى. جەرگىلىكتى جانە ورتالىق اتقارۋشى ورگانداردىڭ, «ازاماتتارعا ارنالعان ۇكىمەت» مەملەكەتتىك كورپوراتسياسى كەاق وبلىستىق فيليالىنىڭ باسشىلارى مەن قىزمەتكەرلەرى قاتىستى.
دەپارتامەنت قولداۋىمەن مەملەكەتتىك قىزمەتتىڭ وڭ ءيميدجىن جانە قوعامدا سىبايلاس جەمقورلىققا قارسى مادەنيەتتى قالىپتاستىرۋ ماقساتىندا 698 ءىس-شارا ۇيىمداستىرىلىپ, 170 مىڭنان استام ادام قامتىلعان, سونداي-اق قۇرامىنا مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, «نۇر وتان» پارتياسىنىڭ, وڭىرلىك كاسىپكەرلەر پالاتاسىنىڭ جانە باسقا دا سالانىڭ وكىلدەرى ەنگەن وبلىستىق سىبايلاس جەمقورلىققا قارسى موبيلدىك توپ ءوز جۇمىسىن باستاپ, اتالعان توپ تۇرعىندار جانە ەڭبەك ۇجىمدارىمەن 159 كەزدەسۋ مەن قوعامدىق قابىلداۋلار وتكىزىپ, جالپى سانى 36 032 ادامدى قامتىدى. قازىرگى تاڭدا موبيلدىك توپتار قالالىق جانە اۋداندىق دەڭگەيلەردە قۇرىلىپ, ازاماتتاردىڭ شاعىمدارىن جەدەل تۇردە قاراۋدى جۇزەگە اسىرىپ كەلەدى.
جيىندا دەپارتامەنتتىڭ سىبايلاس جەمقورلىق پروفيلاكتيكاسى باسقارماسىنىڭ باسشىسى ن.ايتجانوۆ بيىلعى جىلدىڭ 11 ايىنىڭ قورىتىندىسى بويىنشا سىبايلاس جەمقورلىق پروفيلاكتيكاسى سالاسىندا اتقارىلعان جۇمىستارعا توقتالىپ, «ەسىكتەن ەسىككە», «جولداردا سىبايلاس جەمقورلىقتى تومەندەتۋدىڭ 10 قادامى» جوبالارىن جۇزەگە اسىرۋ, سىبايلاس جەمقورلىققا قارسى موبيلدىك جانە ارنايى مونيتورينگ توپتارىنىڭ, «ادال ۇرپاق» ەرىكتى مەكتەپ وقۋشىلارى كلۋبتارىنىڭ قىزمەتى تۋرالى, سونىمەن بىرگە سىبايلاس جەمقورلىققا قارسى مونيتورينگ, سىبايلاس جەمقورلىق تاۋەكەلدەرىن تالداۋ جانە اكىمشىلىك تاجىريبە قورىتىندىلارىن باياندادى.
دەپارتامەنتتىڭ مەملەكەتتىك كورسەتىلەتىن قىزمەتتەر باسقارماسىنىڭ باسشىسى ج.مارشاك ۇلى تۇرعىندارعا مەملەكەتتىك كورسەتىلەتىن قىزمەتتەردىڭ ساپاسىن كوتەرۋ سالاسىنداعى نەگىزگى باعىتتارعا توقتالىپ ءوتتى. بۇدان باسقا «قۇپيا تۇتىنۋشى» ءادىسى بويىنشا قوعامدىق مونيتورينگتىڭ ناتيجەلەرىنە, دەپارتامەنت تاراپىنان تەكسەرۋ جۇمىستارى بارىسىندا انىقتالعان زاڭبۇزۋشىلىقتار ايتىلدى.
جيىندا اۋىل تۇرعىندارىنا قولايلى جاعداي جاساۋ ماقساتىندا اۋىل اكىمى اپپاراتتارى عيماراتتارىندا شتاتتان تىس مامان ءبولىپ, ارنايى كومپيۋتەرمەن جابدىقتاپ, قالا, اۋدان ورتالىعىنا بارماي-اق, ەلەكتروندى قىزمەت الۋ مۇمكىندىكتەرىن قاراستىرۋ جونىندە ۇسىنىستار بەرىلىپ, ول قالا, اۋدان اكىمدەرى تاراپىنان قولداۋ تاپتى. مەملەكەتتىك قىزمەت كورسەتۋ ساپاسىن ىشكى باقىلاۋ جۇمىستارىن جانداندىرۋ ماقساتىندا, قالا, اۋدان اكىمى اپپاراتتارىندا ءوز الدىنا ىشكى باقىلاۋ ءبولىمىن نەمەسە دەربەس قىزمەتىن قۇرۋ قاجەتتىگى ايتىلعان ماجىلىستە مەملەكەتتىك ورگاندار باسشىلارىنا سىبايلاس جەمقورلىققا قارسى ءىس-قيمىل مەن مەملەكەتتىك كورسەتىلەتىن قىزمەتتەر سالاسىنداعى كەمشىلىكتەردى جويىپ, الداعى ۋاقىتتا ولاردى بولدىرماۋ ءۇشىن ناقتى تاپسىرمالار بەرىلدى.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى